ކޮވެކްސް ފެސިލިޓީ މެދުވެރިކޮށް އެމެރިކާއިން ވެކްސިން ފޯރުކޮށްދެނީ

ދުނިޔޭގެ ގައުމުތަކަށް ހަމަހަމަކަމާއެކު ވެކްސިން ފޯރުކޮށްދިނުމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)އިސްވެ އޮވެ އުފައްދާފައިވާ ކޮވެކްސް ފެސިލިޓީއަށް ކުރިޔަށް އޮތްތަނުގައި ގިނަ އަދަދަކަށް ވެކްސިން ފޯރުކޮށްދޭނެކަމަށް އެމެރިކާއިން ބުނެފިއެވެ.

އެމެރިކާގެ އާބާދީގެ ބޮޑު ބަޔަކަށް ވަނީ ވެކްސިން ދީފައެވެ. މިއާއެކު އެގައުމުން ބުނެފައިވަނީ ޖޫން މަސް ނިމެންވާއިރަށް އެގައުމުން 20 މިލިއަން ޑޯޒް ފޯރުކޮށްދޭނެކަމަށެވެ. އެއީ ފައިޒަރ ވެކްސިނާއި މޮޑާނާ ވެކްސިން އަދި ޖޯންސަން އެންޑް ޖޯންސަން ވެކްސިނެވެ. މީގެއިތުރުން އެމެރިކާއިން ވަނީ އެސްޓްރަޒެނިކާ ވެކްސިންގެ 60 މިލިއަން ޑޯޒް އެހެން ގައުމުތަކަށް ފޯރުކޮށްދިނުމަށް ވެސް ނިންމާފައެވެ.

ކޮވެކްސް ފެސިލިޓީއަށް އެހީތެރިވުމަށް އެމެރިކާއިން ނިންމި ނަމަވެސް އަދި އެކަމުގެ އެންމެ ފަހު ނިންމުން ނިންމާފައެއްނުވެއެވެ.

އަނެއްކޮޅުން އެމެރިކާއިން ވަނީ ކޮވެކްސް ފެސިލިޓީއަށް އިތުރު 2 ބިލިއަން އެމެރިކާ ޑޮލަރު ދިނުމަށް ނިންމާފައެވެ. މިއީ ކުރިން ދީފައިވާ އެހީތެރިކަމުގެ އިތުރަށް ދޭން ނިންމި އެހީތެރިކަމެކެވެ.