ރިސޯޓެއްގައި ހިންގި މާރާމާރީއެއްގައި ލަންކާ މީހަކު މަރާލާއިފި
10 ޖެނުއަރީ 2019 | ބުރާސްފަތި 19:19މާރާމާރީ ހިންގީ ލަންކާ ދެ މީހުން
އދ. އެއްލައިދޫ ރިސޯޓު
އދ. އެއްލައިދޫ ރިސޯޓްގައި ލަންކާ ދެ މީހެއްގެ ދެމެދުގައި ހިންގި މާރާމާރީއެއްގައި އެކަކު މަރާލައިފިއެވެ.
މަރުވެފައި ވަނީ ލަންކާ ފިރިހެނެކެވެ. ފުލުހުން ބުނީ އެ މާރާމާރީގެ ރިޕޯޓް ލިބިފައި ވަނީ ބުރާސްފަތި ދުވަހުގެ ރޭ 9:50 ހާއިރު ކަމަށެވެ. މާރާމާރީއާ ގުޅިގެން ފުލުހުންގެ ޓީމެެއް ވަނީ އެ ރިސޯޓަށް ގޮސްފައެވެ. މައްސަލައާ ގުޅޭ ހެކިތައް ހޯދުމުގެ މަސައްކަތް ފުލުހުން ދަނީ ކުރަމުންނެވެ.
ބިދޭސީ މީހާގެ މަރާ ގުޅިގެން އދ. މަހިބަދޫގައި ހުންނަ އެ އަތޮޅު ހޮސްޕިޓަލްގެ ޑޮކްޓަރަކާއި ނަރުހަކު ފުލުހުންނާ އެކު އެއްލައިދޫ ރިސޯޓަށް ވަނީ ގޮސްފައެވެ.
އދ. އަތޮޅު މަހިބަދޫ ހޮސްޕިޓަލް ހިންގެވުމާ ހަވާލުވެ ހުންނެވި ސުހާނާ އާދަމް "ރާއްޖެއެމްވީ"އަށް ވިދާޅުވީ މަރުވި މީހާގެ ހަށިގަނޑު ބެލުމަށްޓަކާ މާލެއިން ފުލުހުންގެ ޓީމެއް އެ އެ ރިސޯޓަށް ދަތުރު ކުރަމުންދާތީ ކަމަށާއި އޭނާގެ ހަށިގަނޑު ބެލުމުގެ ފުރުސަތު ޑޮކްޓަރުންނަށް އަދި ނުލިބޭ ކަމަށެވެ.
މާރާމާރީގެ އެ މައްސަލައާ ގުޅިގެން މީހަކު ހައްޔަރު ކުރި ކަމެއް ފުލުހުން އަދި ކަށަވަރެއް ނުކޮށްދެއެވެ.
