ރައްޔިތުން މަޖިލިސް އިންތިހާބުގެ ކަންކަން ކުރިޔަށް ގެންދިޔުމަށް ޖޭޕީން ކޮމެޓީއެއް ކަނޑައަޅައިފި
އެކުލަވާލާފައިވަނީ ހަތް މެމްބަރުންގެ ކޮމެޓީއެއް
ޖޭޕީން ބޭއްވި އެ ޕާޓީގެ ކައުންސިލް ބައްދަލުވުމުގެ ތެރެއިން
މި އަހަރުގެ އޭޕްރިލް ހަވަނަ ދުވަހު އޮންނަ ރައްޔިތުންގެ މަޖިލިސް އިންތިހާބުގެ ކަންކަން ކުރިއަށް ގެންދިޔުމަށް ޖުމްހޫރީ ޕާޓީން ހަތް މެމްބަރުންގެ ކޮމެޓީއެއް ކަނޑައަޅައިފިއެވެ.
ޖުމްހޫރީ ޕާޓީގެ 126 ވަނަ ކައުންސިލް ބައްދަލުވުމުގައި އެ ކޮމެޓީގެ ރައީސްއަކަށް ހޮވިފައިވަނީ ޖޭޕީގެ ރައީސް އަލީ ވަހީދުއެވެ. އަދި ނައިބު ރައީސްއަކަށް ހޮވިފައިވަނީ ޖޭޕީގެ ކައުންސިލް މެމްބަރު އަހްމަދު އުމަރުއެވެ.
ރައްޔިތުންގެ މަޖިލީހުގެ އިންތިހާބުގައި މަޖިލީހުގެ 87 ގޮނޑިއަށް ވާދަ ކުރަން ޖޭޕީން ނިންމާފައި ނުވާ ކަމަށާއި އެ ޕާޓީން ފުރުސަތު ހުޅުވާލީ ޝައުގުވެރިކަން ހުރި ދާއިރާތައް ބެލުމަށް ކަމަށް ޖޭޕީން ވަނީ މިދިޔަ އަހަރުގެ ޑިސެމްބަރު މަހު ބުނެފައެވެ. މަޖިލީހުގެ އިންތިހާބުގައި ވާދަ ކުރަން ޝައުގުވެރިވާ ފަރާތްތައް ބެލުމަށްފަހު، ޕާޓީގެ ފަރާތުން ދާއިރާތަކަށް ނުކުންނާނެ މީހުން ކޮމެޓީއަކުން ކަނޑައަޅާނެ ކަމަށް ވެސް ޖޭޕީން ބުންޏެވެ. މަޖިލިސް އިންތިޚާބުގައި ވާދަކުރުމަށް އެ ޕާޓީން ޓިކެޓް ދޭނީ އެ ކޮމެޓީގެ މަޝްވަރާއާއެކު މި މަހުގެ 25 ގެ ކުރިން އެކަމަށް އެދި ކުރިމަތިލާ މީހުންގެ ތެރެއިންނެވެ.
ޖުމްހޫރީ ޕާޓީއަށް ބަދުބަސް ނުބުނުމަށް ކޯލިޝަންގައި ހިމެނިވަޑައިގަންނަވާ ކުރީ ރައީސް ނަޝީދު ވަނީ ގޮވާލައްވާފައެވެ. އަދި އެ ޕާޓީއަށާއި، އެ ޕާޓީގެ ބޭފުޅުންނަށް ބަދަބަސް ބުނެގެން ކެމްޕޭނު ކުރުމުގެ ބޭނުމެއް ނެތް ކަމަށް އެމަނިކުފާނު ވަނީ ވިދާޅުވެފައެވެ.
