ކާމިޔާބު ގިނަ ފިލްމްތަކެއް ޑައިރެކްޓް ކޮށްފައިވާ ބޮލީވުޑްގެ މަޝްހޫރު ފިލްމް ޑައިރެކްޓަރ ރޯހިތް ޝެޓީގެ ފިލްމް "ސިމްބާ" ވެގެން ގޮސްފައިވަނީ އޭނާގެ ފިލްމް ތަކުގެ ތެރެއިން 100 ކްރޯޑް ކްލަބަށް ވަތް އަށް ވަނަ ފިލްމަށް ވެގެން ގޮސްފައެވެ.

ރަންވީރު ސިންގް އާއި ސާރާ އަލީ ޚާން ލީޑް ރޯލުން ފެނިގެންދާ މި ފިލްމް ވަނީ ފިލްމް ރިލީޒް ކުރިތާ އެންމެ ފަސް ދުވަހުގެ ތެރޭގައި 100 ކްރޯޑް ކުލަބަށް ވަދެފައެވެ. މި ފިލްމަށް ބޮކްސް އޮފީހުގައި ޖުމްލަ އާމްދަނީގެ ގޮތުގައި ވަނީ 124 ކްރޯޑް ރުޕީސް ލިބިފައެވެ.

މި ފިލްމަށް އިންޑިއާގެ އިތުރުން ދުނިޔޭގެ އެކި ކަންކޮޅު ތަކުގައި ވެސް ދަނީ ބޮޑު ތަރުހީބެއް ލިބެމުންނެވެ. އެގޮތުން އިންޓަނޭޝަނަލް މާކެޓްގައި މި ފިލްމަށް ވަނީ ފަސްދުވަހުން ޖުމްލަ 39.85 ކްރޯޑް ރުޕީސް ލިބިފައެވެ. އަދި މި އަދަދު ވަރަށް އަވަހަށް 50 ކްރޯޑަށް އަރާނެ ކަމަށް ލަފާކުރެވޭ ކަމަށް ރިޕޯޓްތައް ބުނެއެވެ.

ރޯހިތް ޝެޓީގެ ފިލްމް ތަކުގެ ތެރެއިން މީގެ ކުރިން 100 ކްރޯޑް ކްލަބަށް ވަދެފައިވާ 7 ފިލްމަކީ "ގޯލްމާލް އަގެއިން" (2017)، "ދިލްވާލޭ" (2015)، "ސިންގަމް ރިޓާންސް (2014)، ޗެންނާއި އެކްސްޕްރެސް (2013)، ބޯލް ބަޗަން (2012)، "ސިންގަމް" (2011) އަދި "ގޯލްމާލް 3" (2010) އެވެ.