މި އަހަރުގެ މެދުތެރޭގައި ދަރުމަވަންތަ ހޮސްޕިޓަލް ހުޅުވޭނެ: މިނިސްޓަރ އަމީން
6 ޖެނުއަރީ 2019 | އާދީއްތަ 15:56މެޝިނަރީ އާއި އިކުއިޕްމެންޓްތައް އިންސްޓޯލްކުރުމުގެ މަސައްކަތްތައް ކުރިއަށްދޭ
ހެލްތު މިނިސްޓަރ އަބްދުﷲ އަމީން
ދަރުމަވަންތަ ހޮސްޕިޓަލްގެ މަސައްކަތް ކުރިއަށްދާ ގޮތަށް ބަލާއިރު ޖެނުއަރީމަހުގެ ނިޔަލަށް ހޮސްޕިޓަލްގެ މައިގަނޑު މަސައްކަތްތައް ނިންމާ މި އަހަރުގެ މެދު ތެރޭގައި ހުޅުވިގެން ދާނެ ކަމަށް ހެލްތު މިނިސްޓަރ އަބްދުﷲ އަމީން ވިދާޅުވެއްޖެއެވެ.
ރާއްޖެ އެމްވީއަށް ދެއްވި އިންޓަވިއުއެއްގައި މިނިސްޓަރ އަމީން ވިދާޅުވީ ދަރުމަވަންތަ ހޮސްޕިޓަލުގެ މަސައްކަތްތައް ޕްލޭންގައިވާ ތާވަލަށް ވުރެން ކުޑަ ތަންކޮޅެއް ލަސްވެއްޖެ ކަމަށާއި އެހެންނަމަވެސް މަސައްކަތްތައް ބާރަށް ކުރިއަށް ދާ ކަމަށެވެ. އެ ގޮތުން މެޝިނަރީ އާއި އިކުއިޕްމެންޓްތައް އިންސްޓޯލް ކުރުމުގެ މަސައްކަތް ކުރިއަށް ދާކަމަށާއި އިމާރާތުގައި އިތުރަށް ފުރިހަމަ ކުރަންޖެހޭ ކަންކަން ފުރިހަމަ ކުރުމަށް ފަހު މި އަހަރުގެ މެދު ތެރޭގައި ހޮސްޕިޓަލުން ޚިދުމަތް ދޭން ފަށާނެ ކަމަށެވެ.
ނަމަވެސް ރައީސް އަބްދުﷲ ޔާމީން ސަރުކާރުގެ ހެލްތު މިނިސްޓަރ އަބްދުﷲ ނާޒިމް ކުރިން ވިދާޅުވެފައި ވަނީ ދަރުމަވަންތަ ހޮސްޕިޓަލުގެ 95 ޕަސެންޓް މަސައްކަތް ނިމިފައިވާ ކަމަށާއި 2019 ވަނަ އަހަރުގެ ފެބްރުއަރީ މަހު ހުޅުވަން ތައްޔާރުވެފައިވާ ކަމަށެވެ. އަދި އެއިރު ވެސް ނާޒިމް ވިދާޅުވެފައި ވަނީ އުއްމީދު ކުރި ވަރަށް ވުރެ މަސައްކަތް ލަސްވެފައި ވާކަމަށެވެ.
ދަރުމަވަންތަ ހޮސްޕިޓަލް ހުޅުވިގެންދާއިރު އެތަނުން ލިބެން ހުންނާނެ ޚިދުމަތްތަކުގެ މައްޗަށް އަލިއަޅުވާލައްވާ ވާހަކަ ދައްކަވަމުން މިނިސްޓަރ ވިދާޅުވީ އެ ހޮސްޕިޓަލްގެ ޚިދުމަތްތައް ބައްޓަން ވެފައި ވަނީ ސްޕެޝަލިސްޓުންގެ ޚިދުމަތައް ވެސް ބޮޑަތި ފަސޭހަތަކެއް އަންނާނެ ގޮތްތަކަށް ބަލައިގެން ކަމަށްވާއިރު ބަލިތައް ތަހުލީލު ކުރުމާއި ޚާއްސަ ބަލިތަކަށް ދޭންޖެހޭ ފަރުވާތަކަށް ލިބެން ހުންނާނެ ކަމަށެވެ.
އެހެންކަމުން އައިޖީއެމް ހޮސްޕިޓަލަށް މިހާރު ދިމާވާ ދަތިތަކައް ދަރުމަވަންތަ ހޮސްޕިޓަލް ހުޅުވުމުން އިތުރު ފަސޭހަތަކެއް ލިބުން އެއީ ސަރުކާރުގެ މައިގަނޑު އަމާޒެއް ކަމަށް މިނިސްޓަރ ވިދާޅުވިއެވެ.
"އައިޖީއެމްއެޗް ހޮސްޕިޓަލުގައި ދިމާވާ މައިގަނޑު ދަތިތަކައް ހައްލެއް އަންނާނެ ކަމަށް މި އުއްމީދު ކުރަނީ. އަދި ރާއްޖޭގެ ސީއްޚީ ޚިދުމަތުގެ ވަރަށް މުހިންމު ތަނެއް އައިޖީއެމްއެޗަކީ. އެއަށް ފަހު ދަރުމަވަންތަ ހޮސްޕިޓަލް އެފަދަ ތަނަކަށް ވެގެންދާނީ،" މިނިސްޓަރ ވިދާޅުވިއެވެ.
ސިންގަޕޫރުގެ ޝެންހުއާ ކޮންސްޓްރަކްޝަނާ ހަވާލުކޮށްގެން ޖޫން، 5، 2016 ގައި، މަސައްކަތް ފެށި މި މަޝްރޫއަށް ދައުލަތުގެ ބަޖެޓުން 140 މިލިއަން ޑޮލަރު (2.1 ބިލިއަން ރުފިޔާ) ހޭދަކުރެއެވެ.
