ޓެކްސީ ޑްރައިވަރުންނަށް އަމާޒުކޮށްގެން ހިންގާ ފަސްޓް އެއިޑް ޓްރެއިނިން ޕްރޮގްރާމް ފަށައިފި
8 ޖެނުއަރީ 2019 | އަންގާރަ 11:43ޓެކްސީ ޑްރައިވަރުންގެ ފަރާތުން ބޮޑު އެއްބާރުލުމެއް ލިބޭ
ހެލްތު މިނިސްޓްރީގެ ޑެޕީއުޓީ ޖެނެރަލް އަހްމަދު ގާސިމް
ޓެކްސީ ޑްރައިވަރުންނަށް އަމާޒުކޮށްގެން ހިންގާ ފަސްޓް އެއިޑް ޓްރެއިނިން ޕްރޮގްރާމް ފަށައިފިއެވެ.
ހެލްތް މިނިސްޓްރީން އިންތިޒާމް ކޮށްގެން ހިންގާ މި ޕްރޮގްރާމް އިފްތިތާހުކޮށްދިނުމުގެ ރަސްމިއްޔާތުގައި ވާހަކަ ދައްވަމުން ހެލްތު މިނިސްޓްރީގެ ޑެޕީއުޓީ ޖެނެރަލް އަހްމަދު ގާސިމް ވިދާޅުވީ، މި ޕްރޮގްރާމްގެ މަގްސަދަކީ އެމެޖެންސީ ނުވަތަ ކުއްލި ގޮތެއްގައި ދިމާވާ ކަންތައްތަކުގައި ބޭނުންވާ ފުރަތަމަ އެހީ ދޭން އަމަލުކުރަން ޖެހޭ އުސޫލު ޓެކްސީ ދުއްވާ ފަރާތްތަކަށް ދަސްކޮށް ދިނުން ކަމަށެވެ.
މި ޕްރޮގްރާމް ފަށާފައި ވަނީ މުޅި ރާއްޖޭގެ ހުރިހާ ޓެކްސީ ޑްރައިވަރުންނަށް އަމާޒުކޮށް ކަމަށާއި، ފުރަތަމަ ޓްރެއިނިން ދޭން ހަމަޖެހިފައިވަނީ މާލެގައި ކަމަށެވެ. އެގޮތުން އެންމެ ފުރަތަމަ ބެޗުގައި 25 ޑްރައިވަރުން ބައިވެރިވާނެ ކަމަށް އޭނާ ވިދާޅުވިއެވެ.
ގިނަ ދުވަސްތަކެއް ވަންދެން ސިއްހީ ދާއިރާގައި މަސައްކަތް ކޮށްފައިވާ ގާސިމް ވިދާޅުވީ، މިފަދަ ޕްރޮގްރާމެއް ފެށުމަކީ ސިއްހީ ދާއިރާ އަށް ލިބިގެން ދާނެ ކުރިއެރުމެއް ކަމަށެވެ.
ޓެކްސީ ޑްރައިވަރުންނަށް ހާއްސަ ކޮށްގެން މި ފަދަ ޕްރޮގްރާމެއް ހިންގުމަކީ މުހިއްމު ކަމެއް ގޮތުގައި ފާހަގަ ކުރައްވާ އޭނާ ވިދާޅުވީ، މިކަމާ ބެހޭ ގޮތުން ޓެކްސީތަކުގެ ޑްރައިވަރުން ވަރަށް ބޮޑަށް ޝައުގުވެރިކަން ހުރި ކަމަށެވެ.
''ޓެކްސީތަކުގެ ވެރިންނާއި އަޅުގަނޑުމެން ބައްދަލުކުރިން. އެ ބޭފުޅުން ވަރަށް ބޮޑަށް މިކަމަށް ޝައުގުވެރިވޭ. އަދި ހަމަ އެހެންމެ މީ ވަރަށް ބޭނުންތެރި ކަމެއްގެ ގޮތުގައި ނިންމާ އަދި ޑްރައިވަރުން ވެސް މި ކަމަށް ޝައުގުވެރިވެރިކަން ހުރިވަރު ވަރަށް ބޮޑަށް ފާހަގަ ކުރެވުނު '' ޓެކްސީ ޑްރައިވަރުން މި ޕްރޮގްރާމަށް ހުރި ޝައުގުވެރިކަން ބަޔާން ކުރައްވަމުން އޭނާ ވިދާޅުވިއެވެ.
ގާސިމް ވިދާޅުވީ، ހެލްތް މިނިސްޓްރީގެ މަގުސަދަކީ ވީހާ ވެސް އަވަސް މުއްދަތެއްގައި ހުރިހާ ޑްރައިވަރުންނަށް މި ޕްރޮގްރާމްގެ ޓްރެއިނިން ދިނުން ކަމަށެވެ. އަދި އެކަން ބާރު ސްޕީޑެއްގައި ކުރަމުންދާނެ ކަމަށެވެ.
ޓެކްސީ ޑްރައިވަރުންނަށް ހާއްސަކޮށްގެން ހިންގާ ޕްރޮގްރާމްގައި ކިޔަވައިދެނީ ދިވެހި ރެޑް ކްރެސެންޓުންނެވެ.
