ޕާޓީގެ ޕްރައިމަރީއަށް އެއްވެސް ނުފޫޒެއް ނެތް: އެމްޑީޕީ
6 ޖެނުއަރީ 2019 | އާދީއްތަ 08:16އެމްޑީޕީގެ ޕްރައިމަރީ ބާއްވަން ހަމަޖެހިފައި ވަނީ މި މަހުގެ 18 ވާ ހުކުރު ދުވަހު
މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ
މި މަހު 18 ވަނަ ދުވަހު އޮންނަ އެމްޑީޕީގެ ރައްޔިތުންގެ މަޖިލީހުގެ ޕްރައިމަރީއަކީ އެއްވެސް މީހެއްގެ ނުފޫޒެއް ނެތް ޕްރައިމަރީއަކަށް ވާނެ ކަމުގެ ޔަގީންކަން ދޭ ކަމަށް އެމްޑީޕީން ބުނެފިއެވެ.
އެމްޑީޕީގެ ރައްޔިތުންގެ މަޖިލީހުގެ ޕްރައިމަރީއަށް އެ ޕާޓީން ވަމުންދާ ތައްޔާރިތަކާ ގުޅިގެން ބޭއްވި ނޫސްވެރިންގެ ބައްދަލުވުމުގައި ޕާޓީގެ ސްޕޯކްސްޕާސަން އަދި މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ވިދާޅުވީ ޕްރައިމަރީ އަށް އެއްވެސް މީހެއްގެ ނުފޫޒެއް ނުފޯރާ ކަމަށެވެ.
ޕާޓީގެ ނުފޫޒުގަދަ ބޭފުޅުންތަކެއް ވާދަކުރައްވާތީ އެ ބޭފުޅުންގެ ނުފޫޒު ޕްރައިމަރީއަށް ފޯރުމުގެ ފުރުސަތު އޮވެދާނެތޯ ރާއްޖެޓީވީން ސުވާލުކުރުމުން އިންތި ވިދާޅުވީ އެކަހަލަ ނުފޫޒެއް ފޯރުވާކަމުގެ ޝަކުވާއެއް ވެސް މިހާތަނަށް ލިބިފައިނުވާ ކަމަށެވެ.
"އެ ބޭފުޅުން މި ޕާޓީގެ އެތެރޭގެ ޕްރައިމަރީ އަށް އެއްވެސް ނުފޫޒެއް، އެއްވެސް ނުފޫޒެއް ފޯރުވާފައެއް ނުވޭ. ފޯރުވަމުންނެއް ނުދޭ،" މާފަންނު ހުޅަނގު ދާއިރާގެ އެމްޑީޕީ ޕްރައިމަރީގައި ވާދަކުރައްވާ އިމްތިޔާޒް ޕާޓީގެ ފަރާތުން ވިދާޅުވިއެވެ.
އެމްޑީޕީގެ ރައްޔިތުންގެ މަޖިލީހުގެ ޕްރައިމަރީގައި އެ ޕާޓީގެ ރައީސް އަދި ރާއްޖޭގެ ކުރީގެ ރައީސް މުހައްމަދު ނަޝީދާއި، ޕާޓީގެ ޗެއަރޕާސަން ހަސަން ލަތީފްގެ އިތުރުން އިސް ބައެއް ބޭފުޅުން ވާދަކުރައްވައެވެ.
ރައްޔިތުންގެ މަޖިލީހުގެ އިންތިހާބުގައި އެމްޑީޕީން 86 ދާއިރާއަށް ވާދަކުރެއެވެ. އެއް ދާއިރާއަކަށް އެއްވެސް ކެންޑިޑޭޓަކު ކުރިމަތިލާފައި ނުވާތީ އެ ދާއިރާއިން ރައްޔިތުންގެ މަޖިލީހުގެ އިންތިހާބުގައި އެ ޕާޓީން ވާދައެއް ނުކުރެއެވެ. އެއީ ފ. ނިލަންދޫ ދާއިރާއެވެ.
އެމްޑީޕީގެ ޕްރައިމަރީގައި 86 ދާއިރާއަށް ކެންޑިޑޭޓުން ކުރިމަތިލާފައިވާއިރު، އެ ދާއިރާތަކުގެ ތެރެއިން ނުވަ ދާއިރާއަކަށް އެންމެ ކެންޑިޑޭޓަކު ކުރިމަތިލާފައި ވާތީ ޕްރައިމަރީ ބާއްވާކަށް ނުޖެހެއެވެ. އެހެންވެ އެޕާޓީން ޕްރައިމަރީ ބާއްވަނީ 77 ދާއިރާއަކަށް ކެންޑިޑޭޓުން ހޮވުމަށެވެ.
އެމްޑީޕީގެ ޕްރައިމަރީ ބާއްވަން ހަމަޖެހިފައި ވަނީ މި މަހުގެ 18 ވާ ހުކުރު ދުވަހުއެވެ. ޕްރައިމަރީގައި ވޯޓުލުން އޮންނާނީ މެންދުރު ފަހު 2:30 އިން ރޭގަނޑު 8:00 އަށް ކަމަށް އެޕާޓީން ބުންޏެވެ.
ވޯޓް ފޮށި ބަހައްޓާފައި ހުންނާނީ އެމްޑީޕީގެ ހަރުގެ ހުންނަ ހުރިހާ ރަށެއްގެ ހަރުގޭގައި ކަމަށާއި، ހަރުގެ ނުހުންނަ ރަށްރަށުގައި ވޯޓް ފޮށި ހުންނާނީ އެ ރަށެއްގެ އިޖްތިމާއި މަރުކަޒުގައި ކަމަށް އެމްޑީޕީން ވަނީ ބުނެފައެވެ.
