ހިތަދޫ ރީޖަނަލް ހޮސްޕިޓަލްގައި ދަތުގައި ފުޓުނި ނޭޅޭތާ އެތަށް ދުވަހެއް!

އައްޑޫ ސިޓީ ހޮސްޕިޓަލްގައި ދަތުގައި އަޅާ ފުޓުނި ނެތި، ފުޓުނި ނޭޅޭތާ އަހަރަކަށްވުރެ ގިނަދުވަސްވެފައިވާ ކަމަށް ހިތަދޫ ރީޖަނަލް ހޮސްޕިޓަލް ހިންގުމާއި ހަވާލުވެވަޑައިގެން ހުންނެވި ޝާހް ސައީދު ވިދާޅުވެއްޖެއެވެ.

ރާއްޖެ.އެމްވީއަށް މައުލޫމާތުދެއްވަމުން ޝާހް ސައީދު ވިދާޅުވީ ހިތަދޫ ހޮސްޕިޓަލުން ދަތުގައި ފުޓުނި ނޭޅޭތާ އަހަރަކަށްވުރެ ގިނަދުވަސްވެފައިވާއިރު، އެކަން ހެލްތް މިނިސްޓްރީގެ ސަމާލުކަމަށް ގެނެސްފައިވާ ކަމަށެވެ. ނަމަވެސް އަދިވެސް އެކަމަށް އެއްވެސް ހައްލެއް ލިބިފައިނުވާކަން ޝާހް ފާހަގަކުރެއްވިއެވެ.

މީގެ އިތުރުން ހިތަދޫ ހޮސްޕިޓަލްގެ ކަށީގެ ޑިޕާރޓްމަންޓްގެ ޚިދްމަތްވެސް ވަނީ މެދުކެނޑިފައެވެ. ޝާހް ވިދާޅުވީ ކަށީގެ ޑިޕާރޓްމަންޓްގެ ޚިދްމަތް މެދުކެނޑިފައިވަނީ ކަށީގެ ޑޮކްޓަރު ޗުއްޓީއަށް ގޮސްފައިވާތީ ކަމަށެވެ. އެކަންވެސް ހެލްތް މިނިސްޓްރީގެ ސަމާލުކަމަށް ގެނެސްފައިވާ ކަމަށް ޝާހް ވިދާޅުވިއެވެ.

ހިތަދޫ ރީޖަނަލް ހޮސްޕިޓަލަކީ މުޅި އެ ސިޓީގެ އާބާދީއަށް ޚިދްމަތް ދެމުން އަންނަ ހޮސްޕިޓަލަކަށްވާއިރު، ހިތަދޫ ރީޖަނަލް ހޮސްޕިޓަލްގައި ރޭޑިއޮލޮޖިސްޓެއްވެސް ނެތް ކަމަށް ޝާހު ވިދާޅުވިއެވެ.

މީގެ އިތުރުން ހަމުގެ ޑޮކްޓަރެއްވެސް އެ ހޮސްޕިޓަލްގައި ނެތެއެވެ. ޝާހް ވިދާޅުވީ ހަމުގެ ޑޮކްޓަރެއް ހޯދުމަށް ހެލްތް މިނިސްޓްރީގައި އެދިފައިވާ ކަމަށެވެ. ހެލްތް މިނިސްޓްރީން ހަމުގެ ޑޮކްޓަރެއް ހޯދުމުގެ މަސައްކަތް ކުރަމުން އަންނަ ކަމަށް ބުނެފައިވާ ކަމަށްވެސް ޝާހް ވިދާޅުވިއެވެ.

އައްޑޫ ސިޓީއިން ބޭނުންވާ ޒަރުރީ ގިނަ ޚިދްމަތްތަކެއް ލިބެމުން ނާންތީ އެ ސިޓީގެ ގިނަ ބަޔަކު ފާއިތުވި އަހަރުތަކުގައި ވަނީ މާލެއާއި ރާއްޖެއިން ބޭރަށް ހިޖްރަކޮށްފައެވެ. ހިޖްރަކުރުމުގެ ސަބަބުން އައްޑޫސިޓީގައި ދިރިއުޅޭ އާބާދީ 33000 އިން 31000 އަށް ދަށަށް ގޮސްފައިވާ ކަމަށް އައްޑޫ ސިޓީގެ މޭޔާރ އަބްދުﷲ ސާދިގު ވަނީ ވިދާޅުވެފައެވެ.