ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ލީޑާޝިޕް ބަދަލުކުރުމަށް ޔޫތު މިނިސްޓަރު އަހުމަދު މަހުލޫފް މަސައްކަތް ކުރައްވަމުން ގެންދަވާކަމަށް އެ އިދާރާއިން ބުނެފިއެވެ.
އެފްއޭއެމުން މީސްމީޑިއާގައި ހާމަކުރި ކުޑަ ބަޔާނެއްގައި ބުނީ، އެ އިދާރާގެ އިންތިހާބީ ލީޑާޝިޕް ބަދަލުކުރުމަށް މިނިސްޓަރު މަހުލޫފް މަސައްކަތް ކުރައްވަމުން ގެންދަވާ ގެންދެވުމަކީ ވަރަށް ދަށު ދަރަޖައިގެ އަމަލެއް ކަމަށާއި، އެކަން ކުށްވެރިކުރާ ކަމަށެވެ.
މީގެއިތުރުން ރައީސް އިބްރާހިމް މުހައްމަދު ސޯލިހުގެ ނަންފުޅު ނަހަމަގޮތުގައި ބޭނުންކޮށް، ކުންފުނިތަކުން ދެމުންދާ މާލީ އެހީ ނުލިބޭނެކަމުގެ ބިރު ދައްކަމުން ކްލަބްތަކާ މިނިސްޓަރު މަހުލޫފް ބައްދަލުކޮށްފައިވާ ކަމަށްވެސް އެފްއޭއެމުން ވަނީ ބުނެފައެވެ.
@ibusolih @AhmedMahloof pic.twitter.com/SPLy8GUzqY
— Maldives FA (@MaldivesFA) January 25, 2019
މި ބަޔާނަށް ރައްދު ދެއްވަމުން މެދުހެންވޭރު ދާއިރާގެ މެމްބަރު އަދި އެފްއޭއެމްގެ ކުރީގެ ރައީސް އަލީ އާޒިމް މީސް މީޑިއާގައި ވިދާޅުވީ، އެފްއޭއެމްއިން ފުޓުބޯޅަ ހިންގާ ކުރިއެރުވުމުގެ ބަދަލުގައި، އެ އިދާރާއިން ސިޔާސީ ކަންކަން ހިންގާ، އެކަމުގައި ބައިވެރިވެ، ސިޔާސީ ކަންކަން ކުރިއަރުވަން މަސައްކަތް ކުރާ ކަމަށެވެ. އަދި ފުޓުބޯޅަ ވީހާލެއްގައި ވާން ދޫކޮށްލައިގެން ތިބި ކަމަށްވެސް އަލީ އާޒިމް ވިދާޅުވިއެވެ.
މިނިސްޓަރު މަހުލޫފަށް އެފްއޭއެމުން ގިނަ ތުހުމަތުތަކެއް ކޮށްފައިވާއިރު، އެ އިދާރާއިން އަންގާރަ ދުވަހު ނެރުނު ބަޔާނެއްގައި ބުނީ، މި މަހުގެ 9 ވަނަ ދުވަހު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއާ އެކު އެފްއޭއެމްގެ ރައީސް ބައްސާމް އަދީލް ޖަލީލު ބޭއްވެވި ބައްދަލުވުމުގައި ކްލަބްތަކުގެ ތަރައްގީއަށް ސަރުކާރުގެ ކުންފުނިތަކާ ގުޅިގެން ކްލަބްތަކަށް ދެމުން އަންނަ މާލީ އެހީތެރިކަން އެހެން އަހަރުތަކެކޭ ވެސް އެއްފަދައިން، މި އަހަރު ވެސް ދިނުމަށް ކުންފުނިތަކާ އެކު މަޝްވަރާކުރައްވާނެ ކަމަށް ރައީސް ސޯލިހު ވިދާޅުވެފައިވާ ކަމަށެވެ. އަދި އެ ފައިސާ ވީއެންމެ އަވަހަކަށް ކްލަބްތަކަށް ލިބިގެންދާނެ ކަމުގެ ޔަގީންކަން ބައްދަލުވުމުގައި ލިބިގެންގޮސްފައިވާ ކަމަށް ވެސް ބަޔާނުގައި ވެއެވެ.
Statement by FAM pic.twitter.com/J769agMCRH
— Maldives FA (@MaldivesFA) January 23, 2019
އެގޮތުން އެ ފައިސާ ކްލަބްތަކަށް މި އަހަރު ސަރުކާރުގެ ފަރާތުން ލިބިއްޖެ ނަމަ، 2020 ވަނަ އަހަރުން ފެށިގެން ކްލަބްތަކަށް ފައިސާ ދޫކުރާނީ އެފްއޭއެމުންކަމުގެ ފުރިހަމަ ޔަގީންކަން ރައީސް ސޯލިހުއަށް އަރުވާފައިވާނެ ކަމަށް ވެސް މި ބަޔާނުގައި ވެއެވެ. އަދި މި ފައިސާ އެފްއޭއެމުން ކްލަބްތަކަށް ދޫކުރާނީ އެއްވެސް ފަރާތެއްގެ މެދުވެރިވުމެއް ނެތި ކަމަށް ވެސް އެ އިދާރާއިން ވަނީ ބުނެފައެވެ.
މި އަހަރުގެ ފުޓުބޯޅަ ސީޒަން ފެށުމަށް ހަމަޖެހިފައިވަނީ ޖޫން މަހުއެވެ. އެގޮތުން ކްލަބްތަކުން މިހާރުއްސުރެ އަންނަނީ ސީޒަނަށް ތައްޔާރުވުމަށް ބަޖެޓް ހޯދުމުގެ މަސައްކަތް ކުރަމުންނެވެ.
