ހޮޅުދޫ ދާއިރާ އާއި ތިނަދޫ ދެކުނު ދާއިރާގެ ފޮށިތައް އަލުން ގުނަނީ
8 ޝަކުވާއެއް ވަނީ ބަލާފައި
ހުކުރު ދުވަހު ބޭއްވި އެމްޑީޕީ ޕްރައިމަރީގެ ވޯޓްލުން
ހުކުރު ދުވަހު ބޭއްވުނު އެމްޑީޕީ ޕްރައިމަރީން ހުށައެޅުނު ޝަކުވާތައް ބެލުމަށްފަހު ހޮޅުދޫ ދާއިރާ އާއި ތިނަދޫ ދެކުނު ދާއިރާގެ ފޮށިތައް އަލުން ގުނުމަށް އެމްޑީޕީން ނިންމައިފި އެވެ.
އެމްޑީޕީން އާދިއްތަ ދުވަހު ނެރުނު ނޫސްބަޔާނެއްގައި ބުނީ، ކުރިއަށް އޮތް މަޖިލީހުގެ އިންތިހާބުގައި އެމްޑީޕީން ވާދަ ކުރާ ކެންޑިޑޭޓުން ހޮވުމަށް ބޭއްވި ޕްރައިމަރީއާ ގުޅިގެން އަށް ޝަކުވާއެއް ބަލައި އެއް ދާއިރާއެއްގެ މައްސަލަ އަލުން ބެލުމަށް ވެސް ވަނީ ނިންމާފައެވެ. އަދި ފަސް މައްސަލައެއް ބަލާނެ ތަނެއް ނެތް ކަމަށް އެމްޑީޕީ ޕްރައިމަރީ އާއި ގުޅޭ ޝަކުވާ ކޮމިޓީން ވަނީ ނިންމާފައެވެ.
އެމްޑީޕީން ބުނި ގޮތުގައި، ގުނަން ނިންމާފައި ވަނީ ދެ ކެނޑިޑޭޓުންނަށް ލިބުނު ވޯޓުގެ ފަރަގު ހަނިކަމުން ހޮޅުދޫ ދާއިރާ އާއި ތިނަދޫ ދެކުނު ދާއިރާގެ ފޮށިތައް ކަމަށެވެ. އިތުރަށް ބަލަމުން އަންނަނީ ފުވައްމުލަކު ދެކުނު ދާއިރާގެ މައްސަލައެއް ކަމަށާއި އެއީ 24 ވޯޓުގެ ފަރަގެއް އުޅޭތީ ރީރަޖިސްޓްރޭޝަންގެ މައްސަލަތަކެއް ކަމަށް ވެސް އެ ޕާޓީ އިން ބުންޏެވެ.
ދެ ވޯޓުގެ ތަފާތުން ތިނަދޫ ދެކުނު ދާއިރާގެ އެމްޑީޕީ ޓިކެޓް ހޯއްދެވީ އަބްދުﷲ ސަނީފެވެ. އޭނާއާ ވާދަކޮށް، ނާކާމިޔާބުވެވަޑައިގެންނެވި އެމްޑީޕީ ގައުމީ މަޖިލީހުގެ މެމްބަރު ޒިފްލީން ހަސަންނެވެ. ހޮޅުދޫ ދާއިރާގެ އެމްޑީޕީ ޓިކެޓް ހަތަރު ވޯޓުގެ ތަފާތުން ހޯއްދެވީ ޔޫނުސް އަލީއެވެ. އޭނާއާ ވާދަކޮށް ނާކާމިޔާބުވެވަޑައިގެންނެވީ މުހައްމަދު ޖަލީލެވެ.
