މާލެ ސިޓީގެ ފަޅުތެރޭގައި އޮޑިފަހަރު އަޅާ އޮޑިވެރިންނަށް ޚާއްސަކޮށްގެން ވޯކްޝޮޕްތަކެއް ކުރިއަށް ގެންދާނެ ކަމަށް މާލެ ސިޓީ ކައުންސިލުން ބުނެފިއެވެ.

އެމްއެންޑީއެފް ކޯސްޓްގާރޑްގެ 39 ވަނަ އަހަރީ ދުވަހާ ގުޅުވައިގެން ވިލިނގިލީގެ ފަޅުތެރެ ސާފުކުރުމަށް ބޭއްވި ހަރަކާތާ ގުޅިގެން ރާއްޖެއެމްވީއަށް ދެއްވި އިންޓަވިއުއެއްގައި މާލެ ސިޓީ ކައުންސިލްގެ މޭޔަރު ޝިފާ މުހައްމަދު ވިދާޅުވީ މާލޭގެ ފަޅުތެރެ ބަލަހައްޓަނީ އެމްޕީއެލުން ކަމަށާއި، މި މަސައްކަތް ކުރާނީ އެ ކުންފުންޏާ ގުޅިގެން ކަމަށެވެ.

މުޅި ރާއްޖެ ސާފުކުރުމުގެ މަޝްރޫއު ފަށާފައިވާއިރު، ގިނަ ބަޔަކު ދިރިއުޅެމުން އަންނަނީ މާލޭގައި ކަމަށާއި، މި މާހައުލު ސާފުކޮށް ބެހެއްޓުމަކީ މުހިންމު ކަމެއް ކަމަށް މޭޔަރު ޝިފާ ވިދާޅުވިއެވެ. އަދި ވިދާޅުވީ ކުނީގެ ސަބަބުން ސިއްހީ ގޮތުން ނޭދެވޭ އަސަރުކުރުވާއިރު، މުދާއި ފަޅު ކުނިން ތަގައްޔަރުވިޔަ ނުދީ ސާފުކޮށް ބޭއްވުމަށް މަސައްކަތް ކުރަންޖެހޭ ކަމަށެވެ. 

"މަލޭ ސިޓީ ވަށައިގެންވާ މޫދަކީ ވެސް ފަތުރުވެރިން ޒިޔާރަތްކޮށް ބަލާލަން ބޭނުންވާތަނެއް. މިސިޓީއަށް ފައިސާ ވައްދާ އިގްތިސާދީ ގޮތުން ކުރިއަށް ގެންދިއުމަށްޓަކައި، ޓުއަރިޒަމް ކުރިއަށް ގެންދިއުމަށް ހަމަ ބޭނުންތެރިކަމެއް މިއީ ފަޅާއި، ކަނޑު ސާފުކޮށް ބޭއްވުން" ޝިފާ މޭޔަރު ވިދާޅުވިއެވެ.

މޭޔަރު ޝިފާ ވިދާޅުވީ މާލޭގެ އެތޭރޭގެ އިތުރުން ކަނޑާއި ފަޅަށް ކުނި އަޅާކަން ފާހަގަކުރެވިފައިވާ ކަމަށާއި، މިކަން ހައްލު ކުރުމަށް ގިނަ މަސައްކަތްތައް ކުރަންޖެހޭ ކަމަށެވެ.

އެގޮތުން ފަޅުގައި ދޯނިފަހަރު އަޅައިގެން ތިބޭ ފަޅުވެރިން ކުނިއެޅުމުގެ ނުރައްކަލާ ބެހޭ ގޮތުން ހޭލުންތެރިކުރުވެއްޖެ ނަމަ ބޮޑު ހައްލެއް ލިބޭނެ ކަމަށާއި، މި މަސައްކަތް ފެށުމުގެ އޮޑިވެރިންނާ އެކު ވޯކްޝޮޕްތަކެއް ބާއްވާނެ ކަމަށް އޭނާ ވިދާޅުވިއެވެ.

"ވޯކްޝޮޕް ބާއްވާނެ ވަކި ތާރީހެއް ފައިނަލްއެއް ނުވޭ. އެކަމަކު އެންމެ މުހިންމު އެއްކަމަކީ މީހުން މިކަމަށް ހޭލުންތެރި ކުރުން. އެހެންވެ މިމަސައްކަތް ކުރުމަށް ވަރަށް އަވަހަށް ވޯކްޝޮޕް ބާއްވާނަން." މޭޔަރު ޝިފާ ވިދާޅުވިއެވެ. 

މޭޔަރު ޝިފާ ވިދާޅުވީ އެދޯންޏަކުން ގެންނަ ކުނި އެ ދޯންޏަކުން ވެމްކޯއާ ގުޅިގެން އުކާލެވޭނެ ކަމަށާއި، ފަސޭހައަށް ފަޅު ތެރެއަށް އެޅުމުން އެކަމުގެ ގެއްލުން މިވެށީގައި ދިރިއުޅޭ ހުރިހާ ރައްޔިތުންނަށް މާބޮޑަށް ކުރާ ކަމަށެވެ.