ޔުނައިޓެޑުގެ ކޯޗުކަމަށް ސައުތު ގޭޓް ގެންނަނީ
އިނގިރޭސި ގައުމީ ޓީމާއެކު ސައުތުގޭޓް ހަދާފައިވާ އެއްބަސްވުން ހަމަވާނީ 2022 ގައި
އިނގިރޭސި ގައުމީ ޓީމުގެ ކޯޗު ސައުތު ގޭޓް
މެންޗެސްޓާ ޔުނައިޓެޑުގެ ކޯޗުކަމަށް އިނގިރޭސި ގައުމީ ޓީމުގެ ކޯޗު ގެރެތު ސައުތު ގޭޓް ގެންނަން އުޅޭކަމަށް ރިޕޯޓްތައް ބުނެފިއެވެ.
ޓެލެގްރާފްއިން ބުނީ، ސައުތުގޭޓްގެ ނަން ޔުނައިޓެޑުގެ ކޯޗުކަމަށް ޝޯޓް ލިސްޓްކޮށްފައިވާ ކަމަށާއި، އޭނާއާއެކު އެއްބަސްވުމަކަށް އައުމަށް އެ ކްލަބުން މަސައްކަތް ކުރަމުން އަންނަ ކަމަށެވެ.
ނަމަވެސް ބައެއް ރިޕޯޓްތައް ބުނާގޮތުން ސައުތުގޭޓް ގެންނަން ޔުނައިޓެޑުން މަސައްކަތް ކުރަނީ، އެ ކްލަބުން އެންމެ ބޮޑަށް ހޯދުމަށް މަސައްކަތް ކުރަމުން އަންނަ ޓޮޓެންހަމް ހޮޓްސްޕާގެ ކޯޗު މައުރީސިއޯ ޕޮޗެޓީނޯ ނުލިބިއްޖެ ދަނޑިވަޅެއްގައެވެ.
އެގޮތުން ޓޮޓެންހަމް ދޫކޮށްލުމަށްފަހު ޕޮޗެޓީނޯ ޔުނައިޓެޑުގެ ކޯޗުކަމާ ހަވާލުވެދާނެތޯ ގިނަ ބަޔަކު އަންނަނީ ސުވާލު އުފައްދަމުންނެވެ. އަދި ބައެއް ރިޕޯޓްތައް ބުނާގޮތުން ޕޮޗެޓީނޯ މި ސީޒަނަށްފަހު ޔުނައިޓެޑުގެ ކޯޗުކަމާ ހަވާލުވާނެއެވެ.
ޓޮޓެންހަމްއާއެކު ޕޮޗެޓީނޯ ހަދާފައިވާ އެއްބަސްވުން 2023 ވަނަ އަހަރު ހަމަވާއިރު، އިނގިރޭސި ގައުމީ ޓީމާއެކު ސައުތުގޭޓް ހަދާފައިވާ އެއްބަސްވުން ހަމަވާނީ 2022 ވަނަ އަހަރުގެ ފީފާ ވޯލްޑް ކަޕަށްފަހުއެވެ.
ޔުނައިޓެޑަށް ކޯޗަކު ހޯދުމަށް މަސައްކަތް ކުރަމުން އަންނަނީ އެ ކްލަބުގެ ދާއިމީ ކޯޗު ހޯޒޭ މޮރީނިއޯ ދާދި ފަހުން ވަކިކޮށް، ވަގުތީ ކޯޗަކަށް އޮލް ގަނާ ސޮލްޝާ ހަމަޖެއްސުމަށްފަހުއެވެ.
ޔުނައިޓެޑުން ވަނީ މި ސީޒަނުގެ ނިޔަލަށް އެ ކްލަބުގެ ކޯޗުކަމަށް ސޮލްޝާ ހަމަޖައްސާފައެވެ. އެގޮތުން އޭނާގެ އިރުޝާދުގެ ދަށުން ޔުނައިޓެޑު އަންނަނީ ރަނގަޅު ނަތީޖާތަކެއްވެސް ހޯދަމުންނެވެ.
