ހަނީ ސިންހްގެ މަކްނާއަށް އެއް ދުވަހުން 19 މިލިއަން ވިއުސް

އިންޑިއާގެ މަޝްހޫރު ރެޕް ލަވަ ކިޔުންތެރިޔާ ޔޯ ޔޯ ހަނީ ސިންހްގެ ''މަކްނާ''އަށް 24 ގަޑި އިރު ތެރޭގައި 19 މިލިއަން ވިއުސް ލިބިއްޖެއެވެ.

މި މަހުގެ 21 ވަނަ ދުވަހު ޓީ ސީރީސް އިން ނެރެފައިވާ މި ލަވަ ކިޔާފައިވަނީ ހަނީ ސިންހްގެ އިތުރުން '' ސެކަންޑް ހޭންޑް ޖަވާނީ'' ފަދަ ލަވަތައް ކިޔާފައިވާ ޒުވާން ލަވަ ކިޔުންތެރިޔާ ނޭހާ ކައްކަރެވެ. ލަވަޔަށް އިތުރު ފުރިހަމަ ކަމެއް ގެނެސް ދީފައި ވަނީ ސިންގަސްތާ، ޕިނަކީ، ސީންގެ އިތުރުން އަލިސްޓާގެ ހިތްގައިމު އަޑުންނެވެ.

ސްޕެނިޝް ޑައިރެކްޓަރު ޑެނިއެލް ޑުރަން ޑައިރެކްޓް ކޮށްފައިވާ މި ލަވައިގެ މަންޒަރުތައް ނަގާފައި ވަނީ ކިއުބާގައެވެ. ލަވަ ހަދަން ހަތް މަސް ދުވަސް ހޭދަ ކޮށްފައިވާ ކަމަށް ރިޕޯޓްތައް ބުނެއެވެ.

މިއަދާ ހަމައަށް 27 މިލިއަން ވިއުސް މި ލަވަޔަށް ލިބިފައިވާ އިރު މި ލަވައާ ބެހޭ ގޮތުން އިންޑިއާގެ ނޫސްތަކަށް ދިން އިންޓަވިއުއެއްގައި ހަނީ ސިންހް ބުނީ، ކުރިއަށް އޮތް ދުވަސް ތަކުގައި މި ފަދަ ގިނަ ލަވަތަކެއް ފެނިގެންދާނެ ކަމަށެވެ.

މި ލަވަ ހެދުމުގައި ޓީ ސީރީސްގެ މެނޭޖިން ޑައިރެކްޓަރު ބުޝަން ކުމާރުގެ ފަރާތުން ލިބިފައިވާ އެއްބާރުލުމަށް ހަނީ ސިންހް ވަނީ ޝުކުރު އަދާކޮށްފައެވެ. ރެގޭޓޯންގެ އިތުރުން ލެޓިން ބީޓަށް ހަދާފައިވާ ''މަކްނާ'' މި ބަހުގެ މާނައަކީ އަކީ ޕަންޖާބީ ބަހުން ލޯބިވެރިޔާއެވެ.

ބޮލީވުޑްގެ ފިލްމަކަށް މިހާތަނަށް އެންމެ ބޮޑު އަގެއްގައި ލަވައެއް ކިޔާފައިވާ ހަނީ ސިންހް އާއްމުންގެ ތެރެއަށް މަޝްހޫރުވެގެން ވެގެން ދިޔައީ ޕަންޖާބުގެ ލަވަކިޔުންތެރިޔާ އަދި އެކްޓަރު ދިލްޖީތް ދޮސާނީއާ އެއްކޮށް ކިޔާފައިވާ ލަވަ ''ލަކް 28 ކުޑީ ޑާ'' ލަވަ އިންނެވެ.

ހަނީ ސިންހް ބޮލީވުޑް ފިލްމު ކޮކްޓެއިލްގެ "އަންގްރޭޖީ ބީޓް'' ލަވަ ކިޔާފައިވަނީ ހަތް މިލިއަން (97،000 ޑޮލަރު) ރުޕީސްއަށެވެ.