މަރުތައް ބަލާ ކޮމިޝަނުން ޕްރޮފެސަރ އުގެއިލްގެ އެހީތެރިކަން ހޯދަން ފަށައިފި
22 ޖެނުއަރީ 2019 | އަންގާރަ 16:22ކޮމިޝަނުގެ މަސައްކަތްތަކަށް އުއްމީދީ ކުރިއެރުންތަކެއް ލިބެމުންދާކަމަށް ވިދާޅުވި
ޕްރޮފެސަރ އުގެއިލް
މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލާ ރިޔާސީ ކޮމިޝަނުން، ދިވެހި ސައިންސްވެރިޔާ ޕްރޮފެސަރު ހަސަން އުގެއިލްގެ އެހީ ހޯދަން ފަށައިފި އެވެ.
އެކޮމިޝަނުގެ ރައީސް އަދި ކުރީގެ ބަންޑާރަ ނައިބު ހުސްނުއް ސުއޫދުވަނީ ރާއްޖެއެމްވީއަށް ވަނީ އެކަން ކަށަވަރުކޮށް ދެއްވާފައެވެ.ސުއޫދު ވިދާޅުވީ މިދިޔަ ހަފްތާގައި ޕްރޮފެސަރ އުގެއިލް އެ ކޮމިޝަނަށް ވަޑައިގެން ބައެއްމަސައްކަތްތައް ބައްލަވާލެއްވިކަމަށެވެ.
"މައިގަނޑު އުގެެއިލްގެ އެހީތެރިކަްނ މި ހޯދަނީ މީހުން އައިޑެންޓިފައި ކުރުމަށް" ސުއޫދު ވިދާޅުވިއެވެ. ސުއޫދު ވިދާޅުވީ، ފޮޓޯ އަދި ވީޑިއޯ ބަލައިގެން މީހުން ދެނެގަތުމާއި ލައި ޑިޓެކްޝަންގެ އެހީތެރިކަން އުގެެއިލްގެ ފަރާތުން ހޯއްދަވާނެކަމަށެވެ.
"ވަރަށް އުއްމީދު އެބައޮތް އިނގޭތޯ. ކުރިއެރުންތައް އެބަލިބޭ. އުއްމީދީ މަސައްކަތްތަކެއް ކުރެވެމުން އެބަދޭ" ސުއޫދު ވިދާޅުވިއެވެ.
އުގައިލްގެ އެހީތެރިކަން ހޯދަން ފަށާފައިވާކަމަށް ކޮމިޝަނުގެ ރައީސް ވިދާޅުވިއިރު އަވަހާރަ ކޮށްލާފައިވާ ދީނީ ޢިލްމުވެރިޔާ ޑރ އަފްރާޝީމް ޢަލީގެ މަރުގެ މައްސަލާގައި ތުހުމަތު ކުރެވޭ ދެމީހަކު ހޯދުމަށް ކޮމިޝަނުން ހޯމަ ދުވަހު ވަނީ ވީޑިއޯއެއް އާއްމުވެސް ކޮށްފައެވެ.
މަރުތަކުގެ މައްސަލާގައި ދުނިޔޭގެ ޤާބިލް ފޮރެންސިކް އެކްސްޕާޓުންގެ އެހީތެރިކަން ހޯދާދިނުމަށް ކުރީގެ ރައީސް އަބްދުﷲ ޔާމީންގެ ވެރިކަމުގައި ޕްރޮފެސަރ އުގައިލް ހުށަހެޅުއްވިއެވެ.އެހެންނަމަވެސް އޭރުގެ ސަރުކާރުން އެ ހުށައެޅުން ބަލައިގެންފައެއް ނުވެއެވެ.
ޕްރޮފެސަރ އުގައިލް އަކީ އިނގިރޭސިވިލާތުގެ ބްރެޑްފާޑް ޔުނިވާސިޓީގައި ވިޝުއަލް ކޮމްޕިއުޓިންގެ ދާއިރާއިން ސީނިއަ ޕްރޮފެސަރެއްގެ މަގާމު އަދާކުރައްވާ ބޭފުޅެކެވެ. އަދި ޕްރޮފެސަރ އުގައިލްގެ އާޓިފިޝަލް އިންޓެލިޖެންސް އުފެއްދުންތައް ދުނިޔޭގެ ކުރިއަރާފައިވާ ޤައުމުތަކުގައިވެސް ބޭނުން ކުރަމުން ގެންދެއެވެ.
