މި އަހަރުގެ އޭޕްރީލް މަހުގެ ހަ ވަނަ ދުވަހު ބާއްވާ ރައްޔިތުންގެ މަޖިލީހުގެ އިންތިހާބުގައި 36 ދާއިރާއަށް ޖުމްހޫރީ ޕާޓީ (ޖޭޕީ) ވާދަ ކުރަން ނިންމައިފިއެވެ.

ޖޭޕީގެ ފަރާތުން މަޖިލީހުގެ އިންތިހާބުގައި ވާދަ ކުރާ ކެނޑިޑޭޓުން ކަނޑައެޅުމުގެ ބާރު ޕާޓީގެ ލީޑަރު ގާސިމް އިބްރާހިމަށް ދިނުމަށް އެ ޕާޓީން ކައުންސިލުން ނިންމާފައެވެ. ކުރިން ނިންމާފައި އޮތީ ކޮމެޓީއަކުން ޓިކެޓް ދޭ ގޮތަށެވެ.

ޖޭޕީ ކައުންސިލުން ނިންމި ނިންމުމާ ގުޅޭ ގޮތުން މީޑިއާއަށް މައުލޫމާތު ދެއްވަމުން، ގާސިމް ވިދާޅުވީ 36 ދާއިރާއަށް އެ ޕާޓީން ވާދަ ކުރަން ނިންމީ ކޯލިޝަން އެއްބަސްވުމަށް އެމްޑީޕީން އިހްތިރާމު ނުކުރުމުން، ގޮތް ހުސްވެގެން ކަމަށެވެ. ކެންޑިޑޭޓުންނަށް ޕާޓީގެ ޓިކެޓް ދިނުމުގައި ބަލާނީ ކުރިމަތިލާފައިވާ މީހުންގެ ގާބިލު ކަމަށާއި ހޮވޭނެ ކަމުގެ ފުރުސަތު ބޮޑު ފަރާތްތަކަކަށް ކަމަށް ގާސިމް ވިދާޅުވިއެވެ.

ކޯލިޝަނުން މަޖިލީހަށް ވާދަ ކުރާނެ ގޮތްތަކާ ގުޅޭ ގޮތުން އެއްބަސްވެފައިވާ ކަމަށް ވިދާޅުވެ، ގާސިމް ވިދާޅުވީ އެ އެއްބަސްވުމަށް އިހްތިރާމް ނުކުރުމުން ނާށިގަނޑު ހިފައިގެން ސަލާން ޖަހަން މަޖުބޫރުވެއްޖެ ކަމަށެވެ. އަދި ޕާޓީގެ ފަރާތުން ޓިކެޓް ދިނުމުގެ ބާރުތައް ޕާޓީގެ ލީޑަރަށް ދިނުމަށް ކައުންސިލުން ނިންމީ ވަގުތު ކުޑަތަންވެފައި އޮތުމުން، ފަސޭހައިން ކަންކަން ނިންމުމަށް ކަމަށް ގާސިމް ވިދާޅުވިއެވެ.
"އެ ބާރުވެރިކަން އަޅުގަނޑަށް ދޫކޮށްލީ ވެސް މި ޕާޓީތަކާ ވާހަކަ ދައްކައިގެން އަޅުގަނޑުމެންނަށް ފަސޭހައިން ކުރިއަށް ދެވޭނެ ގޮތެއް ހޯދަން. އެ ދާއިރާ ދޫކޮށްލާފައި، މި ދާއިރާ ނަގާފައި އެ ގޮތަށް ގެންދިއުމުގެ ފުރުސަތު ދިނުމުގެ ގޮތުން،" މަޖިލީހުގެ ރައީސްކަން ވެސް ކުރައްވާ ގާސިމް ވިދާޅުވިއެވެ.

ޖޭޕީން ޓިކެޓް ދިން މީހުންގެ ތެރޭގައި އެ ޕާޓީގެ ޕާލަމެންޓްރީ ގްރޫޕުގެ މެމްބަރުން ހިމެނެއެވެ. އެ ޕާޓީގެ ޕާލަމެންޓްރީ ގްރޫޕުގެ މެމްބަރުންގެ އަދަދަކީ 21 އެވެ. ޖޭޕީއަކީ މިހާރު ހިނގަމުންދާ މަޖިލީހުގެ މައިނޯރިޓީ ޕާޓީއެވެ.

