މޯލްޑިވްސް ތަރޑް-ވޭ ޑިމޮކްރެޓްސް (އެމްޓީޑީ) އުފެއްދުމުގެ ޖަލްސާ މިރޭ ދަރުބާރުގޭގައި ބޭއްވުމަށް ތައްޔާރުވަމުން އަންނަ ކަމަށް އެ ޕާޓީން ބުނެފިއެވެ.

ޕާޓީ އުފެއްދުމުގެ ގޮތުން ބާއްވަންޖެހޭ ފުރަތަމަ ޖަލްސާ މިރޭ 21:00 ގައި ދަރުބާރުގޭގައި ބޭއްވުމަށް ނިންމައި އެކަމުގެ ތައްޔާރީތައް އެޕާޓީން މިހާރު ދަނީ ކުރަމުންނެވެ. 

ޖަލްސާގައި ޕާޓީގެ އަސާސީ ގަވާއިދު ފާސްކުރުމާއި ޕާޓީގެ ކައުންސިލަށް މެމްބަރުން ހޮވުން އޮންނާނެ އެވެ. 

އެމްޓީޑީގެ ނަމުގައި ސިޔާސީ ޕާޓީއެއް އުފެއްދުމަށްޓަކައި ކުރަންޖެހޭ ކަންކަން ކުރުމުގެ ހުއްދަ އިލެކްޝަންސް ކޮމިޝަނުން ދީފައި ވަނީ ނޮވެމްބަރު މަހުގެ 29 ވަނަ ދުވަހުއެވެ.

ސިޔާސީ ޕާޓީއެއް އުފެއްދުމަށްޓަކައި ތިން މަސް ދުވަހުގެ ތެރޭގައި ތިންހާސް މީހުން ހަމަކުރަންޖެހެއެވެ. ސަރުކާރުން ސިޔާސީ ޕާޓީތަކަށް ދޫކުރާ ފައިސާ ލިބޭނީ 10،000 މެންބަރުން ހަމަވާ ޕާޓީތަކަށް އެކަންޏެވެ.

ގާނޫނީ ވަކީލް ހަސީން އިސްކޮށް ހުންނަވައިގެން އުފައްދާ، މޯލްޑިވްސް ލޭބަރ އެންޑް ސޯޝަލް ޖަސްޓިސް ޕާޓީއަށް ވެސް ވަނީ، ޕާޓީ އުފެއްދުމުގެ ޖަލްސާ ބޭއްވުމުގެ ހުއްދަ ދީފަ އެވެ. 

ރާއްޖޭގައި މި ވަގުތު ރަޖިސްޓްރީ ކޮށްފައި އޮތީ ހަ ސިޔާސީ ޕާޓީއެކެވެ. އެއީ ޕީޕީއެމް، އެމްޑީޕީ، ޖުމްހޫރީ ޕާޓީ، އަދާލަތު ޕާޓީ، ޑީއާރުޕީ އަދި އެމްޑީއޭއެވެ.