އަންވަރާއި އިމްރާން ބައްދަލު ކުރައްވައިފި
7 ޖެނުއަރީ 2019 | ހޯމަ 06:51ބައްދަލުވުމުގައި ދެބޭފުޅުން ވަނީ ގިނަ ކަންތައްތަކާއި ބޭހޭ ގޮތުން މަޝްވަރާ ކުރައްވާފައި
އަންވަރާއި އިމްރާން ބޭއްވި ބައްދަލުވުމުގެ ތެރެއިން
އަދާލަތު ޕަޓީގެ ރައީސް އަދި ހޯމް މިނިސްޓަރު ޝައިހް އިމްރާން އަބްދުﷲ މެލޭޝިޔާގެ ޕަރްތީ ކެޑަލިއަން ރަކްޔަޓް (ޕީކޭއާރް) ޕާޓީގެ ރައީސް އަންވަރު އިބްރާހީމްއާ ބައްދަލު ކުރައްވަފިއެވެ.
އަމިއްލަ ދަތުރުފުޅެއްގައި މެލޭޝިޔާ އަށް ވަޑައިގެން އުޅުއްވާ ޝައިހް އިމްރާން، އަންވަރާ ބައްދަލު ކުރައްވާފައިވަނީ ހޯމަ ދުވަހުގެ ވަގުތެއްގައި ކަމަށް އަދާލަތު ޕާޓީން މައުލޫމާތު ދެއެވެ.
އަންވަރުގެ ގެ ކޮޅުގައި ބޭއްވި މި ބައްދަލުވުމުގައި ރާއްޖެއިން މެލޭޝިއާ އަށް ކުރިން ކަނޑަޅުއްވާފައިވާ ސަފީރު މުހައްމަދު ޒަކީވެސް ބައިވެރިވެ ވަޑައިގެންނެވިއެވެ.
މި ބައްދަލުވުމުގައި އިސްލާމީ ހަރަކާތްތަކަށް ކުރިމަތިވެފައިވާ ޑިމޮކްރެޓިކް ގޮންޖެހުންތަކާ ގުޅޭގޮތުން ދެ ބޭފުޅުން ވަނީ މަޝްވަރާކުރައްވާފައެވެ.
ޝޭހް އިމްރާން އަންވަރާއި ބައްދަލު ކުރައްވަނީ
މީގެ އިތުރުން މިހާރު ސަރުކާރު ހިންގަމުންދާ ޕީކޭއަރް އިން އަދާލަތު ޕާޓީގެ މަންފާއަށްޓަކައި ގުޅިގެން މަސައްކަތްކުރުމުގެ މައްޗަށްވެސް މަޝްވަރާ ކޮށްފައިވާ ކަމަށް އަދާލަތުން މައުލޫމާތުދެއެވެ. އަދި ޕީކޭއާރްގެ ކޮންގްރެސް ގައި ބައިވެރި ވުމަށް އަދާލަތު ޕާޓީއަށް އަންވަރު ވަނީ ދައުވަތު އަރުވާފައެވެ.
މި ބައްދަލުވުމުގައި ދެ ޕާޓީގެ މެދުގައި އަޙްވަންތަކަމުގެ ގުޅުމެއް އޮތުމަށް އަންވަރު ވަނީ އެދިވަޑައިގަންނަވާފައެވެ. އަދި ޝައިހް އިމްރާންއާ ބައްދަލު ކުރެއްވުމަކީ އެ މަނިކުފާނަށް ލިބިވަޑައިގެންނެވި އުފަލެއް ކަމަށްވެސް އަންވަރު ވަނީ ވިދާޅުވެފައެވެ.
ދިވެހިރާއްޖެއާ ދިވެހި ރައްޔިތުން އިސްލާހުގެ މަގުގައި ހޯދަމުންދާ ކާމިޔާބީތައް ފާހަނގަ ކުރައްވާ އިތުރު ކާމިޔާބީތަކަށް އަންވަރު ވަނީ އެދިވަޑައިގެންފައެވެ.
ގިނަ ދުވަސްތަކެއް ވަންދެން ޖަލުގައި ހައްޔަރު ކޮށްފައިވާ އަންވަރު މިނިވަންވެފައި ވަނީ ބޮޑުވަޒީރުކަމަށް މަހާތިރް ބިން މުހައްމަދު އައްޔަން ކުރި ހިސާބުންނެވެ. އަންވަރު ވަނީ މެލޭޝިއާގެ ޑެޕީއުޓީ ޕްރައިމް މިނިސްޓަރުގެ މަގާމުވެސް އަދާކުރައްވާފައެވެ.
