މިދިޔަ މަހުގެ 16 ވަނަ ދުވަހު ރިލީޒް ކޮށްފައިވާ އަޖޭ ދޭވްގަންގެ ރެއިޑްއަށް ވެސް 100 ކުރޯޑް އިންޑިއަން ރުޕީސްގެ ބަޖެޓަކުން ޖާގަ ލިބިއްޖެއެވެ.

މިދިޔަ ހަފްތާގައި ވަނީ ޓައިގާ ޝްރޮފްގެ ބާގީ2 ކަށް ވެސް 100 ކުރޯޑް އިންޑިއަން ރުޕީސް ލިބިފައެވެ. މިދެފިލްމާއިއެކު ބޮލީވުޑްގެ ފިލްމުތަކަށް 100 ކުރޯޑް އިންޑިއަން ރުޕީސް ލިބުނީ އިތުރު ދެފިލްމަށެވެ. އެއީ މިއަހަރު ނެރުނު ޕަދްމާވަތަށާއި  ސޯނީ ކޭ ޓިޓޫކީ ސްވީޓީ އަށެވެ.

އަޖޭ ދޭވްގަން އޮފިސަރެއްގެ ރޯލުން ފެނިގެންދާ މި ފިލްމަކީ ހަގީގީ ހާދިސާއެއްގެ މައްޗަށް ބިނާކޮށް ހަދާފައިވާ ފިލްމެކެވެ.

އެއީ އިންޑިއާގެ އުއްތަރު ޕްރަދޭޝްގައި ހިނގާފައިވާ ހާދިސާއެއް ކަމަށާއި އިންކަމް ޓެކްސް ދައްކަން ދެކޮޅުހަދާ ބައެއް އަތުލައިގަންނަން ކުރާ މަސައްކަތް މި ފިލްމުން ދައްކުވައިދެއެވެ.

45 ކުރޯޑް އިންޑިއަން ރުޕީސްއިން އުފެއްދި މި ފިލްމު ޑައިރެކްޓް ކޮށްފައިވަނީ ރާޖްކުމާރް ގުޕްތާ އެވެ.

އަޖޭގެ އިތުރުން މި ފިލްމުން ފެނިގެންދަނީ އިލިއާނާ ޑި ކްރޫޒްއެވެ.

ރެއިޑްއަށް 100 ކުރޯޑް އިންޑިއަން ރުޕީސްގެ ކްލަބަށް ވާސިލްވުމާއިއެކު އަޖޭ ދޭވްގަން ކުޅުނު ފިލްމު ތަކުގެ ތެރެއިން މި ފިލްމު ވެފައިވަނީ 100 ކުރޯޑް އިންޑިއަން ރުޕީސް ލިބުނު އަޖޭގެ ހަތްވަނަ ފިލްމަށެވެ. އަޖޭ ކުޅުނު ފިލްމު ތަކުގެ ތެރެއިން 100 ކުރޯޑް ރުޕީސްއަށް އަރާފައިވާ ހަތް ފިލްމަކީ ރެއިޑް ގެ އިތުރުން ގޯލްމާލް އެގެއިން، ސިންގަމް، ޝިވާއޭ،ސިންގަމް ރިޓާން، ގޯލްމާލް3 އަދި ބޯލް ބައްޗަންއެވެ.