ރެޑްވޭވް އަހަރީ ބާޒާރުގެ ނަސީބުވެރިންނަށް ފައިސާގެ އިނާމް ހަވާލުކޮށްފި

ރެޑްވޭވް އިން 15 ނޮވެމްބަރ 2018 އިން 15 ޖެނުއަރީ 2019 ގެ ނިޔަލަށް، ރެޑްވޭވްގެ ހުރިހާ ފިހާރައެއްގައި ކުރިއަށް ގެންދިޔަ އަހަރީ ބާޒާރުގެ ގުރުއަތުން ހޮވުނު ނަސީބުވެރި ތިން ފަރާތަށް ފައިސާގެ އިނާމް ހަވާލުކޮށްފިއެވެ.

އާދިއްތަ ދުވަހު ރެޑްވޭވް އޮފީހުގައި ބޭއްވި ކުޑަ ރަސްމިއްޔާތެއްގައި ފާއިސާ އިނާމްތައް ހަވާލުކޮށްފައިވަނީ އައިމިނަތު ސަލާމާ އަށް 20،000ރ.، އަބްދުﷲ މުއިއްޒު ފުއާދަށް 30،000ރ. އަދި ޒާހިދާ އިބްރާހީމް އަށް 50،000ރ. އެވެ.

ރެޑްވޭވްގެ އަހަރީ ބާޒާރުގެ ނަމުގައި ފައިސާގެ އިނާމްތަކެއް ލިބިގެންދިޔަ ޕްރޮމޯޝަނެއް ކުރިއަށް ގެންދިޔައީ ކަސްޓަމަރުންގެ ހިޔާލާ އެކުގައި ކަމަށާއި އަދި ކުރިއަށް އޮތް ރެޑްވޭވް ރޯދަ ސޭލް ވެގެންދާނީ މިއަށް ވުރެ ވެސް ބޮޑު އިނާމްތަކެއް ލިބިގެންދާ ފުރިހަމަ ސޭލްއަކަށް ކަމުގައި ރެޑްވޭވުން ބުންޏެވެ.

ރެޑްވޭވް މެގަ މޯލްގެ ޖެނެރަލް މެނޭޖަރު މުހައްމަދު ސުޖާ ވިދާޅުވީ، މި ޕްރޮމޯޝަނަށް އާންމުންގެ ފަރާތުން ވަރަށް ބޮޑު ތަރުހީބެއް ލިބިފައިވާ ކަމަށާއި މިއަހަރުގެ އަހަރީ ބާޒާރު ތަފާތު ކުރުމުގެ ގޮތުން އެ ޕްރޮމޯޝަންގެ ތެރެއިން "ވިޒިޓް އެންޑް ވިން" ޕްރޮމޯޝަނެއް ވެސް ބާއްވާނެ ކަމަށެވެ. އަދި ކުރިއަތް އޮތް ދުވަސްތަކުގައި ކަސްޓަމަރުންނަށް ހެޔޮ އަގުގައި ސާމާނު ލިބޭ ޕްރޮމޯޝަންތައް ވެސް ފަށާނެ ކަމަށް އޭނާ ވިދާޅުވިއެވެ.

އަހަރީ ބާޒާރު ޕްރޮމޯޝަންގެ ދަށުން ރެޑްވޭވުން 1،500ރ. އަށް ވުރެ މަތިން ކުރި ކޮންމެ ވިޔަފާރިއަކަށް ކޫޕަނެއް ދޫކޮށްފައި ވެއެވެ. އަދި ގިނަ އަދަދެއްގެ ފަރުނީޗަރާއި ބަދިގޭ ސާމާނު ވަރަށް ހެޔޮ އަގުތަކުގައި މި ޕްރޮމޯޝަންގެ ދަށުން ވިއްކާފައި ވެއެވެ. ރެޑް ވޭވް އިން އަންނަނީ ކެއިން ބުއިމަށް ބޭނުންކުރާ ސާމާނުން ފެށިގެން ބަދިގެ ސާމާނާއި ފަރުނީޗަރު އަދި އިލެކްޓްރޯނިކް ސާމާނު ވެސް ވިއްކަމުންނެވެ.