ބިޑްނުކޮށް މަޝްރޫއުތައް ހިންގުމަށް ޕްރޮޕޯޒަލް ހުށަހަޅާ އުސޫލެއް ރައީސުލްޖުމްހޫރިއްޔާގެ އޮފީހުން އެކުލަވާލައި އަމަލުކުރަން ފަށައިފިއެވެ.

ބިޑް ކުރުމުގެ ދައުވަތަކާ ނުލައި ސަރުކާރަށް ޕްރޮޕޯޒަލް ހުށަހެޅުމުގެ އުސޫލުގެ މަޤްސަދަކީ ސަރުކާރުގެ ތަރައްޤީގެ ލަނޑުދަނޑިތައް ހާސިލުކުރުމުގައި އަމިއްލަ ފަރާތްތަކުގެ ވިސްނުމާއި ޚިޔާލު ބައިވެރިކުރެވޭނެ ގޮތްތަކެއް ހޯދައިދިނުމެވެ.

ބިޑް ކުރުމުގެ ދައުވަތަކާ ނުލައި ސަރުކާރަށް ޕްރޮޕޯޒަލް ހުށަހެޅުމުގެ އުސޫލަކީ ދައުލަތުގެ މާލިއްޔަތު ގަވާއިދުގެ ދަށުން އެކުލަވައިލައިފައިވާ އުސޫލެއް ކަމަށާއި މި އުސޫލުގެ ދަށުން ވަކި މަޝްރޫޢެއް ހިންގުމަށް ސަރުކާރުން އިޢުލާންކުރުމުގެ ކުރިން އަމިއްލަ ފަރާތްތަކުން އިސްނަގައިގެން، ސަރުކާރުގެ ތަރައްޤީގެ ލަނޑުދަނޑިތަކާއި ގުޅުން ހުރި މަޝްރޫޢުތައް ހިންގުމަށް ޕްރޮޕޯޒަލް ހުށަހެޅުމުގެ މަގު ފަހިވެގެންދާނެ ކަމަށް ރައީސް އޮފީހުން ބުނެއެވެ.

ސަރުކާރުން ކަނޑައަޅައިފައިވާ ވަކި މަޝްރޫއަކަށް ނުފެތޭ، ނަމަވެސް ސަރުކާރުގެ ތަރައްގީގެ އަމާޒުތަކަށް ވާޞިލުވުމަށް އެހީތެރިކަން ފޯރުކޮށްދޭފަދަ މަޝްރޫއުތަކާ ގުޅޭ ޕްރޮޕޯޒަލްތަކާއި ސަރުކާރުގެ ސްޓްރެޓީޖިކް ޑިވެލޮޕްމަންޓް ޕްލޭނުގައި ބަޔާންކޮށްފައިވާ ކަންތައްތައް ހާސިލުކުރުމަށް މަގުފަހިކޮށްދޭފަދަ ޕްރޮޕޯޒަލްތައް ބިޑަށް ހުޅުވައިނުލިޔަސް، އަލަށް އެކުލަވާލި މި އުސޫލުގެ ދަށުން ސަރުކާރަށް ހުށަހެޅިދާނެއެވެ. ނަމަވެސް ސަރުކާރުން އިޢުލާން ކޮށްފައިވާ، ނުވަތަ އިޢުލާން ކުރުމަށް ތައްޔާރުވެފައިވާ މަޝްރޫޢަކަށް މިއުސޫލުގެ ދަށުން ޕްރޮފޯސަލް ހުށަނޭޅޭނެ ކަމަށް ބަޔާންކޮށްފައިވެއެވެ.

މި އުސޫލުގެ ދަށުން ފްރޮޕޯޒަލް މިނިސްޓްރީ އޮފް އިކޮނޮމިކް ޑިވަލޮޕްމަންޓަށް ހުށަހަޅަން ޖެހޭއިރު ބިޑްކުރުމަކާ ނުލައި ހުށަހަޅާ ޕްރޮޕޯޒަލްތަކާ ގުޅިގެން އެންމެ ފަހު ނިންމުން ނިންމާ ފަރާތަކީ ވަޒީރުންގެ މަޖިލީހުގެ އިކޮނޮމިކް ކައުންސިލެވެ.

އަލަށް އެކުލަވާލި މި އުސޫލު މިހާރު ވަނީ އަމަލު ކުރަން ފަށާފައެވެ.