ސަރުކާރު ހިއްސާވާ މާލެ ވޯޓާ އެންޑް ސްވަރޭޖު ކޮމްޕެނީ (އެމްޑަބްލިއުއެސްސީ) އަށް ސިޔާސީ ނުފޫޒު ވައްދައި، ކުންފުނީގެ މުދަލާއި ވަސީލަތްތައް ގާނޫނާ ހިލާފަށް ބޭނުންކޮށްފައިވޭތޯ ބެލުމަށް އިންޓާނަލް އޮޑިޓެއް އެ ކުންފުނީގައި ހިންގަން ފަށައިފިއެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ދައުލަތުގެ ކުންފުނިތަކުގެ މުދަލާއި ފައިސާ ނަހަމަ ގޮތުގައި ބޭނުންކޮށްފައިވާ ކަމަށް ކުރެވޭ ތުހުމަތުތަކާ ގުޅިގެން، އެމްޑަބްލިއުއެސްސީން އެކަހަލަ ކަމެއް ފާހަގަ ކުރެވިފައިވޭތޯ އެ ކުފުންނީގެ މެނޭޖިން ޑިރެކްޓަރު އާދަމް އާޒިމާ ސުވާލު ކުރުމުން ވިދާޅުވީ، އެކަން ބެލުމަށް އޮޑިޓެއް ހިންގަން ފަށާފައިވާ ކަމަށެވެ.

އެ ކުންފުނީގެ އިންޓާނަލް އޮޑިޓް ޓީމުން އޮޑިޓް ކުރަން ފެށުމުން، "އުނދަގޫ ކަންތައްތަކެއް" ހުރި ކަމަށް އެ ޓީމުން ފާހަގަ ކުރެއްވި ކަމަށާއި ނަމަވެސް "އެ ޓީމަށް ނުވަދެވޭނެ ތަނެއް، ނުބެލޭނެ ޑޮކިއުމަންޓެއް" ކުންފުނީގައި ނުހުންނާނެ ކަމަށް ދަންނަވާފައިވާނެ ކަމަށް އާޒިމް ވިދާޅުވިއެވެ.

"އޮޑިޓް ޓީމަށް ފުލް އިހްތިޔާރު އަޅުގަނޑު ދީފިން، އެބޭފުޅުން އޮޑިޓް ކުރަން. އެ ބޭފުޅުންނަށް އޮޑިޓް ކުރަން އުނދަގޫ ކަންތައްތަކެއް ހުރި ކަމަށް އެ ބޭފުޅުން ވިދާޅުވި އަޅުގަނޑާ ބައްދަލުކޮށްފައި. އަޅުގަނޑު ދެންނެވިން ތިބޭފުޅުންގެ އިންޓާނަލް އޮޑިޓަށް އެކްސެސް ނެތް އެއްވެސް ތަނެއް، އެއްވެސް ޑޮކިއުމަންޓެއް އެމްޑަބްލިއުއެސްސީގައި ނުހުންނާނެއޭ. ހުރިހާތާކަށް ބޭނުންކުރި ބޭނުން ތަނަކަށް ވަދެ، ތިބޭފުޅުން އޮޑިޓްތައް ހިންގަމުން ގެންދާށޭ،" މިދިޔަ މަހު އެމްޑަބްލިއުއެސްސީގެ އެމްޑީގެ މަގާމާ ހަވާލުވެވަޑައިގެންނެވި އާޒިމް ވިދާޅުވިއެވެ.

ސަރުކާރާއި ޖަޕާނުގެ ހިޓާޗީ ކުންފުނީގެ ހިއްސާވާ އެމްޑަބްލިއުއެސްސީގެ މިދިޔަ އަހަރު ސާފު ފައިދާގެ ގޮތުގައި ލިބުނު މިންވަރު ވަނީ 15.5 ޕަސެންޓް ދަށްވެފައެވެ. އާމްދަނީގެ ގޮތުގައި މިދިޔަ އަހަރު އެ ކުންފުންޏަށް ލިބުނު ބިލިއަނަކަށް ވުރެ ގިނަ ރުފިޔާގެ ތެރެއިން ސާފު ފައިދާގެ ގޮތުގައި ލިބުނީ 264.7 މިލިއަން ރުފިޔާއެވެ. ކުންފުނީގެ ހިންގުމުގެ ހަރަދު ވެސް މިދިޔަ އަހަރު ވަނީ 62.8 މިލިއަން ރުފިޔާ އިތުރުވެފައެވެ. އެ ކުންފުނިން މިދިޔަ އަހަރު ހިންގުމުގެ ހަރަދުގެ ގޮތުގައި 238.4 މިލިއަން ރުފިޔާ ހޭދަކޮށްފައިވެއެވެ.