ޖުމްހޫރީ ޕާޓީން ވާދަ ކުރާ ދާއިރާތަކާއި ޓިކެޓް ދިން ފަރާތްތައް:

1. ހަނިމާދޫ ދާއިރާ ހުސައިން ޝަހުދީ

2. ކުޅުދުއްފުށީ އުތުރު ދާއިރާ ނަސްރުﷲ އިސްމާއިލް

3. ކަނޑިތީމު ދާއިރާ މުހައްމަދު ހުސައިން

4. އުނގޫފާރު ދާއިރާ އިލްހާމް އަހުމަދު

5. މަޑުއްވަރީ ދާއިރާ މުހައްމަދު އަމީތު އަހުމަދު

6. ކެންދޫ ދާއިރާ އަލީ ހުސައިން

7. ކެރެންދޫ ދާއިރާ އަލީ ހުސައިން

8. ކާށިދޫ ދާއިރާ މާޖިދު ސުލައިމާން

9. އއ. ތޮއްޑޫ ދާއިރާ އިބްރާހިމް ހަސަން

10. މަތިވެރި ދާއިރާ ހުސައިން މުހައްމަދު

11. މާމިގިލީ ދާއިރާ ގާސިމް އިބްރާހިމް

12. ދަނގެތި ދާއިރާ މުހައްމަދު ނާޒިމް

13. ކެޔޮދޫ ދާއިރާ މޫސާ ނިޒާރު އިބްރާހިމް 

14. ވިލުފުށީ ދާއިރާ ރިޔާޒު ރަޝީދު

15. ތިމަރަފުށި ދާއިރާ އަބްދުﷲ ރިޔާޒު

16. ގުރައިދޫ ދާއިރާ ހުސައިން މަނިކު ދޮންމަނިކު

17. އިސްދޫ ދާއިރާ އަލީ ހަމީދު

18. ފޮނަދޫ ދާއިރާ ފާތިމަތު ޒައީމް 

19. ގަމު ދާއިރާ އާދަމް އާސިފު

20. މާވަށޫ ދާއިރާ އަހުމަދު އަޒްހާން ފަހުމީ

21. ވިލިނގިލި ދާއިރާ ސައުދު ހުސައިން

22. ގެމަނަފުށި ދާއިރާ އަލީ އާދިލް

23. ދާންދޫ ދާއިރާ މުހައްމަދު ޝިޔާމް

24. ތިނަދޫ ދެކުނު ދާއިރާ އަބްދުﷲ އަހުމަދު

25. ފަރެސްމާތޮޑާ ދާއިރާ މުހައްމަދު މުހުތާރު

26. ފުވައްމުލަކު އުތުރު ދާއިރާ އަލީ ޝާހު

27. ހިތަދޫ މެދު ދާއިރާ ހުސައިން ސޯލިހު

28. ހެންވޭރު ދެކުނު ދާއިރާ އިރުތިޝާމް އާދަމް

29. ހެންވޭރު އުތުރު ދާއިރާ އަލްހާން ފަހުމީ

30. މައްޗަންގޮޅި ދެކުނު ދާއިރާ އިބްރާހިމް މަމްނޫން

31. މާފަންނު ދެކުނު ދާއިރާ މުހައްމަދު ހަމްދާން

32. ވިލިމާލެ ދާއިރާ ޑރ. މުހައްމަދު ޖަމީލު އަހުމަދު

33. ގަލޮޅު ދެކުނު ދާއިރާ އަބްދުﷲ ނަވާޒު

34. ހެންވޭރު ހުޅަނގު ދާއިރާ އާއިޝަތު ނާޒިމާ

35. ބިލެއްދޫ ދާއިރާ އަހުމަދު މުބީން

36. މަހިބަދޫ ދާއިރާ އަހުމަދު ސުނިލް