ގޭންގުތަކާއި ފަނޑިޔާރުންނާ އޮތް ގުޅުން ހެކިތަކާ އެކު ޖުޑީޝަލް ސާވިސް ކޮމިޝަން (ޖޭއެސްސީ) އާ ހިއްސާކޮށްފައިވާނެ ކަމަށް "މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަޙުޤީޤު ކުރާ ކޮމިޝަން"ގެ ރައީސް ހުސްނުއް ސުއޫދު ވިދާޅުވެއްޖެއެވެ.
ގޭންގުތަކުގެ ނުފޫޒު ފަނޑިޔާރުންގެ މައްޗަށް އޮތް ކަމަށް ވިދާޅުވެ، ސުއޫދު ދެއްކެވި ވާހަކަފުޅާ ގުޅިގެން، އެކަން ތަހުގީގު ކުރުމަށް ޖޭއެސްސީން ވަނީ ކޮމެޓީއެއް ހޮއްވަވާފައެވެ. އެ ކޮމެޓީގެ ރައީސަކީ ބަންޑާރަ ނައިބު އިބްރާހިމް ރިއްފަތެވެ.
ޖޭއެސްސީ އުފައްދާފައިވާ ވަގުތީ ކޮމެޓީއަށް ހާޒިރުވެވަޑައިގެން ބަޔާން ދެއްވުމަށްފަހު، "ރާއްޖެއެމްވީ"އަށް ސުއޫދު ވިދާޅުވީ ގޭންގުތަކާއި ފަނޑިޔާރުންނާ އޮތް ގުޅުމާ ގުޅޭ ގޮތުން "އަތުގައި ހުރި، ހުރިހާ މައުލޫމާތެއް" ހިއްސާކޮށްފައިވާނެ ކަމަށެވެ. އޭނާ އެ ކޮމެޓީއަށް ދެއްވި ޕްރެޒެންޓޭޝަނަށް ދެ ގަޑިއިރު ހޭދަވި ކަމަށާއި ކޮމެޓީގެ ބައެއް މެމްބަރުން ކުރެއްވި ސުވާލުތަކަށް ވެސް ޖަވާބު ދެއްވާފައިވާނެ ކަމަށް ސުއޫދު ވިދާޅުވިއެވެ.
ފަނޑިޔާރުންނާއި ގޭންގުތަކާ އޮތް ގުޅުން ސާބިތު ކުރުމަށް އެ ކޮމެޓީއަށް ހެކިތަކެއް ހުށަހަޅުއްވާފައިވާނެ ކަމަށާއި އެގޮތުން އެކި މީހުންގެ ނަންތަކާއި އެހެނިގެން ހެކިތައް ވެސް ހުށަހަޅާފައިވާނެ ކަމަށް ފަނޑިޔާރުކަން ވެސް ކުރެއްވި މަޝްހޫރު ގާނޫނީ ވަކީލު ސުއޫދު ވިދާޅުވިއެވެ.
"އަޅުގަނޑަށް ސާބިތުވޭ ގޭންގުތަކާއި ފަނޑިޔާރުންނާ ގުޅުން އޮތް ކަމަށް. އަޅުގަނޑަށް ޔަގީން އެ ބޭފުޅުން ވެސް ތަހުގީގު ކުރައްވާނެ އެކަމުގެ ކަންކަން ހިނގާފައިވާ ގޮތުން. އެބޭފުޅުންނަށް އިނގޭނީ ތަހުގީގަށް އެކަން ސާބިތުވޭތޯ،" ބަންޑާރަ ނައިބުކަން ވެސް ކުރެއްވި ސުއޫދު ވިދާޅުވިއެވެ.
މިދިޔަ އަހަރުގެ ޑިސެމްބަރު 30 ވަނަ ދުވަހު ރައީސް އޮފީސްގައި ބޭއްވި ޕްރެސް ކޮންފަރެންސެއްގައި ސުއޫދު ވިދާޅުވީ ކްރިމިނަލް ކޯޓަށް ފަނޑިޔާރުން އައްޔަން ކުރުމަށް ބައެއް ގޭންގުތަކަށް ކޯޓާއެއް ލިބިފައިވާ ކަމަށެވެ. ގޭންގުތަކުގެ ނުފޫޒު ފަނޑިޔާރުންގެ މައްޗަށް އެބަ އޮތް ކަމަށާއި އެކަމުގައި ކްރިމިނަލް ކޯޓުގެ މުވައްޒަފުންގެ ބައިވެރިވުން ވެސް އޮތް ކަމަށް ސުއޫދު ވިދާޅުވެފައި ވެއެވެ.
