ސްކޫލްތައް ދިރާސީ އާ އަހަރަށް ތައްޔާރުވުމުގައި އަވަދިނެތި
6 ޖެނުއަރީ 2019 | އާދީއްތަ 17:52ރާއްޖޭގެ ހުރިހާ ސްކޫލްތަކަކުންވެސް ދަނީ ވަރަށް ބޮޑެތި ތައްޔާރީތަށް ވަމުން
ސްކޫލެއްގެ ދަރިވަރުންތަކެއް
ދިރާސީ އާ އަހަރު ސްކޫލްތައް ތައްޔާރުވެފައިވާކަމަށް އެޑިއުކޭޝަން މިނިސްޓްރީން ބުނެފިއެވެ.
އާ އަހަރުގެ ކިޔެވުން ފެށެން ކުޑަ ދުވަސްކޮޅަކަށް ވެފައިވާއިރު ރާއްޖޭގެ ހުރިހާ ސްކޫލްތަކަކުންވެސް ދަނީ ދިރާސީ އާ އަހަރަށް ވަރަށް ބޮޑަތި ތައްޔާރީތަށް ވަމުންނެވެ. އެގޮތުން ކިޔެވުން ފެށެންވާއިރަށް މަރާމާތާއި އިމާރާތް ކުރުމުގެ މަސައްކަތް ބައެއް ސްކޫލްތަކުގައި ފަށައިގެން ކުރިއަށްދާއިރު ބައެއް ސްކޫލްތަކުން މިހާރު ވަނީ މިފަދަ މަސައްކަތްތައް ނިންމާފައެވެ.
ދިރާސީ އާ އަހަރަށް ޖަމާލުއްދީން ސްކޫލުން ވެފައިވާ ތައްޔާރީތަކާއި ބެހޭގޮތުން ވާހަކަ ދައްކަވަމުން އެސްކޫލްގެ ޕްރިންސިޕަލް ހަސަން މުހައްމަދު ވިދާޅުވީ، އެސްކޫލުގައި މިދިޔަ އަހަރެކޭ އެއްގޮތަށް މިއަހަރުވެސް އައު ތިން ކުލާސްރޫމް އިމާރާތް ކޮށްފައިވާ ކަމަށާއި ސްކޫލް ހުޅުވެންވާއިރަށް ކިޔަވައިދެއްވާ ޓީޗަރުންވެސް ހަމަވެފައި ވާކަމަށެވެ.
މީގެ އިތުރުން ކުލާސްރޫމްތަކުގައި ކުލަ ލުމާއި ގޮނޑި، މޭޒު ފަދަ ތަކެތިވެސް މިހާރު މަރާމާތުކޮށްފައި ވާކަމަށް ހަސަން ވިދާޅުވިއެވެ. ހަމަ އެއާއި އެކު މިއަހަރަށް ބޭނުންވާ ސްކީމްތަށް ޕްރިންޓްކޮށް ސްކޫލް ހުޅުވޭ ފުރަތަމަ ދުވަހުވެސް ކުދިންނަށް އެއްވެސް ދަތިކަމެއް ނެތި ކިޔެވުމުގެ ފުރުސަތު ތަނަވަސް ކޮށްދިނުމަށްޓަކައި މަސައްކަތް ކުރަމުން ދާކަމަށް އޭނާ ވިދާޅުވިއެވެ.
ހަސަން ވިދާޅުވީ ސްކޫލް ހުޅުވޭދުވަހު ކުދިންގެ ޓެކްސް ފޮތްތަށް ބެލެނިވެރިންނާއި ހަވާލު ކުރެވޭނެ ކަމަށެވެ.
ދިރާސީ އާއަހަރަށް އިމާދުއްދީން ސްކޫލް ވަމުންދާ ތައްޔާރީ ތަކާއި ބެހޭގޮތުން ވާހަކަ ދައްކަވަމުން އެސްކޫލްގެ ޕްރިންސިޕަލް އަހުމަދު މުޖާހިދު ވިދާޅުވީ އެހެން ސްކޫލްތަކެކޭ އެއްފަދައިން އިމާދުއްދީން ސްކޫލުންވެސް ސްކޫލްތަކުގެ ކިޔެވުން ފެށެންވާއިރަށް ބޮޑެތި ތައްޔާރީތަކެއް ވަމުންދާ ކަމަށެވެ. އެގޮތުން ސްކޫލާއި އަދި ކުލާސްރޫމްތަކުގައި ކުލަ ލުމާއި، ސްކޫލްގެ އާބާތުރަ ފިލުވުމުގެ ގޮތުން ކުރަންޖެހޭ ބައެއްކަންތައްތައް ކުރުމާއި، ސްކޫލް ނޯޓިސްބޯޑް ހަރުކުރުމާއި މިފަދަ ކަންތައްތަށް ކުރަމުން ދާކަމަށެވެ. އަދި ދަރިވަރުންގެ ޓެކްސްޓްފޮތްތައްވެސް މިހާރު ސްކޫލުން ދޫކަރަމުންދާކަމަށް އޭނާ ވިދާުވިއެވެ.
