ސައުދީއާއި ދެކޮޅަށް ދަތިކުރުމުގެ ފިޔަވަޅު އަޅާނަން: ސެނެޓަރުން
ސެނެޓަރު ލިންޑްސޭ ގްރަހަމް ވިދާޅުވީ 2019 ވަނަ އަހަރުގެ ސެނެޓުގެ ދައުރު ފެށުމުން މި ބިލް ހުށައަޅުއްވާނެ ކަމަށް
ރިޕަބްލިކަން ސެެނެޓަރު ލިންޑްސޭ ގްރަހަމް
އަންނަ އަހަރު ސައުދީ އަރަބިއްޔާއާއި ދެކޮޅަށް ދަތިކުރުމުގެ ފިޔަވަޅު އަޅާނެ ކަމަށް އެމެރިކާގެ ސެނެޓަރުން ވައުދުވެއްޖެއެވެ.
ސައުދީއާއި ދެކޮޅަށް ސެނެޓަށް މި މައްސަލަ ވެއްދުމުގައި އިސްކޮށް ހަރަކާތް ތެރިވި ރިޕަބްލިކަން ސެނެޓަރު ލިންޑްސޭ ގްރަހަމް ވިދާޅުވީ 2019 ވަނަ އަހަރުގެ ސެނެޓުގެ ދައުރު ފެށުމުން މި ބިލް ހުށައަޅުއްވާނެ ކަމަށެވެ. ގްރަހަމް ވަނީ ސައުދީއިން އެމެރިކާއާއިއެކު ގުޅުން ދަމަހައްޓަން ބޭނުންވާނަމަ ކަންކަން ބަދަލުކުރަން ޖެހޭ ކަމަށާއި ބަދަލުކުރަން ޖެހޭ ކަންކަން އިނގޭނީ ސައުދީއަށް ކަމަށް ވިދާޅުވެފައެވެ.
ވަލީއަހުދު މުހައްމަދު ބިން ސަލްމާން އެ މަގާމުން ދުރުކުރަން ބޭނުންވާ ކަމުގެ އިޝާރާތެއް ވެސް ސެނެޓަރުން ވަނީ ދެއްވާފައެވެ.
ސެނެޓަރުން ވިދާޅުވެފައި ވަނީ މިއީ ސައުދީ އާއި އޮތް ގުޅުން ނިމުނީކީއެއް ނޫން ކަމަށެވެ. ނަމަވެސް ކަންކަން އިސްލާހު ނުކޮށް އެމެރިކާއާއި ސައުދީގެ ގުޅުން ދެމިއެއް ނޯންނާނެ ކަމަށް ވެސް އެބޭފުޅުން ވަނީ ހާމަކުރައްވާފައެވެ.
އެމެރިކާގެ ސެނެޓަށް ވައްދާފައިވާ ބިލުގައި މައިގަނޑު ގޮތެއްގައި ވަނީ ޔަމަނުގައި ކުރަމުންދާ ހަނގުރާމައަށް އެމެރިކާއިން ވާގިވެރިވުން ހުއްޓާލުމަށާއި، ހަޝޯގީ މަރާލި މައްސަލައިގައި ވަލީއަހުދު ސަލްމާންގެ ބައިވެރިވުން އޮތް ކަމަށް ނިންމުމަށާއި ގަތަރާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލުމަށެވެ.
އެމެރިކާގެ ޖާސޫސީ އިދާރާ، ސީއައިއޭއިން ވަނީ ހާޝޯގީ މަރާލުމުގައި ވަލީއަހުދު ބައިވެރިވުން އޮތް ކަމަށް ސެނެޓަށް މައުލޫމާތު ދީފައެވެ.
ޖަމާލް ހަޝޯގީ މަރާލާފައިވަނީ ތުރުކީގެ އިސްތަންބޫލްގައި ހުންނަ ސައުދީ އަރަބިއްޔާގެ ކޮންސިއުލޭޓް ތެރޭގައިއެވެ. އޮކްޓޫބަރު މަހުގެ 2 ވަނަ ދުވަހު ހިންގި މި އަމަލުގައި ވަލީއަހުދުގެ އެއްވެސް ބައިވެރިވުމެއް ނުވާކަމަށް ސައުދީގެ ކަމާބެހޭ ފަރާތްތަކުން ވަނީ ތަކުރާރުކޮށް ވިދާޅުވެފައެވެ.
