ފަނޑިޔާރުގެ ސާފުކޮށް އިސްލާހުކުރުމަށް ބޭނުންވާ އެހީތެރިކަން ދޭނެ ކަމަށް އެމްޑީޕީން ބުނެފި
31 ޑިސެމްބަރު 2018 | ހޯމަ 09:49ފަނޑިޔާރުގެތައް އިސްލާހުކުރުމުގައި ދެމިއޮންނާނެ
އެމްޑިޕީގެ އިސް ބައެއް ފަރާތްތަކެއް
ފަނޑިޔާރުގެ އިސްލާހުކުރުމަށް ބޭނުންވާ އެންމެހާ އެހީތެރިކަން ދޭނެ ކަމަށާއި އެ މަސައްކަތުގައި ދެމިއޮންނާނެކަމުގެ ޔަގީންކަން އަރުވާ ކަމަށް އެމްޑީޕީން ބުނެފިއެވެ.
އެމްޑީޕީން ނެރުނު ނޫސް ބަޔާނެއްގައި ބުނެފައި ވަނީ މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަޙްޤީޤުކުރާ ކޮމިޝަނުން ބޭއްވި ނޫސްވެރިންގެ ބައްދަލުވުމުގައި، ރާއްޖޭގެ ކޯޓުތަކުގެ ޙާލަތު ގޯސްވެފައިވާ މިންވަރު ހާމަކުރައްވަމުން ދެއްވި މަޢުލޫމާތާ މެދު އެ ޕާޓީން ކަންބޮޑުވާ ކަމަށެވެ.
އެމްޑީޕީން ބަޔާން ނެރެފައި ވަނީ "މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަޙުޤީޤުކުރާ ކޮމިޝަން" މަސައްކަތްތަކާ ގުޅޭ ގޮތުން ރައީސް އޮފީހުގައި މީޑީއާއަށް މައުލޫމާތު ދެއްވަމުން، ކްރިމިނަލް ކޯޓަށް ފަނޑިޔާރުން އައްޔަން ކުރުމަށް ބައެއް ގޭންގުތަކަށް ކޯޓާއެއް ލިބިފައިވާ ކަމަށް އެ ކޮމިޝަންގެ ރައީސް ހުސްނުއް ސުއޫދު ވިދާޅުވުމާ ގުޅިގެންނެވެ. މީގެ އިތުރުން ސުއޫދު ވިދާޅުވެފައި ވަނީ ގޭންގުތަކުގެ ނުފޫޒު ފަނޑިޔާރުންގެ މައްޗަށް އެބަ އޮތް ކަމަށާއި އެކަމުގައި ކްރިމިނަލް ކޯޓުގެ މުވައްޒަފުންގެ ބައިވެރިވުން ވެސް އޮތް ކަމަށެވެ. ގޭންގްތަކުން ކޯޓުތަކަށް ނުފޫޒު ފޯރުވައިގެން ކުރި ބައެއް ކަންކަން ތަފްސީލު ކޮށްދެއްވަމުން، ސުއޫދު ވިދާޅުވީ މަރުގެ ދައުވާތައް ސާބިތު ނުކުރުމާއި ހެކިންނަށް ނުފޫޒުފޯރުވުމަށް އެހީވުމާއި ޓެރަރިޒަމްގެ މައްސަލަތަކުގައި ހިމެނޭ މީހުން ދޫކޮށްލުމާއި ބަންދުގެ މުއްދަތު އިތުރު ނުކޮށްދިނުމާއި ބަންދު ކުރަން ނުޖެހޭ މީހުން ބަންދުގައި ކުރުން ހިމެނޭ ކަމަށެވެ.
މިކަމާ ގުޅިގެން އެމްޑީޕީން ބުނެފައި ވަނީ އެ ކަންކަމަކީ ރައްޔިތުންނަށް ރައްކާތެރިކަން ފޯރުކޮށްދީ، އަދުލު އިންސާފު ޤާއިމުކުރުމަށް އޮތް ވަރަށް ބޮޑު ނުރައްކަލެއް ކަމަށް ދެކޭ ކަމަށެވެ. މީގެ އިތުރުން އެކަމަކީ ރާއްޖޭގެ ކޯޓުތަކުގެ ނާއިންސާފުކަމާއި އެ ކޯޓުތަކުން ރައްޔިތުންގެ ޙައްޤުތަކަށް ފާޅުގައި އަރައިގަންނަމުންދާކަން ހާމަވެގެންދާ ކަމެއް ކަމަށާއި އެއީ އެކަމުގެ ތެރެއަށް އިތުރުވި ބިރުހުރި މަޢުލޫމާތެއް ކަމަށެވެ.
އެމްޑީޕީގެ ނޫސްބަޔާނުގައި އިތުރަށް ބުނެފައި ވަނީ ރައްޔިތުންގެ ޙައްޤުތައް ދިފާޢުކޮށް، ޤާނޫނުއަސާސީ އާއި ޤާނޫނުގެ ބާރުވެރިކަން ނަގަހައްޓައި، ރާއްޖޭގެ ޑިމޮކްރެސީ އާއި ހަމަޖެހުން ޤާއިމުކުރެވެން އޮތީ، މި ކަންތައްތައް އިސްލާޙްކޮށް ކޯޓުތަކާއި ޝަރުޢީ ނިޒާމަށް ނުރައްކާވާ ކަންތައްތަކުން ސަލާމަތްކޮށް، މިނިވަންކޮށްގެން ކަމަށެވެ. މީގެ އިތުރުން އެމްޑީޕީން ވަނީ ޕާޓީން ފަނޑިޔާރުގެތައް އިސްލާހުކުރުމުގެ ދެމިއޮންނާނެ ކަމަށާއި ފުރިހަމަ އެއްބާރުލުންދޭނެ ކަމަށް ބުނެފައެވެ.
