ހާރިޖީ ސިޔާސަތުގެ އަސާސަކީ ދައުލަތާއި ރައްޔިތުންގެ މަސްލަހަތު ހިމާޔަތް ކުރުން: މިނިސްޓަރު ޝާހިދު
9 ޖެނުއަރީ 2019 | ބުދަ 14:44ޚާރިޖީ ސިޔާސަތު އަމާޒުވެފައި އޮތީ ދިވެހި ދައުލަތުގެ އެންމެ މަތީ މަސްލަހަތުތައް ޙިމާޔަތްކުރުމަށް ކަމަށް ވިދާޅުވި
ފޮރިން މިނިސްޓަރ އަބްދުﷲ ޝާހިދު
ރައީސް އިބްރާހިމް މުހައްމަދު ސާލިޙްގެ ސަރުކާރުގެ ޚާރިޖީ ސިޔާސަތުގެ އެންމެ މައިގަނޑު އަސާސަކީ ދައުލަތާއި ރައްޔިތުންގެ އެންމެ މަތީ މަސްލަހަތު ހިމާޔަތް ކުރުން ކަމަށް ޚާރިޖީ ވަޒީރު އަބްދުﷲ ޝާހިދު ވިދާޅުވެއްޖެއެވެ. ރާއްޖެއިން އެކި ޤައުމުތަކަށާއި ޖަމިއްޔާތަކަށް ކަނޑައަޅުއްވާ އައު ސަފީރުންނާއި، ސަފީރުންގެ ނައިބުން، އެބޭފުޅުން ޙަވާލުވާ މިޝަންތަކުގެ މަސައްކަތްތަކަށް އަހުލުވެރި ކުރުމަށް ފޮރިންގ މިނިސްޓްރީގައި ބާއްވާ ދެ ދުވަހުގެ ޕްރޮގްރާމް ފައްޓަވައި ދެއްވަމުން ޝާހިދު ވިދާޅުވީ ރާއްޖޭގެ މުޅި ޚާރިޖީ ސިޔާސަތު އަމާޒުވެފައި އޮތީ ދިވެހި ދައުލަތުގެ އެންމެ މަތީ މަސްލަހަތުތައް ޙިމާޔަތް ކުރުމަށް ކަމަށެވެ. މިނިސްޓަރ ވިދާޅުވީ އެއީ ރާއްޖޭގެ މިނިވަންކަމާއި، ރާއްޖޭގެ އިސްތިޤްލާލާއި، ރާއްޖޭގެ ރައްޔިތުންނަށް ފައިދާ ކުރާނެ ގޮތަށް ކަންކުރުންކަމަށެވެ. ރާއްޖޭގެ ޚާރިޖީ ސިޔާސަތު ދެން ބިނާވެގެން ދާނީ ޑިމޮކްރަސީ އާއި އިންސާނީ ހައްޤުތަކާއި ތިމާވެށި ރައްކާތެރިކުރުމަށް ކުރަމުންގެންދާ މަސައްކަތްތަކުގައި އިސްނެގުމުގެ މައްޗަށް ކަމަށް ރައީސް ސާލިޙް ވެރިކަމުގެ ހުވައިކުރެއްވުމަށްފަހު ދެއްކެވި ވާހަކަފުޅުގައި ވިދާޅުވެފައިވާ ކަމާއި، އަދި ހަމައެއާއިއެކު ރާއްޖެއާއި ގާތް ގުޅުމެއް ބާއްވަން ބޭނުންވާ، ބައިނަލްއަޤްވާމީ އުޞޫލުތަކަށް ބޯލަނބާ ހުރިހާ ޤައުމުތަކަކާއިއެކު ރާއްޖެއިން އެކުވެރިކަމުގެ ގުޅުން ބަދަހިކުރަމުން ގެންދާނެކަމަށް ވިދާޅުވިކަން މިނިސްޓަރ ޝާހިދު ފާހަގަކުރެއްވިއެވެ. މީގެ އިތުރުން ޑިޕްލޮމެޓިކް މިޝަންތަކުގައި ތިއްބަވާ ބޭފުޅުން ބޭރުގައި ތިއްބަވަނީ ރައްޔިތުންގެ ޚާދިމުންގެ ގޮތުގައިކަން ހަނދުމަފުޅު ބަހައްޓަވަން ޖެހޭކަމަށް މިނިސްޓަރ ޝާހިދު ވިދާޅުވިއެވެ. އަދި ބޭރުގައި ހުންނަވަނިކޮށް ރައްޔިތަކަށް ކަމެއް ދިމާވެއްޖެނަމަ އެކަމަކަށް ވީހާވެސް ބޮޑަށް އިސްކަން ދެއްވުމަށް މިނިސްޓަރ ސަފީރުންނާއި ސަފީރުންގެ ނައިބުންނަށް އިލްތިމާސްކުރެއްވިއެވެ. ރާއްޖެއިން ބޭރުގައި ދިވެހިންނަށް ދިމާވާ މައްސަލަތަކަށް ހައްލު ހޯދުމުގައި ޚާއްސަ ސަމާލު ކަމެއް މިނިސްޓްރީން ކުރިއަށް އޮތްތަނުގައި ދެއްވާނެ ކަމަށް މިނިސްޓަރ ޝާހިދުގެ އައު އަހަރުގެ މެސެޖްގައި ވެސް ވަނީ ވިދާޅުވެފައެވެ. ރާއްޖެއިން އެކި ޤައުމުތަކަށާއި ޖަމްއިއްޔާތަކަށް ކަނޑައަޅުއްވާ އައު ސަފީރުންނާއި، ސަފީރުންގެ ނައިބުން، އެބޭފުޅުން ޙަވާލުވާ މިޝަންތަކުގެ މަސައްކަތްތަކަށް އަހުލުވެރި ކުރުމަށް ބާއްވާ މި ޕްރޮގްރާމްގައި 16 ބޭފުޅުން ބައިވެރިވެވަޑައިގަންނަވާ ކަމަށް ފޮރިން މިނިސްޓްރީން މައުލޫމާތު ދެއެވެ.
