މަޝްހޫރު 'އެޕަލް' ކުންފުނިން އުފައްދާ، ދިވެހިންގެ ތެރޭގައި ވެސް މަޤުބޫލުކަން ހޯދާފައިވާ އައިފޯންގެ ފޭސްޓައިމް އެޕްލިކޭޝަން މެދުވެރިކޮށް ފާރަލުމުގެ މައްސަލައެއް ފެންމަތިވެއްޖެއެވެ.

މި މައްސަލަ އެންމެ ފުރަތަމަ ހާމަކޮށްފައި ވަނީ 28 ޖެނުއަރީ 2019 ގައި "ނައިންޓްފައިވްމެކް' ކިޔާ ބްލޮގެއްގައެވެ. އެ ބްލޮގްގައި ރިޕޯޓް ކޮށްފައިވާ ގޮތުން ފޭސްޓައިމް މެދުވެރިކޮށް ގުޅުމުން، ފޯނު ނުނެގިކަމުގައި ވިޔަސް ކޯލް ލިބޭ ފަރާތުގެ އޯޑިއޯ ގުޅާ ފަރާތަށް އަޑު އިވެއެވެ. މި ގޮތަށް އޯޑިއޯ އަޑުއެހުމަށްޓަކައި ޖެހެނީ ބޭނުންވާ ނަންބަރަކަށް ގުޅުމަށް ފަހު، އެ މީހެއްގެ އަމިއްލަ ނަންބަރާ އެކު ގްރޫޕް ޗެޓެއް ހަދާށެވެ. މައުލޫމާތު ލިބިފައިވާ ގޮތުގައި މި މައްސަލަ ދިމާވަނީ އައި އޯ އެސް 12.1 އަދި އޭގެ ފަހުގެ ވަރޝަން ތަކަށެވެ. އަދި ބައެއް ހާލަތްތަކުގައި ކޯލް ލިބޭ ފަރާތުގެ ވީޑިއޯ ވެސް ފެންނަ ކަމަށް ރިޕޯޓްތައް ބުނެއެވެ.

މި މައްސަލަ މިހާރު ވަނީ އެޕަލް ކުންފުނީގެ ސަމާލުކަމަށް އައިސްފައެވެ. އެޕަލް އިން ބުނެފައިވާ ގޮތުގައި އެ ކުންފުނިން މިހާރު ވަނީ ވަގުތީ ގޮތުން ފޭސްޓައިމްގެ ގްރޫޕްޗެޓް ފީޗާ ބޭނުން ނުކުރެވޭ ގޮތް ހަދާފައެވެ. އަދި މި މައްސަލަ ހައްލުކުރުމަށް ފަހު މި ހަފްތާގެ ފަހުކޮޅު އާ އަޕްޑޭޓެއް ފޮނުވާނެ ކަމަށް ވެސް އެ ކުންފުނިން ބުނެފައި ވެއެވެ.