87 ގޮނޑިއަށް ކުރިމަތިލާން ނުނިންމަން، ހުޅުވާލީ ޝައުގުވެރިވާ ފަރާތްތައް ހޯދަން: ޖޭޕީ
25 ޑިސެމްބަރު 2018 | އަންގާރަ 13:17ޓިކެޓް ދޭނެ މީހުން ކަނޑައަޅާނީ ފަސް މެމްބަރުންގެ ކޮމިޓީ އަކުން
ޖުމްހޫރީ ޕާޓީ (ޖޭޕީ)ގެ އެއްވުމެއްގެ ތެރެއިން
އަންނަ އަހަރުގެ އޭޕްރީލް މަހުގެ ހަ ވަނަ ދުވަހު ބާއްވާ ރައްޔިތުންގެ މަޖިލީހުގެ އިންތިހާބުގައި މަޖިލީހުގެ 87 ގޮނޑިއަށް ވާދަ ކުރަން ޖުމްހޫރީ ޕާޓީ (ޖޭޕީ)އިން ނިންމާފައި ނުވާ ކަމަށާއި އެ ޕާޓީން ފުރުސަތު ހުޅުވާލީ ޝައުގުވެރިކަން ހުރި ދާއިތައް ބެލުމަށް ކަމަށް ޖޭޕީން ބުނެފިއެވެ.
ޖޭޕީގެ ތަރުޖަމާނު އަދި ކޮމިއުނިކޭޝަން، ސައިންސް އެންޑް ޓެކްނޮލޮޖީ މިނިސްޓްރީގެ ސްޓޭޓް މިނިސްޓަރު އަލީ ސޯލިހު "ރާއްޖެއެމްވީ"އަށް ވިދާޅުވީ މަޖިލީހުގެ އިންތިހާބުގައި ވާދަ ކުރަން ޝައުގުވެރިވާ ފަރާތްތައް ބެލުމަށްފަހު، ޕާޓީގެ ފަރާތުން ދާއިރާތަކަށް ނުކުންނާނެ މީހުން ކޮމެޓީއަކުން ކަނޑައަޅާނެ ކަމަށެވެ. ޖޭޕީން ޓިކެޓް ދޭނެ ބަޔަކު ހޮވާނީ އެ ޕާޓީން ކަނޑައަޅާފައިވާ ފަސް މެމްބަރުންގެ ކޮމެޓީއަކުންނެވެ. މަޖިލިސް އިންތިޚާބުގައި ވާދަކުރުމަށް އެ ޕާޓީން ޓިކެޓް ދޭނީ އެ ކޮމެޓީގެ މަޝްވަރާއާއެކު އަންނަ މަހުގެ 25 ގެ ކުރިން އެކަމަށް އެދި ކުރިމަތިލާ މީހުންގެ ތެރެއިންނެވެ.
"އަންނަ ޖެނުއަރީ 25 ގެ ކުރިން ދާއިރާތަކަށް ޓިކެޓަށް އެދި ހުށަހަޅަންވީ. އެއަށްފަހު ކޮމެޓީން ނިންމާނެ ޓިކެޓް ދޭނީ ކޮން ފަރާތަކަށް ކަން," އަލީ ސޯލިހު ވިދާޅުވިއެވެ.
ޖޭޕީން މަޖިލީހުގެ ޝައުގުވެރިކަން ހުރި ދާއިރާއަށް ވާދަ ކުރުމަށް އެ ޕާޓީގެ މެމްބަރުންނަށް ހުޅުވާލާފައި ވަނީ މަޖިލީހުގެ 86 ގޮނޑިއަށް ވާދަ ކުރުމަށް އެމްޑީޕީގެ މެމްބަރުން އެ ޕާޓީއަށް ފޯމު ހުށަހަޅާފައި ވަނިކޮށެވެ. އެމްޑީޕީން މަޖިލީހުގެ ހުރިހާ ދާއިރާއަށް ކުރިމަތިލާން މި މަހުގެ ހަތް ވަނަ ދުވަހު ހުޅުވާލުމުން 280 ކެންޑިޑޭޓުން ވަނީ ފޯމު ހުށަހަޅާފައެވެ. އަދި 76 ދާއިރާއެއްގައި ޕްރައިމަރީ ބޭއްވުމަށް ވަނީ ނިންމާފައެވެ. އަދި ޕްރައިމަރީއަކާ ނުލައި 10 ކެންޑިޑޭޓަކަށް ވަނީ ޓިކެޓް ލިބިވަޑައިގެންފައެވެ. ޕްރައިމަރީއަކާ ނުލައި ޕީޕީއެމުން ވަނީ 55 މީހަކަށް އެ ޕާޓީގެ ފަރާތުން ވާދަ ކުރުމަށް ޓިކެޓް ހަވާލުކޮށްފައެވެ.
