ފަތުރުވެރިކަން ކުރިއެރުވުމަށް ގަން އެއާޕޯޓު ތަރައްގީ ކުރަން ޖެހޭ: ނަޝީދު
17 ޖެނުއަރީ 2019 | ބުރާސްފަތި 01:44ވެލާނާ އެއާޕޯޓު ތަރައްގީ ކުރެވެން ނެތް
ކުރީގެ ރައީސް މުހައްމަދު ނަޝީދު
ފަތުރުވެރިކަން ކުރިއެރުވުމަށް ގަން އިންޓަނޭޝަނަލް އެއާޕޯޓު ތަރައްގީކުރަން ޖެހޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީ ޕްރައިމަރީގައި ހިތަދޫ އުތުރު ދާއިރާއަށް ވާދަކުރައްވާ މުހައްމަދު އަސްލަމްގެ ކެމްޕޭނު ފެށުމުގެ ރަސްމިއްޔާތުގައި ނަޝީދު ވިދާޅުވީ ވެލާނާ އިންޓަނޭޝަނަލް އެއާޕޯޓް ހަލާކުކޮށްލާފައިވާ ކަމަށާއި، އެއާޕޯޓު އިތުރަށް ތަރައްގީ ކުރެވެން ނެތް ކަމަށެވެ.
ނަޝީދު ވިދާޅުވީ ކުރިއަށް އޮތް ހަތަރު އަހަރަށް ވިސްނާއިރު، އިތުރު އެނދުތަކެއް އުފެއްދި ނަމަވެސް ރާއްޖެއަށް އިތުރު ފަތުރުވެރިންނަށް އާދެވެން ނެތް ކަމަށެވެ. އަދި ވިދާޅުވީ އެއާޕޯޓް ފުލްވެ ޖާގަ ނެތް ކަމަށެވެ.
"އާދެވެން އޮތީ އެންމެ ދޮރަކުން އެއީ ގަމުން. އަޅުގަނޑުމެންނަށް ދިވެހިރާއްޖޭގެ ޓޫރިޒަމް ދެން މިހާރު މިއޮތް މިންވަރަށް ވުރެ އިތުރު ކުރުމަށް ކުރިއަށް މިއޮތް ހަތަރު އަހަރުގައި ބޭނުން ކުރެވޭކަށް ނެތް، ހުޅުލެ އެއާޕޯޓު (ވެލާނާ އިންޓަނޭޝަނަލް އެއާޕޯޓް). އެއާޕޯޓަށް މިހާރު އެޖައްސާ މިލިއަނެއް، ދޮޅު މިލިއަނެއްހާ މީހުންނަށް ވުރެ ގިނައިން އެތަނަކަށް ނެތް މަތިންދާ ބޯޓު ޖެއްސޭކަށް" ނަޝީދު ވިދާޅުވިއެވެ.
ނަޝީދު ވިދާޅުވީ މިހާރު ދިވެހިންނަށް އޮތް ފުރުސަތަކީ ގަން އެއާޕޯޓު ތަރައްގީ ކުރުން ކަމަށާއި، ހުޅުލެ އެއާޕޯޓު ނިމެންދެން މަޑުކުރަން ނުޖެހޭ ކަމަށެވެ.
"ހުޅުލެ އެއާޕޯޓް ނިމެންދެން ނުވަތަ އޭގެ ކަންތައްތައް ވާގޮތެއް ބަލަންދެން ތިބުމެއް ނޫން. ގަން އެއާޕޯޓު މިއަދު ވެސް ތަރައްގީ ކުރުން. އަދި އެއާޕޯޓު ތަރައްގީ ކޮށްގެން ހުވަދު އަތޮޅަށް ވެސް މުލަކަށް ވެސް ޚިދުމަތް ދިނުން. ޓުއަރިސްޓުންގެ ޚިދުމަތް ދިނުން،" ނަޝީދު ވިދާޅުވިއެވެ.
އައްޑޫ ސިޓީގެ ތަރައްގީއަށް އަލިއަޅުއްވާލައްވަމުން ނަޝީދު ވިދާޅުވީ ރާއްޖޭގެ ގައުމީ އުފެއްދުންތެރިކަމުގެ 30 އިންސައްތަ ހިއްސާ ވަނީ އައްޑޫގައި ކަމަށާއި، އައްޑޫގައި ދިރިއުޅޭ މީހުންގެ އާބާދީ 60 ހާސް މީހުންނަށް ބަދަލު ކުރާނެ ކަމަށެވެ.
އައްޑޫގެ ތަރައްގީއަށް ގިނަ މަޝްރޫއުތައް ހިންގާނެ ކަމަށާއި، އެތަކެއް ވަޒީފާއެއް އުފައްދާ ދޭނެ ކަމަށް ނަޝީދު ވިދާޅުވި އެވެ.
