ކޮވެކްސް މެދުވެރިކޮށް ޕާކިސްތާނަށް އެސްޓްރަޒެނެކާ ވެކްސިންގެ 17 މިލިއަން ޑޯޒް
31 ޖެނުއަރީ 2021 | އާދީއްތަ 02:37ހަ މިލިއަން ޑޯޒް މި އަހަރުގެ ފުރަތަމަ ކުއާޓަރގެ ތެރޭގައި ލިބޭނެ
އެސްޓްރަޒެނެކާ ވެކްސިން ބޭނުންކުރުމުގެ ހުއްދަ ޕާކިސްތާނުން ވަނީ ދީފައި
ދުނިޔޭގެ ސިއްޙަތު ޖަމްޢިއްޔާގެ ކޮވެކްސް ފެސިލިޓީ މެދުވެރިކޮށް ޕާކިސްތާނަށް، އެސްޓްރަޒެނެކާ-އޮކްސްފޯޑް ޔުނިވާސިޓީގެ ކޮވިޑް-19 ވެކްސިންގެ 17 މިލިއަން ޑޯޒް ލިބިފައިވާ ކަމަށް އެގައުމުން ބުނެފިއެވެ.
ޕާކިސްތާނުގެ އޮފިޝަލަކު މީޑިއާއަށް މަޢުލޫމާތުދީފައިވާ ގޮތުގައި ކޮވެކްސް މެދުވެރިކޮށް އެގައުމަށް ލިބިފައިވާ ވެކްސިންގެ ޑޯޒްތަކުގެ ތެރެއިން ހަ މިލިއަން ޑޯޒް މި އަހަރުގެ ފުރަތަމަ ކުއާޓަރގެ ތެރޭގައި ޕާކިސްތާނަށް ލިބޭނެއެވެ. އަދި ބާކީ ހުރި ޑޯޒްތައް އަހަރުގެ މެދުތެރޭގައި ލިބޭނެކަމަށް އޭނާ ބުނެއެވެ.
ޕާކިސްތާނުން ކޮވެކްސް ފެސިލިޓީގައި ބައިވެރިވެފައި ވަނީ 2020 ވަނަ އަހަރުއެވެ. އަދި ކޮވެކްސް މެދުވެރިކޮށް އެގައުމަށް ބޭނުންވާ ވެކްސިންގެ ގިނަ ޑޯޒް ލިބޭނެ ކަމަށް ޕާކިސްތާނުން ބުނެއެވެ.
ކުރިއަށް އޮތް ހަފްތާގެ ތެރޭގައި ޕާކިސްތާނުގައި ވެކްސިންދިނުމުގެ މަސައްކަތް ފަށަން ތައްޔާރުވަމުންދާ އިރު، ޗައިނާގެ ސިނޮފާމް ކުންފުނިން ކޮވިޑް-19 އަށް އުފައްދާ ވެކްސިންގެ ފަސް ލައްކަ ޑޯޒް ކުރިއަށް އޮތް ދުވަސްތަކުގެ ތެރޭގައި ލިބިގެންދާނެ ކަމަށް އެގައުމުން ބުނެއެވެ. އަދި ސިނޮފާމް އިން އިތުރު އެއް މިލިއަން ޑޯޒް ފޯރުކޮށްދޭނެ ކަމަށް ޕާކިސްތާނުން ގަބޫލުކުރެއެވެ.
ޕާކިސްތާނުން މިހާތަނަށް އެސްޓްރަޒެނެކާ އާއި އޮކްސްފޯޑް ޔުނިވާސިޓީގެ ވެކްސިންގެ އިތުރުން ސިނޮފާމްގެ ވެކްސިން އެމަޖެންސީކޮށް ބޭނުންކުރުމުގެ ހުއްދަ ދީފައިވާއިރު، ކުރިއަށް އޮތް ދުވަސްތަކުގައި ރަޝިއާގެ ސްޕަޓްނިކް ވީއަށް އެގައުމުން ހުއްދަ ދެވިގެންދާނެ ކަމަށް އެގައުމުގެ އޮފިޝަލަކު ވިދާޅުވެފައިވާ ކަމަށް އަރަބް ނިއުސްގައި ވަނީ ރިޕޯޓްކޮށްފައެވެ.
