ބާސެލޯނާ އަށް ކުޅެމުން އަންނަ ސްޕެއިންގެ މިޑްފިލްޑަރު ޑެނިސް ސުއަރޭޒްގެ އެއްބަސްވުން އާކޮށް، ލޯން އެއްބަސްވުމެއްގެ ދަށުން އާސެނަލްއަށް ބަދަލުވެއްޖެއެވެ.
ރިޕޯޓްތައް ބުނާ ގޮތުން ސުއަރޭޒް ވަނީ ބާސާއާ އެކު އޭނާ ހަދާފައިވާ އެއްބަސްވުން 2021 ވަނަ އަހަރުގެ ނިޔަލަށް އާކޮށްފައެވެ. އެއްބަސްވުން އާކުރި ނަމަވެސް އޭނާ އާސެނަލްއަށް ބަދަލުވެފައި ވަނީ މި ސީޒަނުގެ ނިޔަލަށެވެ. އެގޮތުން މި ސީޒަނަށް ފަހު ސުއަރޭޒް އެނބުރި ބާސާއާ ގުޅޭނެއެވެ. ނަމަވެސް 20 މިލިއަން ޔޫރޯ ބާސާއަށް ދިނުމަށް ފަހު ސުއަރޭޒް ގަތުމުގެ ފުރުސަތު އާސެނަލްއަށް އޮތް ކަމަށް ރިޕޯޓްތައް ބުނެއެވެ.
ސުއަރޭޒް ލޯން އެއްބަސްވުމެއްގެ ދަށުން އާސެނަލްއަށް ބަދަލުވިކަން ބާސާގެ ކޯޗު ވަލްވާޑޭ ވަނީ ކަށަވަރުކޮށްދީފައެވެ.
ޖެނުއަރީ ޓްރާންސްފާއަށް އަމާޒުކޮށް ގިނަ ކްލަބްތަކުން ފާރަލަމުންދިޔަ ސުއަރޭޒް ހޯދުމަށް އެންމެ ފުރަތަމަ މަސައްކަތް ކުރަމުންދިޔައީ ޗެލްސީންނެވެ.
މެންޗެސްޓާ ސިޓީން 2011 ވަނަ އަހަރުގެ ސީޒަނުގައި ސީނިއާ ކެރިޔަރު ފެށި ސުއަރޭޒް ވަނީ ސެވިއްޔާ އަދި ވިޔަރެއާލް އަށް ކުޅެފައެވެ. އޭނާ ވަނީ ބާސާ އަށް މިހާތަނަށް ކުޅުނު 71 މެޗުގައި 8 ލަނޑު ވެސް ކާމިޔާބުކޮށްފައެވެ.
ބާސާއާ އެކު ސްޕެނިޝް ލަލީގާ އެއްފަހަރު، ކޮޕާ ޑެލްރޭ ދެފަހަރު އަދި ދެ ސްޕެނިޝް ސުޕާ ކަޕް ކާމިޔާބުކޮށްފައިވާ ސުއަރޭޒް ވަނީ ސެވިއްޔާއާ އެކު ޔޫރޮޕާ ލީގު ވެސް ކާމިޔާބުކޮށްފައެވެ.
ސްޕެއިންގެ 19 އަހަރުން ދަށުގެ ޓީމާއެކު 2012 ވަނަ އަހަރު ޔޫރޯ ކާމިޔާބު ކޮށްފައިވާ ސުއަރޭޒް ވަނީ ސްޕެއިންގެ އުމުރުފުރާތަކުގެ ޓީމުތަކުގެ އިތުރުން ސީނިއާ ޓީމަށް ވެސް ކުޅެފައެވެ.