މީގެ އިތުރުންވެސް ސްކޫލަށް ބޭނުންވާ އަދަދަށް ޓީޗަރުން ތިއްބެވިކަން ފާހަގަ ކުރައްވާ މުޖާހިދު ވިދާޅުވީ އެ ސްކޫލަކީ އުނގެނުމާއި އުގަންނައިދިނުމަށް ފަހި މާހައުލަކަށް ހެދުމަށްޓަކައި ވަރަށް ބުރަ މަސައްކަތްތަކެއް ކުރަމުންދާ ކަމަށެވެ. 1400 ދަރިވަރުން ތައުލީމް ހާސިލް ކުރަމުންދާ އިމާދުއްދީނު ސްކޫލްގެ ކިޔެވުން ފަށާނީ ދަރިވަރުންނަށް ގިނަގުނަ ކާމިޔާބީތަކެއް ހާސިލް ކޮށްދިނުމުގެ ފޮނި އުއްމީދުގައި ކަމަށްވެސް އޭނާ ވިދާޅުވިއެވެ.
އެޑިއުކޭޝަން މިނިސްޓްރީން ބުނީ އަތޮޅުތެރޭގެ ބައެއް ސްކޫލްތަކުގެ އާބާތުރަ ފިލުވުމުގެ މަސައްކަތް ފަށާފައިވާ ކަމަށާއި ސްކޫލް ހުޅުވެންވާއިރަށް އެ މަސައްކަތްތަށް ނިންމާލެވޭނެ ކަމަށެވެ. ސުކޫލްތަކަށް ބޭނުންވާ ބިދޭސީ ޓީޗަރުން ގިނަ ސްކޫލްތަކަށް ހަމަޖެހިފައިވާއިރު މަދު ސްކޫލަކަށް ބޭނުންވާ ޓީޗަރުންނާއި އިންޓަރވިއު ކުރަމުގެ މަސައްކަތްވެސް ކުރިއަށްދާކަމަށް މިނިސްޓްރީން މައުލޫމާތުދެއެވެ.
އެޑިއުކޭޝަން މިނިސްޓްރީން ބުނީ ހުޅުމާލެ ސްކޫލްގެ އެންމެ ފަހުގެ މަސައްކަތްތަށް ކުރިއަށްދާއިރު އެ ސްކޫލަށް ބޭނުންވާ ފަރުނީޗަރު ފޮނުވާފައި ވާކަމަށެވެ
އެޑިއުކޭޝަނުން ބުނީ ގްރޭޑް 1 ން 7 ކާއި ދެމެދުގެ ގްރޭޑްތަކުގެ ދަރިވަރުންނަށް ބޭނުންވާ ޓެކްސްޓްފޮތްތައް މިހާރު ހުރިހާ ސްކޫލަކަށް ފޮނުވާފައިވާއިރު ގްރޭޑް 8 އާއި 9ގެ ދަރިވަރުންގެ ފޮތްތަށް ޖެނުއަރީމަހުގެ 10 ގެ ކުރިން މިނިސްޓްރީއަށް ލިބޭނެކަމަށާއި ސްކޫލްތަށް ހުޅުވުމުގެ ކުރިން ދަރިވަރުންނަށް ހަވާލު ކުރެވޭނެ ކަމަށެވެ.
ހދ. އަތޮޅުގެ އެޑިއުކެޝަން ސެންޓަރާއި އައްޑޫ ނޫރާނީ ސްކޫލްގައި އަރަބި މީޑިއަމަށް ކިޔަވާކުދިންގެ ފޮތްތަށްވެސް މިމަހުގެ 10 ގެ ކުރިން ފޮނުވޭނެ ކަމަށް މިނިސްޓްރީން ބުނެއެވެ. ހަމައެއާއިއެކު ސަރުކާރުން ދަރިވަރުންނަށް ދޫކުރާ ޓެބްލެޓްތަށް މިހާރު ހުރިހާ ދަރިވަރުންނަށް ދޫކޮށްފައި ވާކަމަށްވެސް އެޑިއުކޭޝަނުން ބުނެއެވެ.
