ހަށިގަނޑުގައި ރޯކޮށްލި މީހާގެ ހާލު ސީރިއަސް، އައިޖީއެމްއެޗްގައި ދަނީ ފަރުވާ ދެމުން!
26 ޖެނުއަރީ 2019 | ހޮނިހިރު 07:39އެމީހާގެ ހަށިގަނޑުގެ 70 އިންސައްތަ ވަނީ ފިހިފައި
މިއަންހެން މީހާއަށް އައިސީޔޫގައި ދަނީ ފަރުވާ ދެމުން
އަމިއްލަ ހަށިގަނޑުގައި ރޯކޮށްލި ގދ.ގައްދޫ އަންހެން މީހާ އިތުރުފަރުވާއަށް މާލެ ގެނެސްފިއެވެ.
އާއިލާ ތެރޭގައި ދިމާވި މައްސަލައަކާ ގުޅިގެން، ނަފުސާނީ މައްސަލަ ހުންނަ އެ އަންހެން މީހާ އަމިއްލަ ގައިގައި ރޯކޮށްލީ ހުކުރު ދުވަހުގެ ހަވީރުގެ ވަގުތެއްގަ އެވެ. އޭނާގެ ހަށިގަނޑުގެ 70 އިންސައްތަ ވަނީ ފިހިފައެވެ.
މިމައްސަލައާ ގުޅިގެން ގައްދޫ ކައުންސިލްގެ މެމްބަރު އާމިރު އަބްދުﷲ ވިދާޅުވީ ގދ.ތިނަދޫ އަބްދުލްޞަމަދު މެމޯރިއަލް ހޮސްޕިޓަލުގައި ފަރުވާ ދިނުމަށްފަހު، ހުކުރު ދުވަހުގެ ރޭ 8:00 ހާއިރު މާލެ ގެނެސްފައިވާ ކަމަށެވެ.
އާއިލާއާ ހަވާލީދީ އާމިރު ވިދާޅުވީ އެއަންހެންމީހާއަށް އައިޖީއެމްއެޗް އައިސީޔޫގައި ފަރުވާ ދެމުން އަންނަ ކަމަށާއި، އަދިވެސް އޭނާގެ ހާލު ސީރިއަސް ކަމަށެވެ.
މީގެ އިތުރުން އާމިރު ވިދާޅުވީ މީގެ ކުރިން މިއަންހެން މީހާ އަމިއްލަ ހަށިގަނޑަށް އަނިޔާދީ މިފަދަ އެއްވެސް ކަހަލަ ކަމެއް ނުކުރާ ކަމަށާއި، އޭނާއަކީ ދެދަރިން ގޮވައިގެން ވަރަށް ރަނގަޅަށް ދިރިއުޅެމުން އަންނަ އަންހެނެއް ކަމަށެވެ.
އެ މީހާގެ ހުރީ ހަ އަހަރުގެ އަންހެން ކުއްޖަކާއި، 3 އަހަރުގެ ފިރިހެން ކުއްޖެކެވެ. މިހާރު އޭނާއަކީ އެކަނިވެރި މައެކެވެ.
