ރައްޔިތުން އެންމެ އުންމީދުކުރި ކަހަލަ މަޖިލީހެއް ލިބިފައިނުވާ ކަމަށާއި އެކަމަށް އެއްބަސްވެވަޑައިގަންނަވާ ކަމަށް ކުރީގެ ރައީސް ނަޝީދު ވިދާޅުވެއްޖެއެވެ.

ބުދަ ދުވަހުގެ ހަވީރު ހެންވޭރު ދެކުނު ދާއިރާގެ މެމްބަރު މުހައްމަދު އަބްދުލް ކަރީމް (ރުކުމާ)ގެ ކެމްޕެއިން ޖަގަހަ ހުޅުވައިދެއްވަމުން ނަޝީދު ވިދާޅުވީ ރައްޔިތުންގެ މަޖިލިސް އެކުލަވާލުމަށްޓަކައި ރައްޔިތުން މަސައްކަތް ކުރަމުން މި ގެންދަނީ 19 ވަނަ ފަހަރަށް ކަމަށާއި ރައްޔިތުން އެންމެ އުންމީދު ކުރި, އެދޭ މަޖިލީހެއް ލިބިފައިނުވާ ކަމަށެވެ.

"ރައްޔިތުންގެ މަޖިލިސް އެކުލަވާލުމަށް ދިވެހިން މި ދަނީ 19 ވަނަ ފަހަރަށް، މީގެން އެއް ފަހަރު ވެސް ރައްޔިތުން އުންމީދުކުރި އެދޭ، އެންމެ ހިތްހަމަޖެހޭ މަޖިލިސް ރައްޔިތުންނަށް ލިބިފައިނުވާ ކަމަށް އަޅުގަނޑު ވެސް އެއްބަސް. ރައްޔިތުން މަޖިލިސް އިތުރަށް ހަރުދަނާ ކުރުމަށް ކުރާ އުންމީދު އަޅުގަނޑުމެން ނަގާލައިގެން ނުވާނެ، އަޅުގަނޑުމެންނަށް އެ މަޖިލިސް، މުޅިން އާ މަޖިލީހަކަށް އިރާދުކުރެއްވިއްޔާ ހެދޭނެ. މަޖިލިސް 19 ވެގެންދާނީ މުޅިން އާ ފެށުމަކަށް" ރައީސް ނަޝީދު ވިދާޅުވިއެވެ.

ރާއްޖޭގެ ބޯހިޔާވަހިކަމުގެ ދަތިކަމަށް ހައްލެއް ހޯދައިދިނުމަކީ ސިޔަސީ ވެރިންނާއި ރާއްޖޭގެ ސިޔާސީ ޕާޓީތަކަށް ކޮންމެހެން އަދާކުރަން ޖެހިފައިވާ ވަޒީފާއެއް ކަމަށް ނަޝީދު ވިދާޅުވިއެވެ.

ރައީސް ސޯލިހްގެ ސަރުކާރުން އަކުރުން އަކުރަށް ރަނުން ރަނަށް ރައްޔިތުންނަށް ވެފައިވާ ވައުދުތައް ފުއްދުމަށްޓަކައި ހޯދައިދޭންޖެހޭ ޤާނޫނީ ބާރުވެރިކަން، ލިބޭނީ ރައްޔިތުންގެ މަޖިލީހުގެ އިންތިހާބުގައި އެމްޑީޕީއަށް ބޮޑު އަޤުލަބިއްޔަތު ލިބިގެން ކަމަށާއި ކުރިއަށް އޮތް ރައްޔިތުންގެ މަޖިލީހުގެ ޓެކްސްގެ ނިޒާމަށް ބަދަލު ގެންނަންޖެހޭނެ ކަމަށް ނަޝީދު ވަނީ ވިދާޅުވެފައެވެ.

ރައްޔިތުންގެ މަޖިލީހުގެ ނަޒާހަތްތެރިކަމާއި މެމްބަރުންގެ އަހުލާޤީ ދަރަޖައާ މިންވަރު އަދި ރައްޔިތުންގެ މަޖިލީހުގެ ތެރޭގައި ނާޖާއިޒު ފައިދާ އާއި ރުފިޔާގެ ވާހަކަތައް ގިނަވެފައި އޮތުމަކީ ރައްޔިތުންނަށް ބަލައިގަންނަ ވާހަކަތަކެއް ނޫން ކަމަށާއި 2019 ވަނަ އަހަރުގެ މަޖިލިސް ވެގެންދާނީ ނަޒާހަތްތެރި މަޖިލީހަކަށް ކަމަށް ނަޝީދު ވިދާޅުވިއެވެ. އަދި އެ މަޖިލިސް ވެގެންދާނީ ރާއްޖޭގައި ހިންގާފައި ގޮތް ނޭނގޭ މަރުތައް ތަހުޤީޤު ކުރެވި ހައްޤު އަދަބު ހައްޤުވާ ފަރާތްތަކަށް ހޯދައިދޭނެ މަޖިލީހަކަށް ކަމަށް އެމަނިކުފާނު ފާހަގަކުރެއްވިއެވެ.