ގްރީންގައި މަޑުކުރަން ސުޒޭން ނިންމައިފި
17 ޖެނުއަރީ 2019 | ބުރާސްފަތި 11:29ގްރީންގައި މަޑުކުރަން ސުޒޭން ނިންމީ އެއް އަހަރަށް
ގްރީންގެ ކޯޗު ސުޒޭން
ކްލަބް ގްރީން ސްޓްރީޓްގައި މަޑުކުރަން މަޝްހޫރު ކޯޗު އަލީ ސުޒޭން ނިންމައިފިއެވެ.
ރާއްޖެއެމްވީއަށް މައުލޫމާތު ދެމުން ސުޒޭން ބުނީ، ގްރީންއާ އެކު ކުރެވުނު މަޝްވަރާ އަށް ފަހު އެ ކްލަބުގައި މަޑުކުރަން ނިންމާފައިވާ ކަމަށާއި، މިގޮތަށް ނިންމީ މިދިޔަ ސީޒަން ވެސް އުނދަގޫ ހާލަތެއްގައި އޮއްވާ ކްލަބުން ދިން އެއްބާރުލުމާ އެކުގައި ކަމަށެވެ.
ގްރީންގައި ސުޒޭން މަޑުކުރަން ނިންމާފައިވާއިރު، އޭނާއަކީ މިއަހަރުގެ ޖޫން މަހު ފަށާ ދިވެހި ފުޓުބޯޅަ ސީޒަނުގައި ކޯޗުކޮށްދޭނެކަން ކްލަބެއް ނިންމި ފުރަތަމަ ކޯޗެވެ.
ފުރަތަމަ ޑިވިޝަންގެ ކްލަބްތަކުގެ ތެރެއިން ޓީސީ ސްޕޯޓްސް ކްލަބްގެ ކޯޗުކަމުގައި ދެމި ނުހުންނާނެކަން މުހައްމަދު ނިޒާމް (ނިޒާމްބެ) އިއުލާންކޮށްފައިވާއިރު، މާޒިޔާ ސްޕޯޓްސް އެންޑް ރެކްރިއޭޝަންގެ ކޯޗުކަމުގައި އިސްމާއިލް މަހުފޫޒް (އިންމަ) މަޑުކުރާނެކަން އަދި ކަށަވަރެއް ނުވެއެވެ.
ކޯޗިން ކެރިޔަރު 2002 ވަނަ އަހަރު ވިކްޓަރީގެ ބެންޗުން ފެށި ސުޒޭން ވަނީ ވިކްޓްރީގެ އެސިސްޓެންޓް ކޯޗެއްގެ ގޮތުގައި އަދި ހެޑް ކޯޗެއްގެ ގޮތުގައި ވެސް މަސައްކަތް ކޮށްފައެވެ. އޭނާ ވަނީ ވިކްޓަރީއާ އެކު ގިނަ ކާމިޔާބީތަކެއް ހޯދާފައެވެ. ވިކްޓަރީގެ ކޯޗުކަމުން 2012 ވަނަ އަހަރު އިސްތިއުފާ ދިނުމަށް ފަހު ސުޒޭން 2013 ވަނަ އަހަރު މަސައްކަތްކުރީ އެފްއޭއެމްގެ ޑިރެކްޓާ އޮފް ނޭޝަނަލް ޓީމްސްގެ މަގާމުގައެވެ.
އެ އަށް ފަހު ދެން އަނެއްކާ 2014 ވަނަ އަހަރު މާޒިޔާގެ ކޯޗުކަމާ އޭނާ ވަނީ ހަވާލުވެފައެވެ. އެގޮތުން އޭނާ ވަނީ މިދިޔަ އަހަރު މާޒިޔާ އަށް 2016 ވަނަ އަހަރު އުރީދޫ ދިވެހި ޕްރިމިއާ ލީގާއި، ޗެރިޓީ ޝީލްޑުގެ އިތުރުން 2014 ވަނަ އަހަރުގެ އެފްއޭ ކަޕް އަދި 2015 ވަނަ އަހަރުގެ ޕްރެޒިޑެންޓްސް ކަޕް ކާމިޔާބު ކޮށްދީފައެވެ.
