ޕްރައިމަރީގައި ހަރަކާތްތެރިވާނެ އޮފިޝަލުން ހޯދަން ހުޅުވާލައިފި
4 ޖެނުއަރީ 2019 | ހުކުރު 13:11ފޯމް ހުށަހެޅުމަށް ފަހު ތާރީހަކީ 9 ޖެނުއަރީ
އެމްޑީޕީގެ ހަރުގޭގައި ކުރިއަށް ގެންދިޔަ ބައްދަލުވުމެއް
އެމްޑީޕީގެ ޕްރައިމަރީގައި ހަރަކާތްތެރިވާނެ އޮފިޝަލުންނަށް ފުރުސަތު ހުޅުވާލައިފި އެވެ.
މޯލްޑިވިއަން ޑިމޮކްރޮޓިކް ޕާޓީ (އެމްޑީޕީ) ހުކުރު ދުވަހު ކުރި އިއުލާނުގައި ބުނެފައިވާ ގޮތުން އެކަމަށް އެދޭ ފަރާތްތަކުން 9 ޖެނުއަރީ 2019 ވާ ބުދަ ދުވަހުގެ ހަވީރު 4:00 ގެ ކުރިން އެޕްލިކޭޝަން ހުށަހެޅަންޖެހެ އެވެ.
އޮފިޝަލުން ހޯދުމުގެ އިތުރުން، ޕްރައިމަރީ އޮބްޒާވްކުރާނެ ފަރާތްތަކަށް ވެސް ވަނި ފުރުސަތު ހުޅުވާލައިފަ އެވެ.
އޭޕްރީލް 6 ގައި ބާއްވާ މަޖިލީހުގެ އިންތިޚާބުގައި އެމްޑީޕީގެ ޓިކެޓްގައި ވާދަކުރާނެ ކެންޑިޑޭޓުން ކަނޑައެޅުމުގެ ޕްރައިމަރީ ބޭއްވުމަށް ނިންމާފައި ވަނީ ޖެނުއަރީ 18 ގަ އެވެ. ޕްރައިމަރީގައި 280 މީހުން ވާދަކުރެ އެވެ. ވާދަކުރާނެ ކެންޑިޑޭޓަކު ނެތުމުން 10 މީހަކަށް ވަނީ ޓިކެޓް ކަށަވަރުވެފަ އެވެ.
ޕްރައިމަރީ ނުބާއްވާ ދާއިރާތަކަކީ ހޯރަފުށި ދާއިރާ އާއި ބާރަށު ދާއިރާ އާއި ދިއްދޫ ދާއިރާ އާއި މިލަންދޫ ދާއިރާ އާއި އަލިފުށި ދާއިރާ އާއި މަހިނބަދޫ ދާއިރާ އާއި ފުވައްމުލަށް އުތުރު ދާއިރާގެ އިތުރުން ގަލޮޅު އުތުރު ދާއިރާ އަދި މާފަންނު އުތުރު ދާއިރާއެވެ.
ޕްރައިމަރީއާ ދިމާކޮށް 33،000 އަށް ވުރެ ގިނަ މީހުން އެމްޑީޕީއަށް ވަނުމަށް އެދި ފޯމް ހުށަހަޅާފައިވާ ކަމަށް އެ ޕާޓީ އިން ވަނީ ބުނެފައެވެ. އެމްޑީޕީއާ އަލަށް ގުޅުނު މެމްބަރުންނާއެކު އެމްޑީޕީގެ މެމްބަރުންގެ އަދަދު 81000 އަށް ވުރެ އިތުރު ވެފައިވާއިރު އެ އެންމެނަށް ޕްރައިމަރީގައި ވޯޓް ލެވޭނެ ކަމަށް ވެސް އެ ޕާޓީން ބުނެ އެވެ.
