ފްރާންސްގެ ޔެލޯވެސްޓް މުޒާހަރާގެ ލީޑަރަކު ޒަޚަމްކޮށްލައިފި

ފްރާންސްގައި ކުރަމުންދާ ޔެލޯ ވެސްޓް މުޒާހަރާތަކުގެ މަޝްހޫރު އެކްޓިވިސްޓެއްގެ ގަޔަށް ރަބަރު ވަޒަނެއް އަރައި ސީރިއަސް ޒަޚަމްތަކެއް ވެއްޖެ ކަމަށް އޭނާގެ ވަކީލު ބުނެފިއެވެ.

ހޮނިހިރު ދުވަހު ކުރި މުޒާހަރަގައި ފުލުހުންނާ އެކު ހިނގި ކުރިމަތިލުންތަކުގައި ޖެރޯމް ރޮޑްރިގޭސް އަށް ލިބުނު އަނިޔާއާ އެކު އޭނާ އުމުރަށް ނުކުޅެދުންތެރިވެދާނެކަމުގެ ބިރު އެބަ އޮތް ކަމަށް އޭނާގެ ވަކީލު ވިދާޅުވިއެވެ.

މިއީ ރައީސް އެމަނުއެލް މެކްރޮންއާ ދެކޮޅަށް ޖެހިޖެހިގެން މުޒާހަރާ ކުރަމުންދާތާ 11 ވަނަ ހަފްތާ ބަންދެވެ.

ސެންޓްރަލް ޕެރިހުގެ ބަސްޓިލް މޮނިއުމެންޓްގެ ކައިރީގައި ހިނގި ހަމަނުޖެހުންތަކުގައި ލިބުނު ޒަޚަމްތަކަށް ފަހު ރޮޑްރިގޭޒް އޮތީ އާޓިފިޝަލް ކޯމާއެއްގައެވެ.

ތެލުން ނަގަން އުޅޭ ޓެކްސްއާ ގުޅިގެން ފެށުނު މުޒާހަރާތައް، ސަރުކާރުގެ ގިނަ ސިޔާސަތުތަކަކާ މެދު ހިތްހަމަ ނުޖެހޭ މީހުން ޝުޢޫރުފާޅުކުރާ މުޒާހަރާތަކަކަށް ބަދަލުވުމާ އެކު މުޒާހަރާތައް މައިިތިރިވީ ރައީސް މެކްރޮން އެ ޓެކްސް ނެގުން މަޑުޖައްސާލަން ނިންމުމާ ގުޅިގެންނާއި ފިނި މޫސުމުގެ ޗުއްޓީ ދުވަސްވަރާ ދިމާވުމާ ގުޅިގެންނެވެ.

އާއަހަރުގެ ޗުއްޓީއަށް ފަހު ޔެލޯ ވެސްޓް މުޒާހަރާތަކުގެ ބައިވެރިން ގިނަވެ، ހަމަނުޖެހުންތައް ވަނީ އިތުރުވާން ފަށާފައެވެ.

ނަމަވެސް މި އަހަރުގެ ފުރަތަމަ ހަފުތާ ބަންދުގައި މި ވަނީ ކުރިން ހަފްތާއަށް ވުރެ މުޒާހަރާގެ ބައިވެރިން އިތުރުވެފައެވެ. މަޝްރަހު ދިރާސާކުރާ ފަރާތްތަކުން ބުނެފައި ވަނީ މުސްތަގުބަލުގައި މުޒާހަރާ އިތުރަށް ހޫނުވެ، ހަމަނުޖެހުންތައް އިތުރުވުމުގެ ފުރުސަތު ބޮޑު ކަމަށެވެ.