ވީއައިއޭގައި އަލަށް ހަދާ ފިއުލްފާމުގެ މަސައްކަތް އަންނަ އަހަރުގެ އޮގަސްޓްމަހު ނިމޭނެ
29 ޑިސެމްބަރު 2018 | ހޮނިހިރު 13:18ފިއުލް ފާމުގައި ތެޔޮ ރައްކާ ކުރާ ތިންޓެންކް ހުންނާނެ
އެމްއޭސީއެލްގެ ޑެޕިއުޓީ ޗީފް އޮފިސަރ މުހައްމަދު ނިޔާޒު
ވެލާނާ އިންޓަރނޭޝަނަލް އެއާޕޯޓްގައި އަލަށް ހަދާ ފިއުލް ފާމްގެ މަސައްކަތް އަންނަ އަހަރުގެ އޮގަސްޓްމަހު ނިމޭނެ ކަމަށް އެމްއޭސީއެލްގެ ޑެޕިއުޓީ ޗީފް އޮފިސަރ މުހައްމަދު ނިޔާޒް ވިދާޅުވެއްޖެއެވެ.
އެއާރޕޯޓުގެ ތަރައްގީގެ މަޝްރޫއުތައް މީޑިއަތަކާ ހިއްސާކުރައްވަމުން ނިޔާޒު ވިދާޅުވީ އަލަށް ހަދާ ފިއުލް ފާމުގައި ތެޔޮ ރައްކާކުރާ ތިން ޓޭންކް ހުންނަ ކަމަށާއި އެއިން ކޮންމެ ޓޭންކަކީ 15000 ކިއުބިކް މީޓަރުގެ ޓޭންކްތަކެއް ކަމަށެވެ.
އެގޮތުން ފުރަތަމަ ޓޭންކްގެ ސްޓަރަކްޗަރަލް މަސައްކަތް މިވަގުތު ނިމިފައިވާއިރު ދެވަނަ ޓޭންކްގެ އެންމެ ފަހުގެ ޝެލްޕްލޭޓް އިންސްޓޯލް ކުރުމުގެ މަސައްކަތް ވެސް ނިމިފައިވާ ކަމަށެވެ. އަދި ތިން ވަނަ ޓޭންކުގެ ރޫފިންގެ މަސައްކަތް ފަށައިގެން ރޫފްސްޓްރަކްޗަރގެ ޕެއިންޓިންގެ މަސައްކަތް ކުރިއަށްދާ ކަމަށެވެ.
މީގެ އިތުރުން އަލަށް ހަދަންޖެހޭ ދެ ޑީސަލް ޓޭންކުގެ ފައުންޑޭޝަންގެ މަސައްކަތް ވެސް ނިމިފައިވާ ކަމަށް ވެސް އޭނާ ވިދާޅުވިއެވެ.
ނިޔާޒް ވިދާޅުވީ މިހާރު އެއާޕޯޓްގައި ހުރި ޓޭންކް ތަކަށްވުރެން އަލަށް ގާއިމްކުރާ ތެޔޮ ރައްކާކުރާ ޓޭންކްތައް ބޮޑަތިވާނެ ކަމަށާއި މުސްތަގުބަލްގައި އަދިވެސް އެވަރު ދެ ޓޭންކް ހަދާލެވޭވަރުގެ ޖާގަ އެބައޮތް ކަމަށެވެ.
"އަޅުގަނޑުމެންގެ އެންމެ ބޮޑު މައްސަލައަކީ މިވަގުތު ސްޓޯރޭޖް ކުޑަވީމަ. އަލަށް ގާއިމް ކުރެވޭ ފިއުލް ފާމުން އެއްފަހަރާ ގެނެވޭ ޝިޕްމެންޓްގެ ސައިޒް ބޮޑުވެ ފްރައިޓައް ކޮންމެވެސް ވަރެއްގެ ލުއި ބަދަލެއް އަންނާނެ. އަދި ތެޔޮ ގަތުމުގައި ފަސޭހަތަކެއް ލިބިގެންދާނެ،" ނިޔާޒް ވިދާޅުވިއެވެ.
