ތިން މަރެއްގެ މައުލޫމާތު ހިއްސާކޮށްދިނުމަށް ކޮމިޝަނުން އެދިއްޖެ
28 ޑިސެމްބަރު 2018 | ހުކުރު 18:06މައުލޫމާތު ހިއްސާކޮށްދޭ ފަރާތްތަކުގެ ވަނަވަރު ސިއްރުކޮށްދޭނެކަމުގެ ޔަޤީންކަންދީފައިވޭ
ޔާމީން ރަޝީދު (ކ)، ރިލްވާން އަހުމަދު (މ)، އަފްރާޝީމް އަލީ (ވ)
ތިން މަރެއްގެ މައުލޫމާތު ހިއްސާކޮށްދިނުމަށް، މަރާލާފައިވާ މީހުންނާއި، ގެއްލުވާލައިފައިވާ މީހުންގެ މައްސަލަތައް ތަހުޤީޤްކުރާ ކޮމިޝަނުން އާންމު ރައްޔިތުންގެ ކިބައިން އެދިއްޖެ އެވެ.
މަރާލާފައިވާ މީހުންނާއި، ގެއްލުވާލައިފައިވާ މީހުންގެ މައްސަލަތައް ތަހުޤީޤްކުރާ ކޮމިޝަން އުފައްދަވާފައިވަނީ ރައީސް އިބްރާހިމް މުހައްމަދު ސޯލިހް، މަޤާމްގެ ހުވާކުރެއްވި ދުވަހު އެވެ.
އެ ކޮމިޝަނުން ބުނީ ރައްޔިތުންގެ މަޖިލީހުގެ ކުރީގެ މެމްބަރު ޑރ. އަފްރާޝީމް އަލީ އާއި، ބްލޮގަރ ޔަމިން ރަޝީދުގެ އިތުރުން ގެއްލުވާލާފައިވާ ނޫސްވެރިޔާއާއި ގުޅޭ އެއްވެސް މައުލޫމާތެއް ދިނުމަށް ބޭނުންވާ ފަރާތެއްވާކަމުގައިވާނަމަ އެ މައުލޫމާތެއް ހިއްސާކޮށްދިނުމަށް އެދޭކަމަށެވެ. އެގޮތުން ކޮމިޝަނަށް ބޭނުންކުރެވިދާނެ ފަދަ އެއްވެސް މައުލޫމާތެއްވާކަމުގައިވާނަމަ ޓުވިޓަރގެ ޑައިރެކްޓް މެސެޖް މެދުވެރިކޮށް ނުވަތަ އީމެއިލްކޮށްދިނުމަށް ކޮމިޝަނުން އެދިފައިވެއެވެ.
ކޮމިޝަނުން ބުނީ ކޮންމެ މައުލޫމާތެއް ހިއްސާކުރިކަމުގައިވީނަމަވެސް، މަުއލޫމާތު ހިއްސާކުރި މީހެއްގެ ވަނަވަރު ކޮމިޝަނުން ސިއްރުކޮށްދޭނެ ކަމަށެވެ. އަދި އެފަރާތަކަށްދޭންޖެހޭ ރައްކާތެރިކަންދޭނެކަމުގެ ޔަޤީންކަންދޭކަމަށްވެސް ކޮމިޝަނުން ބުނެފައިވެއެވެ. އަދި މައުލޫމާތު ހިއްސާކުރާއިރު، އެ މީހަކު ކާކުކަން ނޭނގޭގޮތަށް ހިއްސާކޮށްދިނުމަށް ބަރުއަޅާކަމަށްވެސް ކޮމިޝަނުން ބުނެފައިވެއެވެ.
މަރާލާފައިވާ މީހުންނާއި، ގެއްލުވާލައިފައިވާ މީހުންގެ މައްސަލަތައް ތަހުޤީޤްކުރާ ކޮމިޝަނަކީ ރައީސް އިބްރާހިމް މުހައްމަދު ސޯލިހްގެ ރިޔާސީ ވައުދާއި ގުޅުވައި އެމަނިކުފާނު ވެރިކަމުގެ ފުރަތަމަ ދުވަހު އުފެއްދެވި ކޮމިޝަނެކެވެ. އެ ކޮމިޝަނަށް ޤާނޫނީ ބަރުވެރިކަން ދިނުމަށް ރައްޔިތުންގެ މަޖިލީހަށް ބިލެއް ހުށަހަޅާފައިވާއިރު، ކޮމިޝަންގެ މަސައްކަތްތައް އެންމެ އެދެވޭގޮތުގައި ކުރިއަސްގެންދިޔުމަށް އެ ޤާނޫނު ވަރަށް މުހިންމުކަމަށް ކޮމިޝަނުން މީގެކުރިން ބުނެފައިވެއެވެ.
