ކަންބޮޑުވުމަކީ އިސްލާމީ މަރުކަޒާ އިންވެގެން ބެހެއްޓުން
ކަޅުވަކަރު މިސްކިތް ބަހައްޓާ ދިރާގު ބިމުގައި ނައިބު ރައީސާއި ސަރުކާރުގެ ބައެއް ބޭފުޅުން
ނަމާދު ކުރެވޭ ގޮތަށް ކަޅުވަކަރު މިސްކިތް މިހާރު ބަހައްޓަން ނިންމާފައިވާ ތަނާ މެދު ދީނީ އިލްމުވެރިޔާ ޝެއިހް އަލީ ޒައިދު ކަންބޮޑުވުން ފާޅުކުރައްވައިފިއެވެ.
ކަޅުވަކަރު މިސްކިތް ބަހައްޓަން ނިންމާފައި ވަނީ ރާއްޖޭގެ އެންމެ ބޮޑު މިސްކިތް، އިސްލާމީ މަރުކަޒު ކައިރީގައި ހުންނަ ދިރާގު އޮފީސް ކުރިން ހުރި ބިމުގައެވެ. އެ ތަނުގައި އެ މިސްކިތް ބެހެއްޓެވުމަށް ނިންމީ ވަޒީރުންގެ މަޖިލީހުގެ ލަފާގެ މަތިން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއެވެ.
ޝެއިހް ޒައިދު ކުރެއްވި ޓްވީޓެއްގައި ވިދާޅުވީ އިސްލާމީ މަރުކަޒާ އިންވެގެން ނަމާދު ކުރެވޭ ގޮތަށް ކަޅުވަކަރު މިސްކިތް ބެހެއްޓުމީ އެއްވެސް ހާލެއްގައި ރަނގަޅު ކަމެއް ނޫން ކަމަށެވެ. ދެ މިސްކިތުގެ އަޑުގަދަކުރާއިން އުނދަގޫވުމުގެ ސަބަބުން ކަޅުވަކަރު މިސްކިތް މުންކަރާތަކަށް މަގުފަހިވެގެންދާނެ ކަމަށާއި އެ މިސްކިތުގައި ނަމާދު ނުކުރާ ނަމަ އެތަން ހުރުމަކުން މައްސަލައެއް ނެތް ކަމަށް ޒައިދު ކުރެއްވި ޓްވީޓުގައި ވިދާޅުވެފައި ވެއެވެ.
އަޑުގަދަ ކުރާއެއް ބޭނުންނުކޮށް، ކަޅުވަކަރު މިސްކިތުގައި ނަމާދު ކުރެވޭ ގޮތް ހެދުން ކިހިނެއް ވާނެތޯ ޓްވިޓާގައި މީހަކު ސުވާލު ކުރުމުން ޒައިދު ވިދާޅުވެފައި ވަނީ އެ ގޮތް ވެސް ކަމަކު ނުދާނެ ކަމަށެވެ. އިސްލާމީ މަރުކަޒު އިންވެގެން ހުއްޓާ، އެތަނުގައި ތަން އޮއްވާ އެގޮތަށް މިސްކިތެއް ބެހެއްޓުން އެއްގޮތަކަށް ވެސް ކަމަކު ނުދާނެ ކަމަށް ޝެއިހް ވިދާޅުވިއެވެ.
ޝެއިޚް ޒައިދުގެ އިތުރުން ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވެސް ވަނީ ސޯޝަލް މީޑިއާގައި އެކަމާ ދެކޮޅަށް ވާހަކަ ދައްކަވާފައެވެ. ޝެއިޚް ޝަހީމް ވިދާޅުވެފައި ވަނީ ކަޅުވަކަރު މިސްކިތް އަލުން ބެހެއްޓުމަކީ ވަރަށް ރަނގަޅު ކަމެއް ކަމަށާއި ނަމަވެސް ޖަމާއަތުގައި ނަމާދުކުރާ މިސްކިތެއްގެ ދޮރުމަތީގައި އެހެން މިސްކިތެއް ނުބެހެއްޓޭނެ ކަމަށެވެ. ޖަމާއަތުގައި ނަމާދުކުރާ މިސްކިތެއްގެ ދޮރުމަތީގައި ވަކި ޖަމާއަތެއް ހަދައިގެން ނަމާދުކުރާ އިތުރު މިސްކިތެއް އެޅުމާ މެދު ދީނީ އިލްމުވެރިން ބަހުސްކޮށްފައިވާ ކަމަށާއި އަދި އެގޮތަށް މިސްކިތް އެޅުން ކީރިތި ރަސޫލާގެ ހަޔާތްޕުޅުގައި މަނާކުރައްވާފައިވާ ކަމަށް ވެސް ވިދާޅުވެފައި ވެއެވެ.
ކަޅުވަކަރު މިސްކިތް ދިރާގު ކުރިން ހުރި ބިމުގައި ބަހައްޓަން ކުރިން ވާހަކަ ދެކެވުނު ދުވަސްވަރުގައި ވެސް، އިސްލާމީ މަރުކަޒާ ކައިރީގައި އެ މިސްކިތް ބަހައްޓާތީ، ބައެއް އެހެން ފަރާތްތަކުން ވެސް ގެންދަނީ ކަންބޮޑުވުން ފާޅުކުރަމުންނެވެ.
