ގިނަ ބަޔަކަށް ކަމުދިޔަ ކޮމެޑީ ފިލްމު ގޯލްމާލް ސީރީސްގެ ފަސްވަނަ ފިލްމު ހަދާކަމުގެ އިޝަރާތެއް އެ ފިލްމުގެ ޑައިރެކްޓަރު ރޯހިތް ޝެޓީ ދީފިއެވެ.

ރިޕޯޓްތައް ބުނާ ގޮތުގައި، ރޯހިތް ޝެޓީ މި ފަދަ އިޝާރާތެއް ދީފައިވަނީ އިންޑިއާގެ ނޫހަކަށް ދާދި ފަހުން ދިން އިންޓަވިއު އެއްގައިއެވެ. 

ރޯހިތް ޑައިރެކްޓްކޮށް ރަންބީރު ސިންހް ލީޑު ރޯލް ކުޅޭ "ސިމްބާ" އާއި ބެހޭ ގޮތުން މައުލޫމާތު ދެމުން ރޯހިތް ބުނީ، ގޯލްމާލްގެ ފަސްވަނަ ފިލްމެއް ހެދުމާބެހޭ ގޮތުން މަޝްވަރާކުރެވިފައިވާ ކަމަށެވެ. ނަމަވެސް، ފިލްމުގެ މަސައްކަތް ފެށޭނެ އިރެއް ނޭނގޭ ކަމަށް ރޯހިތް އާއި ހަވާލާދީ ރިޕޯޓްތައް ބުނެއެވެ. 

ގޯލްމާލްގެ ފުރަތަމަ ފިލްމު ގޯލްމާލް ފަން އަންލިމިޓެޑް ނެރެފައިވަނީ 2006 ވަނަ އަހަރުއެވެ. ފިލްމު ވެގެން ގޮސްފައިވަނީ ގިނަ ބެލުންތެރިންތަކަށް ކަމުދިޔަ ފިލްމެއްގެ ގޮތުގައިއެވެ.

އެ ފިލްމުގެ ކާމިޔާބީ އާއިއެކު ގޯލްމާލްގެ ސީރީސްގެ ތިން ފިލްމެއް މިހާތަނަށް ހަދާފަވެއެވެ. ގޯލްމާލް ސީރީސްގެ ހުރިހާ ފިލްމެއްވެސް ވަނީ ރަނގަޅު އާމްދަނީއެއް ހޯދާފައިއެވެ. 

ބޮލީވުޑްގައި ނަން މަޝްހޫރު ގިނަ ތަރިންތަކެއް ހަރަކާތްތެރިވާ ''ގޯލްމާލް އެގެއިން'' ނެރެފައިވަނީ 2017 ވަނަ އަހަރުއެވެ.

ޖުމްލް 80 ކުރޯޑުން ހެދި މި ފިލްމުވަނީ އަމްދަނީއެއްގެ ގޮތުގައި 311 ކްރޯޑު ހޯދާފައެވެ. އެގޮތުން ފިލްމު ރިލީޒްކުރި ފުރަތަމަ ދުވަހު 30 ކްރޯޑު ހޯދައިގެން ''ގޯލްމާލް އެގޭއިން'' ވަނީ 2017 ވަނަ އަހަރުގެ ފިލްމުތަކުގެ ތެރެއިން ރިލީޒްކުރި ދުވަހު އެންމެ ބޮޑު އާމްދަނީއެއް ހޯދި ފިލްމެއް ގޮތަށް ވެފައިއެވެ.