މޮނާކޯގެ ކޯޗުކަމުން ފްރާންސްގެ ލެޖެންޑް ތިއަރީ އޮންރީ ވަކިކޮށްފިއެވެ.

މި ސީޒަނުގައި ދަށް ނަތީޖާތަކެއް ހޯދަމުން އަންނަ މޮނާކޯ ރެލިގޭޝަނުން ސަލާމަތް ކުރުމަށް ކޯޗުކަމަށް އޮންރީ ހަމަޖެއްސީ ނިމިދިޔަ އޮކްޓޫބަރު މަހުއެވެ.

ނަމަވެސް އޮންރީގެ އިރުޝާދުގެ ދަށުން ވެސް މޮނާކޯއަށް މާއެދެވޭ ކުޅުމެއް ނުދެއްކި، މެޗުތަކުން އައީ ބަލިވަމުންނެވެ. އެގޮތުން އޭނާގެ އިރުޝާދުގެ ދަށުން ޖުމްލަ 20 މެޗު މޮނާކޯ ކުޅެފައިވާއިރު، އޭގެ ތެރެއިން އެޓީމު ވަނީ 11 މެޗުން ބަލިވެފައެވެ. ބާކީ ފަސް މެޗު އެއްވަރުވެގެން ނިމުނުއިރު، މޮޅުވީ އެންމެ ހަތަރު މެޗުންނެވެ.

ފްރެންޗް ކަޕުން މޮނާކޯ ކަޓާފައިވާއިރު، އެޓީމު އޮތީ ފްރެންޗް ލީގުގެ 19 ވަނައިގައެވެ. އެޓީމު 21 މެޗު ކުޅެފައިވާއިރު، ލިބިފައިވަނީ 15 ޕޮއިންޓެވެ. ލީގުގައި އެޓީމު ވަނީ ކުޅުނު 11 މެޗުން ބަލިވެފައެވެ.

ސީނިއާ ކެރިއަރު މޮނާކޯ އިން ފެށި އޮންރީ ވަނީ މޮނާކޯ އަށް 141 މެޗު ކުޅެދީ 28 ގޯލު ކާމިޔާބުކޮށްދީފައެވެ. އަދި އޮންރީ ވަނީ 1997 ވަނަ އަހަރު މޮނާކޯއާ އެކު ފްރެންޗް ލީގު ވެސް ކާމިޔާބުކޮށްފައެވެ.

ފްރާންސްގެ ގައުމީ ޓީމާއެކު ވޯލްޑް ކަޕް ކާމިޔާބުކޮށްފައިވާ އޮންރީ ވަނީ މޮނާކޯގެ އިތުރުން އާސެނަލް އާއި ބާސެލޯނާ އަށް ވެސް ކުޅެފައެވެ.

މޮނާކޯއިން ބުނީ، އުނދަގޫ ދަނޑިވަޅުގައި ވެސް ޓީމާ ހަވާލުވެ އޮންރީ ކޮށްދިން ބުރަ މަސައްކަތަށް ޝުކުރު އަދާކުރާ ކަމަށާއި، ކުރިމަގުގައި އޮންރީއަށް ކާމިޔާބީއަށް އެދޭ ކަމަށެވެ.

މޮނާކޯއިން ވަނީ އެ ކްލަބުގެ ކޯޗުކަން ލިއޮނާޑޯ ޖާޑިމްއާ އަލުން ހަވާލުކޮށް، ދެ އަހަރާއި ބައިގެ އެއްބަސްވުމެއްގައި ސޮއިކޮށްފައެވެ. ކޯޗުކަމުން ޖާޑިމް ވަކިކުރީ އޮކްޓޫބަރު މަހު އޮންރީ ގެނައުމަށެވެ.