ކޮވެކްސް މެދުވެރިކޮށް ބްރެޒިލްއަށް 10 މިލިއަނާއި 14 މިލިއަން ޑޯޒްގެ ކޮވިޑް ވެކްސިން ލިބޭނެ
31 ޖެނުއަރީ 2021 | އާދީއްތަ 03:38ފާއިތުވި 24 ގަޑިއިރު އެގައުމުން އިތުރު 58،462 މީހުން ކޮވިޑް-19ށް ޕޮޒިޓިވްވެފައިވޭ
އެސްޓްރަޒެނެކާ ކުންފުނި
ދުނިޔޭގެ ސިއްޙަތު ޖަމުޢިއްޔާ (ޑަބްލިއުއެޗްއޯ)ގެ ކޮވެކްސް ފެސިލިޓީ މެދުވެރިކޮށް އެސްޓްރަޒެނެކާގެ ކޮވިޑް-19 ވެކްސިންގެ 10 މިލިއަނާއި 14 މިލިއަން ޑޯޒް ބްރެޒިލްއަށް ލިބޭނެ ކަމަށް އެގައުމުގެ ހެލްތް މިނިސްޓްރީން ބުނެފިއެވެ.
އެ މިނިސްޓްރީން ބުނީ ފެބްރުއަރީ މަހުގެ މެދެއްހާ ހިސާބު، އެސްޓްރަޒެނެކާ އާއި އޮކްސްފޯޑް ޔުނިވާސިޓީ ގުޅިގެން އުފައްދާފައިވާ ވެކްސިންގެ 10 މިލިއަނާއި 14 މިލިއަން ޑޯޒް ފޯރުކޮށްދޭނެ ކަމަށް ބުނެ ޑަބްލިއުއެޗްއޯއިން ސިޓީއެއް ފޮނުވާފައިވާ ކަމަށެވެ.
ބްރެޒިލްގެ ހެލްތް މިނިސްޓްރީން އާއްމުކޮށްފައިވާ އެންމެ ފަހުގެ ތަފާސްހިސަބުތައް ދައްކާ ގޮތުން ފާއިތުވި 24 ގަޑިއިރު އެގައުމުން އިތުރު 58،462 މީހުން ކޮވިޑް-19ށް ޕޮޒިޓިވްވެފައި ވާއިރު 1،279 މީހަކު މި ބަލީގައި މަރުވެފައިވާ ކަމަށް ވަނީ ރިޕޯޓު ކޮށްފައެވެ.
ބްރެޒިލްގައި ކޮވިޑް-19 ހަލުވިކަމާއެކު ފެތުރެމުން އަންނަ އިރު ބްރެޒިލްއަކީ ދުނިޔެއިން ތިންވަނައަށް އެންމެ ގިނަ އަދަދެއްގެ ކޭސް ރިޕޯޓު ކޮށްފައިވާ ގައުމެވެ.
އެގޮތުން އެގައުމުން މިހާތަނަށް 9،176،975 (ނުވަ މިލިއަން އެއް ލައްކަ ހަތްދިހަ ހަ ހާސް ނުވަ ސަތޭކަ ހަތްދިހަ ފަހެއް) މީހަކު ކޮވިޑަށް ޕޮޒިޓިވް ވެފައިވެއެވެ. އަދި ޖުމްލަ 2،23،945 (ދެ ލައްކަ ތޭވިސް ހާސް ނުވަ ސަތޭކަ ސާޅިސް ފަހެއް) މީހަކު މި ބަލީގައި މަރުވެފައި ވާކަމަށް ރިޕޯޓު ކޮށްފައިވެއެވެ.
