ކޮޕާޑެލްރޭގެ ކުއާޓާ ފައިނަލުގެ ފުރަތަމަ ލެގުގއި ސެވިއްޔާ އަތުން ބާސެލޯނާ ބަލިވެއްޖެއެވެ.
ބުދަ ދުވަހުގެ ރޭ ކުޅުނު މެޗުން ސެވިއްޔާ އަތުން ބާސާ ބަލިވީ 0-2 ގެ ނަތީޖާއަކުންނެވެ.
ސެވިއްޔާ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ ބާސާއިންނެވެ. އެގޮތުން އެޓީމުން ދިޔައީ ސެވިއްޔާގެ ހާފަށް ބާރުބޮޑުކުރުމަށް މަސައްކަތް ކުރަމުންނެވެ.
މި ހާފްގައި ސެވިއްޔާގެ ފަރާތުން ހަމަލާތަކެއް ފެނިގެން ގޮސްފައިވާއިރު، އެ ހަމަލާތަކުގެ ބޭނުން އެންމެ އެދެވޭ ގޮތެއްގައި އެޓީމަށް ހިފިފައެއް ނުވެއެވެ.
ފުރަތަމަ ހާފް ނިމުނީ ދެ ޓީމުން ކުރެ ޓީމަކަށް ވެސް ލަނޑެއް ނުޖެހި އެއްވަރުވެގެންނެވެ.
Sarabia & Ben Yedder put @SevillaFC_ENG in charge of their #CopaDelRey quarter-final!
— LaLiga (@LaLigaEN) January 23, 2019
Sevilla 2-0 Barcelona pic.twitter.com/l0hpKHTdXc
ދެވަނަ ހާފް ފެށިގެން ސެވިއްޔާ އިން އެޓީމުގެ އެޓޭކްތައް ވަރުގަދަކޮށްފައިވާއިރު، ފުލުފުލުގައި އެޓީމުން ދިޔައީ ލަނޑު ޖެހުމަށް ފުރުސަތު ތަނަވަސްކުރަމުންނެވެ.
ސެވިއްޔާ އިން މެޗުގެ ލީޑު ނެގީ 58 ވަނަ މިނެޓުގައި ޕަބްލޯ ސަރަބިއާ ކާމިޔާބުކުރި ލަނޑުންނެވެ. މި ލަނޑަށް ފަހު ވެސް ސެވިއްޔާ އިން ދިޔައީ ބާސާގެ ގޯލަށް ނުރައްކާކޮށް ހަމަލާތައް އުފައްދަމުންނެވެ.
ސެވިއްޔާ އިން ލީޑު ފުޅާކުރީ 76 ވަނަ މިނެޓުގައެވެ. މި ލަނޑު ކާމިޔާބުކުރީ ބެން ޔެޑާއެވެ.
ސެވިއްޔާ އަދި ބާސާ ބައްދަލުކުރާ ދެވަނަ ލެގުގެ މެޗު އޮންނާނީ މި މަހުގެ 30 ވަނަ ދުވަހު ބާސާ ދަނޑުގައެވެ. ސެމީއަށް ދަތުރުކުރަން އެ މެޗުން ތިން ލަނޑުގެ ތަފާތުން ބާސާ މޮޅުވުން މަޖުބޫރުވާނެއެވެ.
