24 ގަޑިއިރު ވިޔަފަރިކުރެވޭ ގޮތަށް 13 ސަރަހައްދެއް ކަނޑައަޅައިފި
24 ގަޑިއިރު ވިޔަފާރިކުރަން ބޭނުންވާ ފަރާތްތަކަށް އެ ފުރުޞަތު އެބައޮތް
މަޖީދީމަގުގައި ހުރި ފިހާރަޔަކަށް ވަނީ 24 ގަޑިއިރު ހުއްދަ ދީފައި
މާލެ އަދި ވިލިމާލޭގައި 24 ގަޑިއިރު ވިޔަފާރި ކުރެވޭ ސަރަހައްދުގެ ގޮތުގައި 13 ސަރަހައްދެއް އިކޮނޮމިކް މިނިސްޓްރީން ކަނޑައަޅައިފިއެވެ.
އިކޮނޮމިކް މިނިސްޓްރީން އަންގާރަ ދުވަހު ކުރި އިއުލާނެއްގައި ބުނެފައި ވަނީ ސައިހޮޓަލާއި ރެސްޓޯރަންޓް ހިންގުމުގެ ގަވާއިދާއި ކެންޓީނާ ބެހޭ ގަވާއިދު އަދި އިމްޕޯޓް މުދަލުގެ ވިޔަފާރި ކުރުމުގެ ގަވާއިދުގެ ދަށުން 24 ގަޑިއިރު ވިޔަފާރި ކުރުމުގެ ހުއްދައަށް މާލެ އަދި ވިލިމާލޭގައި ދެވޭނީ ވަކި ސަރަހައްދުތަކެއްގައި ކަމަށެވެ.
އޭގެ ތެރެއިން މާލެއިން ކަނޑައަޅާފައި ވަނީ، ބޮޑުތަކުރުފާނު މަގު، ކަނބާއައިސާރަނި ހިނގުން، ފަރީދީ މަގު، ސޯސަން މަގު، މެދުޒިޔާރަތް މަގު، ޖަނަވަރީ މަގު، މަޖީދީ މަގު، ބުރުޒުމަގު، އޯކިޑު މަގު، އަމީނީ މަގު، ލޮނުޒިޔާރަތް މަގު އަދި ޗާންދަނީ މަގެވެ.
މީގެ އިތުރުން ވިލިމާލެއިން ވިޔަފާރި ކުރެވޭނީ ވިލިނގިލި ފެރީ ޓާމިނަލް ކައިރިން އެކަންޏެވެ.
އިކޮނޮމިކް މިނިސްޓްރީ އިން ބުނީ 24 ގަޑިއިރު ވިޔަފާރިކުރުމުގެ ހުއްދަ ދޫކުރާ ތަންތަނުގެ ތެރެއިން އިމްޕޯޓު މުދަލުގެ ވިޔަފާރިކުރާ ތަންތަނުން ވިއްކޭނީ ހަމައެކަނި ޒަރޫރީ ބޭނުންތައް ފުއްދުމަށް ބޭނުންކުރާ ތަކެތި ކަމަށެވެ. އަދި 24 ގަޑިއިރު ވިޔަފާރިކުރުމުގެ ހުއްދަ ދޫކުރެވޭނީ ހުއްދައަށް އެދޭ ތަނުގައި ފުރިހަމަވާންޖެހޭ ޝަރުތުތައް ފުރިހަމަވޭތޯ ބަލައި ޗެކު ކުރުމަށް ފަހުގައި ކަމަށާއި ނަމާދު ވަގުތުތަކަށް ތަން ބަންދުކުރުން ފިޔަވައި އެހެން ހުރިހާ ވަގުތެއްގައި ވިޔަފާރިކުރަން އަންނަ ފަރާތްތަކަށް ހިދުމަތް ލިބޭނެ އިންތިޒާމު ހަމަޖައްސާފައި ބަހައްޓަން ޖެހެނެ ކަމަށް އެ މިނިސްޓްރީ އިން ބުންޏެވެ.
24 ގަޑިއިރު ވިޔަފާރިކުރުމުގެ ހުއްދައަށް އެދި ހުށަހަޅާ ފޯމު އިކޮނޮމިކް މިނިސްޓްރީގެ ވެބްސައިޓުން ލިބެން ހުންނާނެ ކަމަށް އެ މިނިސްޓްރީން ބުނެއެވެ.
