އިންޑިއާއާއި ގުޅިގެން ކުރިޔަށް ގެންދިޔަ 59 ވަނަ ޖޮއިންޓް މެރިޓައިމް ސެކިއުރިޓީ ޕެޓްރޯލް ނިންމާލައިފި
މިއީ 2010 ވަނަ އަހަރު އިންޑިއާއާއި އެކު ވެފައިވާ ޓްރައިލެޓަރަލް މެރިޓައިމް އެގްރީމެންޓުގެ ދަށުން ކުރިޔަށް ގެންދެވޭ ޕެޓްރޯލް ތަކެއް
އެމްއެންޑީއެފްގެ ކޯސްްޓްގާޑް މަނަވަރެއް
އިންޑިއާގެ އަސްކަރިއްޔާއާއި އެމް.އެން.ޑީ.އެފްއިން ގުޅިގެން ކުރިޔަށް ގެންދިޔަ 59 ވަނަ ޖޮއިންޓް މެރިޓައިމް ސެކިއުރިޓީ ޕެޓްރޯލް ނިންމާލައިފިއެވެ.
މި ޕެޓްރޯލްތައް ނިންމާލުމަށް ފަހު އެކަމުގައި ބައިވެރިވި އިންޑިއާގެ މަނަވަރު "ރާނާ" މިހާރު ވަނީ މާލޭގައި ބަނދަރުކޮށްފައެވެ. މިފަހަރުގެ ޕެޓްރޯލްއާއި ބެހޭ ގޮތުން މައުލޫމާތު ދެއްވަމުން ކޯސްޓްގާޑުގެ ޕްރިންސިޕަލް ޑިރެކްޓަރު، ލެފްޓިނެންޓް ކާނަލް މުހައްމަދު ސަލީމް ވިދާޅުވީ މިފަހަރުގެ ޕެޓްރޯލުގައި ބެލުނީ ރާއްޖޭގެ އިޤްތިޞާދީ ކަނޑުގެ ސަރަހައްދު ހިމެނޭ ގޮތަށް، ރާއްޖޭގެ ހުޅަނގު އުތުރުން ފެށިގެން ގޮސް ތ. އަތޮޅާއި ހަމައަށް ކަމަށެވެ.
"މި ސަރަހައްދުގައި އެއްވެސް ކަހަލަ ނޭދެވޭ އެކްޓިވިޓީއެއް ހިނގާކަމުގެ އެއްވެސް މައުލޫމާތެއް ނެތް ލިބިފައެއް. އޭގެ މާނައަކީ މި ސަރަހައްދުގައި ގަވައިދާ ޚިލާފަށް އޮޕަރޭޓް ކުރާ އުޅޭ އެއްވެސް އުޅަނދެއް ހަރަކާތްތެރި ވަމުން ނުދާކަމަށް،" ސަލީމް ވިދާޅުވިއެވެ.
އިންޑިއާގެ މަނަވަރު ރާނާއާއި ބެހޭ މައުލޫމާތު ދެއްވަމުން ސަލީމް ވިދާޅުވީ މި މަނަވަރަކީ "ޑިސްޓްރޯޔާ" ކްލާހުގެ މަނަވަރެއް ކަމަށެވެ.
"ވަރަށް ގިނަ ސެންސަރސްތައް އަދި ކަނޑުމަތީގަ ހުރިހާ ކަހަލަ އޮޕަރޭޝަނެއް ވެސް ހިންގޭނެ ފެންވަރުގެ، ވަރަށް ވަރުގަދަ އަސްކަރީ މަނަވަރެއް. މި މަނަވަރައް (އެރީ) އަޅުގަނޑުމެންގެ ޓީމަކާއި އެކީގަ، އެއީ ޝިޕް ބޯޑިންގެ ޓީމެއް. އެއްވެސް ކަހަލަ ހަރަކާތެއް ހިނގާނަމަ ގާނޫނީ ގޮތުން ރާއްޖޭގެ ކަނޑުގެ ސަރަހައްދުގައި ހިނގާ ކަންކަމަށް އަމަލު ކުރެވެނީ ރާއްޖޭގެ ގައުމީ ދިފާއީ ބާރަށް ކަމަށް ވާތީވެ، އަޅުގަނޑުމެންގެ ޓީމެއް މި މަނަވަރުގައި ހަރަކާތް ތެރިވަފައިވޭ،" ސަލީމް ވިދާޅުވިއެވެ.
މި ޕެޓްރޯލްތަކަކީ 2010 ވަނަ އަހަރުން ފެށިގެން ދިވެހިރާއްޖެއާއި އިންޑިއާއާއި ދެމެދު ވެފައިވާ ޓްރައިލެޓަރަލް މެރިޓައިމް އެގްރީމެންޓުގެ ދަށުން ކުރިޔަށް ގެންދެވޭ ޕެޓްރޯލް ތަކެކެވެ.
