ލަންކާ އެއާޕޯޓްގައި ޑްރޯން އެރުވި ހަތަރު ދިވެއްސަކު ހައްޔަރުކޮށްފި
3 ފެބުރުއަރީ 2019 | އާދީއްތަ 05:54ހައްޔަރުކުރި މީހުންގެ ތެރޭގައި ހިމެނެނީ 19 އަހަރާއި 23 އަހަރާ ދެމެދުގެ ޒުވާނުން
ސްރީލަންކާގެ މަގުމަތި - ލަންކާގެ ބަންޑާރަނަޔަކަ އިންޓަނޭޝަނަލް އެއާޕޯޓު ވީޑިއޯކުރި ކަމުގެ ތުހުމަތުގައި ހަތަރު ދިވެއްސަކު ވަނީ ހައްޔަރު ކޮށްފައި
ލަންކާގެ ބަންޑާރަނަޔަކަ އެއާޕޯޓްގެ ހައި ސެކިއުރިޓީ ޒޯނެއް މަތިން ޑްރޯން އެރުވި ހަތަރު ދިވެއްސަކު ހައްޔަރުކޮށްފިއެވެ.
ލަންކާގެ ނޫސްވެރިޔެއްކަމަށްވާ ރަންގަނާ ޝާމިލްގެ ޓްވިޓާގައި ބުނެފައިވަނީ އެ ހަތަރު މީހުން ހައްޔަރު ކޮށްފައިވަނީ ހުއްދަ ނުހޯދާ ލަންކާގެ އެއާޕޯޓުގެ ސެކިއުރިޓީ ހައި ޒޯނެއްގައި ޑްރޯން ބޭނުން ކޮށްގެން ވީޑިއޯ ކުރުމުން ކަމަށެވެ.
އެ މައްސަލާގައި ލަންކާ ފުލުހުންގެ މީޑިއާ އިން ބުނީ ހައްޔަރުކުރި މީހުންގެ ތެރޭގައި ހިމެނެނީ 19 އަހަރާއި 23 އަހަރާ ދެމެދުގެ ޒުވާނުން ކަމަށެވެ. އޭގެތެރޭގައި އަންހެނެއް ހިމެނޭކަމަށް ފުލުހުން ވަނީ ބުނެފައެވެ.
މިއަދުގެ ވަގުތެއްގައި އެ މީހުން ކޯޓަށް ހާޒިރުކުރާނެ ކަމަށް ލަންކާގެ ފުލުހުން ހާމަކޮށްފައިވާއިރު ލަންކާގެ އެއާޕޯޓާއި ކައިރިން އަށް ކިލޯމީޓަރު ކައިރިއަށް ޑްރޯން އެރުވުމަކީ މަނާ ކަމެކެވެ. އަދި 200 ގްރާމަށްވުރެ ބަރު ކޮންމެ ޑްރޯނެއް ލަންކާގެ ސިވިލް އޭވިއޭޝަން އޮތޯރިޓީގައި ރެޖިސްޓްރީކުރަންޖެހޭއިރު ރޭގަނޑު ގަޑީގައި ޑްރޯން އެރުވުމަށް އިތުރު ހުއްދައެއް ބޭނުންވެއެވެ.
