ކުޅުދުއްފުށި ސިޓީއަކަށް ބަދަލުކުރާނެ ތާރީހެއް ސަރުކާރުން އަންގާފަނުވޭ: ކައުންސިލް
1 ފެބުރުއަރީ 2019 | ހުކުރު 17:20ސިޓީއަކަށް ބަދަލުކުރުމުގެ މަސައްކަތް އަންނަނީ ކުރަމުން
ހދ.ކުޅުދުއްފުށި
ހދ.ކުޅުދުއްފުށި ސިޓީއަކަށް ބަދަލުކުރާނެ ތާރީހެއް ސަރުކާރުން އަންގާފައިނުވާ ކަމަށް އެރަށުގެ ކައުންސިލުން ބުނެފިއެވެ.
ކުޅުދުއްފުށީ ކައުންސިލުން މިހެން ބުނެފައިމިވަނީ ފެބްރުއަރީމަހު ކުޅުދުއްފުށި ސިޓީ އަކަށް ބަދަލުކުރާނެ ކަމަށް އެއަތޮޅު ކައުންސިލުން ބުނެފައިވަނިކޮށްށެވެ.
ރާއްޖެއެމްވީއަށް އެރަށުގެ ކައުންސިލްގެ ރައީސް އަބްދުލްލަތީފް ހަސަން ވިދާޅުވީ ދިހަ ހާސް މީހުންގެ އާބާދީއެއް ހަމަވުމާއެކު ސިޓީއަކަށް ބަދަލުކުރުމުގެ މަސައްކަތް ކުރަމުންދާ ކަމަށެވެ.
އެގޮތުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއާ ބައްދަލުކުރައްވާ މުހިންމު މަޝްވަރާތަކެއް ކުރެވިފައިވާ ކަމަށް އަބްދުލްލަތީފް ވިދާޅުވިއެވެ. އޭނާ ވިދާޅުވީ މިމަޝްވަރާތަކުގައި ކުޅުދުއްފުށި ސިޓީއަކަށް ބަދަލުކުރުމަށް ކުރަން ޖެހޭ މަސައްކަތްތަކާއި ބެހޭ ގޮތުން މަޝްވަރާ ކުރެވިފައިވާ ކަމަށާއި، ނަމަވެސް އެރަށް ސިޓީއަކަށް ބަދަލުކުރާނެ ވަކި ތާރީހެއް ކަނޑައަޅާފައިނުވާ ކަމަށެވެ.
އަބްދުލްލަތީފު ވިދާޅުވީ ކުދުއްފުއްޓަކީ ވަކިން އޮންނަ ރަށަކަށްވާތީ ސިޓީއަކަށް ބަދަލުކުރުމަށް ގާނޫނީ ގޮތުން ގޮންޖެހުންތަކެއް ކުރިމަތިވެފައިވާ ކަމަށާއި، މަޖިލިހުން މަސައްކަތްތަކެއް ކުރަން ޖެހޭ ކަމަށެވެ. އަދި މިކަމަށް ވަގުތުތަކެއް ހޭދަވާނެ ކަމަށް އޭނާ ވިދާޅުވިއެވެ.
"މިހާރު ކައުންސިލަށް ވާނެ ގޮތެއް ނޭނގެ. އެހެން ރަށަކަށް ބަދަލުވާނެތޯ. ނޫނީ އަތޮޅު ކައުންސިލްތޯ ސިޓީ ކައުންސިލަށް ބަދަލުވާނީ." އަބްދުލްލަތީފު ވިދާޅުވިއެވެ.
އަބްދުލްލަތީފު ވިދާޅުވީ ސިޓީއަކަށް ބަދަލުވާއިރު ކުޅުދުއްފުށިން ލިބޭ ޚިދުމަތްތައް ވެސް ރަނގަޅުވާން ޖެހޭ ކަމަށެވެ. އެގޮތުން ހޮސްޕިޓަލްއާ، ތައުލީމީ ދާއިރާއާ، ބޯހިޔާވަހިކަން ރައްޔިތުންނަށް ފަހިވެގެންދާން ޖެހޭ ކަމަށެވެ.
