ޖުޑީޝަލް ރިފޯމް އެޖެންޑާއަށް އެއްބާރުލުން ދޭން، ގާޒީ ހަލީމް އިސްތިއުފާ ދެއްވައިފި
އިސްތިއުފާގެ ސިޓީ ހުށަހެޅުއްވީ ޖޭއެސްސީގެ ރައީސަށް
ސިވިލް ކޯޓުގެ ގާޒީ ހަލީމް
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ޖުޑީޝަލް ރިފޯމް އެޖެންޑާއަށް އެއްބާރުލުން ދެއްވުމަށް ކަމަށް ވިދާޅުވެ، ސިވިލް ކޯޓުގެ ގާޒީ މުހައްމަދު ހަލީމް އިސްތިއުފާ ދެއްވައިފިއެވެ.
އިސްތިއުފާގެ ސިޓީ ހަލީމް ހުށަހަޅުއްވާފައި ވަނީ ޖުޑީޝަލް ސާވިސް ކޮމިޝަން (ޖޭއެސްސީ)ގެ ރައީސް އަދި ސުޕްރީމް ކޯޓުގެ ފަނޑިޔާރު އަބްދުﷲ އަރީފަށެވެ. އޭނާ ހުށަހެޅި އިސްތިއުފާގެ ސިޓީގެ ކޮޕީއެއް ރާއްޖެއެމްވީއަށް ވަނީ ލިބިފައެވެ.
އެ ސިޓީގައި ހަލީމް ވިދާޅުވެފައި ވަނީ ރައީސް ސޯލިހުގެ ޖުޑީޝަލް ރިފޯމް އެޖެންޑާއަށް އެއްބާރުލުން ދިނުމުގެ ގޮތުން ކޯޓުތަކުގެ ހުރިހާ ފަނޑިޔާރުން އަލުން އައްޔަން ކުރުމަށް، މިހާރު ތިއްބެވި ހުރިހާ ފަނޑިޔާރުން އިސްތިއުފާ ދެއްވަން ޖެހޭނެ ކަމަށް ގަބޫލު ކުރައްވާ ކަމަށެވެ.
"ވީމާ އެކަމަށް ފުރުސަތު ދީ މިސާލު ދެއްކުމުގެ ގޮތުން އަޅުގަނޑު ސިވިލް ކޯޓުގެ ފަނޑިޔާރު ކަމުން 2019 ޖެނުއަރީ 22 ވަނަ ދުވަހުން ފެށިގެން އިސްތިއުފާ ދީފީމެވެ." ހަލީމްގެ އިސްތިއުފާގެ ސިޓީގައި ވިދާޅުވެފައިވެއެވެ.
ދެހާސްފަނަރަ ވަނަ އަހަރުގެ ފެބްރުއަރީ މަހު ސިވިލް ކޯޓުގެ ގާޒީގެ މަގާމަށް އައްޔަން ކުރެއްވި ހަލީމް ވަނީ ކުރު މުއްދަތެއްގައި ތެރޭގައި ސިވިލް ކޯޓުން މުހިއްމު މައްސަލަތަކެއް ނިންމަވާފައެވެ.
އެގޮތުން ރާއްޖޭގެ އެންމެ ދުވަސްވީ ނޫސް، "ހަވީރު ނޫސް" 36 އަހަރަށް ފަހު، ހުއްޓާލަން ޖެހުނީ ގާޒީ ހަލީމް ނިންމެވި މިލްކުވެރިކަމާ ގުޅޭ މައްސަލައަކާ ގުޅިގެންނެވެ. އަދި ޕީޕީއެމް ރައީސް އަބްދުﷲ ޔާމީނާ ހަވާލު ކުރަން ސިވިލް ކޯޓަށް ހުށަހެޅުއްވި މައްސަލަ ނިންމެވީ ވެސް ގާޒީ ހަލީމެވެ. މީގެ އިތުރުން އެއް ދުވަހެއްގެ ތެރޭގައި ރެކޯޑު އަދަދަކަށް މައްސަލަ ބެއްލެވި ގާޒީއަކީ ވެސް ހަލީމެވެ. އޭނާ ވަނީ އެއް ދުވަހުގެ ތެރޭގައި 160 މައްސަލަ ބައްލަވާފައެވެ.
ސިވިލް ކޯޓުގެ ގާޒީގެ މަގާމަށް ވަޑައިގެންނެވުމުގެ ކުރިން އޭނާ ވަނީ އެމްޑީޕީ އާއި ޖުމްހޫރީ ޕާޓީ (ޖޭޕީ)ގައި މަސައްކަތްޕުޅު ކުރައްވާފައެވެ. އަދި 2013ގެ ރިޔާސީ އިންތިހާބު ބާތިލު ކުރުމަށް ޖޭޕީން ސުޕްރީމް ކޯޓަށް ހުށަހެޅި މައްސަލާގައި އޭނާ ވަނީ ވަކާލާތުވެސް ކުރައްވާފައެވެ.
