ބޮޑުތަފާތަކުން ކްރިސްޓަލް ޕެލަސް އަތުން ބަލިވެ ހަލް ސިޓީ ޕްރިމިއާ ލީގުން ރެލިގޭޓްވެއްޖެއެވެ.
އާދީއްތަ ދުވަހު ހަވީރު ކުޅުނު މި މެޗުން ކްރިސްޓަލް ޕެލަސް މޮޅުވީ ހަލް ސިޓީއާ ވާދަކޮށް 0-4 ގެ ތަފާތުބޮޑު ނަތީޖާއަކުންނެވެ.
ކްރިސްޓަލް ޕެލަސްގެ ދަނޑުގައި ކުޅުނު މި މެޗު ފެށިގެން ތިން ވަނަ މިނެޓުގައި އެޓީމުން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ޒާހާއެވެ. މި ލަނޑަށްފަހުވެސް ކްރިސްޓަލް ޕެލަސް އިން ދިޔައީ ހަލް ސިޓީގެ ހާފަށް ބާރުބޮޑުކުރަމުންނެވެ.
15 - Christian Benteke has scored 15 PL goals this season; the most since 2012-13, his debut campaign in English football (19). Mojo.
— OptaJoe (@OptaJoe) May 14, 2017
އެގޮތުން 34 ވަނަ މިނެޓުގައި އެޓީމުން ވަނީ މެޗުގެ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ބެންޓެކޭއެވެ. މި ލަނޑަކީ މި ސީޒަނުގެ ޕްރިމިއާ ލީގުގައި އޭނާ ކާމިޔާބުކުރި 15 ވަނަ ލަނޑެވެ.
މި ލަނޑުތަކާއެކު ފުރަތަމަ ހާފް ނިމުނީ 0-2 ގެ ނަތީޖާއިން ހަލް ސިޓީގެ މައްޗަށް ކްރިސްޓަލް ޕެލަސް ކުރީގައި އޮވެގެންނެވެ.
ދެވަނަ ހާފް ފެށިގެންވެސް މޮޅަށް ކުޅެފައިވަނީ ކްރިސްޓަލް ޕެލަސް އިންނެވެ. އެހެންނަމަވެސް ދެވަނަ ހާފްގައި ހަލް ސިޓީން ވަނީ ފަހަތަށްޖެހި މޮޅު ޑިފެންސެއްކޮށްފައެވެ.
އެހެންނަމަވެސް 85 ވަނަ މިނެޓުގައި ކްރިސްޓަލް ޕެލަސްއިން ވަނީ އެޓީމުގެ ތިންވަނަ ލަނޑު ޖަހާފައެވެ. މި ލަނޑު އެޓީމަށް ކާމިޔާބުކޮށްދިނީ މިލިވޮޖެވިކެވެ. އޭގެ ފަސް މިނެޓުފަހުން އާންހޮލްޓް ވަނީ އެޓީމުގެ ހަތަރުވަނަ ލަނޑު ކާމިޔާބުކޮށްފައެވެ.
މި ނަތީޖާއާއެކު ކްރިސްޓަލް ޕެލަސް އޮތީ ކުޅުނު 37 މެޗުން ލިބުނު 41 ޕޮއިންޓާއެކު ޕޮއިންޓް ތާވަލުގެ 13 ވަނައިގައެވެ. މެޗުން ބަލިވި ހަލް ސިޓީ އޮތީ ކުޅުނު 37 މެޗުން ލިބުނު 34 ޕޮއިންޓާއެކު ޕޮއިންޓް ތާވަލުގެ 18 ވަނައިގައެވެ. މިއާއެކު ހަލް ސިޓީ ވަނީ ޕްރިމިއާ ލީގުން ވަކިވާން ޖެހިފައެވެ. އެގޮތުން އެޓީމު ކުރިޔަށް އޮތް ސީޒަނުގައި ކުޅޭނީ ޗެމްޕިއަންޝިޕް އެވެ.
