އެޓްލެޓިކޯއާއެކު މޮރާޓާ މެޑިކަލް ފުރިހަމަކޮށްފި

އެޓްލެޓިކޯ މެޑްރިޑާއެކު ޗެލްސީއަށް ކުޅެމުން އައި އަލްވަރާ މޮރާޓާ މެޑިކަލް ފުރިހަމަކޮށްފިއެވެ.

ރިޕޯޓްތައް ބުނާގޮތުން މޮރާޓާ އެޓްލެޓިކޯއަށް ބަދަލުވީ 18 މަސް ދުވަހުގެ ލޯން އެއްބަސްވުމެއްގެ ދަށުންނެވެ.

މޮރާޓާ އެޓްލެޓިކޯއަށް ބަދަލުވީ، ޔުވެންޓަސް ދޫކޮށް ލޯނެއްގެ ދަށުން ގޮންޒާލޯ ހިގުއެން ޗެލްސީއަށް ބަދަލުވިތާ މާގިނަ ދުވަސްތަކެއް ނުވަނީހެވެ.

މޮރާޓާ އާއި ހިގުއެން އަކީ މި ޖެނުއަރީ ޓްރާންސްފާގައި ގިނަ ކްލަބްތަކުން ފާރަލަމުންދިޔަ ދެ ކުޅުންތެރިންނެވެ. އަދި އެ ދެ ކުޅުންތެރިންނަށް ބޮޑެތި އަގުތައްވެސް ކްލަބްތަކުން ކިއެވެ.

މޮރާޓާ ޗެލްސީއަށް ބަދަލުވީ 2017 ވަނަ އަހަރު ފަސް އަހަރު ދުވަހުގެ އެއްބަސްވުމެއްގެ ދަށުން 70 މިލިއަން ޕައުންޑަށެވެ. އެގޮތުން މޮރާޓާ ވަނީ މިހާތަނަށް ޗެލްސީއަށް ކުޅުނު 72 މެޗުގައި 24 ލަނޑު ކާމިޔާބުކޮށް، އެޓީމާއެކު އެފްއޭ ކަޕްވެސް ކާމިޔާބުކޮށްފައެވެ.

ރެއާލް މެޑްރިޑުން 2010 ވަނަ އަހަރު ސީނިއާ ކްލަބް ލެވެލް ކެރިއަރު ފެށި މޮރާޓާ ރެއާލް ދޫކޮށްލުމަށްފަހު ޔުވެންޓަސްއަށް 2014 ވަނަ އަހަރު ބަދަލުވެފައިވާއިރު، އެ ކްލަބުގައި އޭނާ ވަނީ ދެ ސީޒަން ހޭދަކޮށްފައެވެ.

އެމުއްދަތުގައި އެޓީމަށް ކުޅުނު 93 މެޗުގައި 27 ލަނޑު ކާމިޔާބުކޮށް، އެޓީމާއެކު އިޓާލިއަން ލީގު ދެފަހަރު، އަދި އިޓާލިއަން ކަޕް ދެފަހަރު ކާމިޔާބުކޮށްފައެވެ.

މީގެއިތުރުން އޭނާ ވަނީ އިޓާލިއަން ސުޕަރ ކަޕްގެ ދެވަނަ އަދި ޔުއެފާ ޗެމްޕިއަންސް ލީގުގެ ދެވަނަވެސް ޔުވަންޓަސްއާއެކު ކާމިޔާބުކޮށްފައެވެ.

ޔުވަންޓަސް ދޫކޮށްލުމަށްފަހު މޮރާޓާ ރެއާލަށް ބަދަލުވީ 2016 ވަނަ އަހަރުގެ ސީޒަނުގައެވެ. އެގޮތުން އޭނާ ވަނީ އެޓީމަށް ކުޅުނު 43 މެޗުގައި 20 ލަނޑު ކާމިޔާބުކޮށްފައެވެ.

ސްޕެއިން ގައުމީ ޓީމަށް ކުޅުނު 27 މެޗުގައި 13 ލަނޑު ކާމިޔާބުކޮށްފައިވާ މޮރާޓާ ވަނީ ސްޕެއިން 19 އަހަރުން ދަށް އަދި 21 އަހަރުން ދަށުގެ ޓީމާއެކު ޔޫރޯ ކާމިޔާބުކޮށްފައެވެ.